Myaso 114 - Livulu lya Shukulu Kalunga

Mwaso wa Ciwano ca Pasovala

¹ Omo vanu va Isalele vatundile mu lifuti lya Ingito, omo vatekulwila va Yakomba vatundile mu lifuti lya vungenzi,

² co muyati wa Yunda vapwile vanu vakujela va Shukulu Kalunga, Isalele vapwile vufuko vwendi.

³ Co Njambi walisholwele kuje ku mema a kalunga, co mema a kalunga omine cau, Ndonga ya Yondau yalikelele kwitisa mema.

⁴ Minkinda yaningangele ngwe vimembe vajombozoka, co malundu ajajele ngwe vana va vimanga vatumbozoka.

⁵ Yove mema a kalunga, vikajo watewelele? Nove Yondau, vikajo walikelele kwitisa mema?

⁶ Yeni minkinda, omwo vikajo mwajombozokele ngwe vimembe? Neni malundu, omwo vikajo mwatumbozokele ngwe vana va vimanga?

⁷ Asi ajaje omo Shukulu Kalunga aija, ku mesho a Njambi ya Yakomba,

⁸ Njambi uje asa kutengulula mamanya kupwa mashali a mema, nakutengulula litale kupwa masima a mema a tuvwelu-vwelu.