Myaso 112 - Livulu lya Shukulu Kalunga

Kuvwaelela kwa munu wamuvwa

¹ Shangazaleni Shukulu Kalunga! Navezika munu uje akomoka Shukulu Kalunga, munu uje avwaelela nakwononoka mashiko endi.

² Vana vendi vakapwa vingenyenye mu lifuti, co vatekulwila vendi vakapwa vakuvezika.

³ Naanga yendi vakapwa vakufuka, co akavezika ku myaka yoshe.

⁴ Ceke cikatwila mu lisusulungu kuli vaka-vushunga, omwo Shukulu Kalunga wapwa muka-ngozi, na mema ku mbunge na vushunga.

⁵ Navezika munu uje ali na ngozi, munu uje akumwisa vyendi kuli vakwavo, uje apanga na vushunga mu vipangi vyendi vyakulanda nakulandulula.

⁶ Muka-vushunga kakonwa embwe, vakamwanuka ku myaka yoshe.

⁷ Munu wangacije kakazivi lyova akutambula muzimbu wauvi, omo ikeye nakulaela kuli Shukulu Kalunga.

⁸ Ikeye kakazivi lyova nambe kujujuka, noo namono vitozi vendi vanavafungulula.

⁹ Munu ou muka-vushunga aana vyuma vyendi kuli vaje vanajeneka na mbunge yendi yoshe, co ngozi yendi kuyesi kwonwa, oloni akapwa muka-nzili na kasingimiko.

¹⁰ Vaka-vuvi vakacimona, co vakaviilila, vakalishumanga ku mayo nakunyonga, co kuvakatambula vyuma vije vashakele.