Myaso 111 - Livulu lya Shukulu Kalunga

Kushangazala Shukulu Kalunga

¹ Shangazaleni Shukulu Kalunga! Mu cikungulukilo ca vanu vendi, njikakandelela kuli Shukulu Kalunga na mbunge yange yoshe.

² Vipangi vya Shukulu Kalunga vyapwa vyakama, vaje voshe vaviyongola, vavwaelela navyo.

³ Vilinga vyendi vyapwa vya vumpau na vukama, na vushunga vwendi vwakala ku myaka yoshe.

⁴ Shukulu Kalunga nanukisa vanu vilinga vyendi vyakukomokesa, Shukulu Kalunga wapwa muka-ngozi na mema ku mbunge.

⁵ Shukulu Kalunga akana vyakulya kuli vaje vamukomoka, co simbu yoshe akanyungu cikumiiyo cendi navo.

⁶ Namwesa vanu vendi nzili ya vipangi vyendi akuvana mafuti a vaka-kwija kupwa vushwana.

⁷ Vipangi vya mavoko a Shukulu Kalunga vyapwa vya kulongwa na vushunga, co mashiko endi oshe vasa kuwakulaela.

⁸ Mashiko endi akala ku myaka yoshe, vaanene mu kulongwa na mu vushunga.

⁹ Shukulu Kalunga waamenene vanu vendi, nakulikumiiya navo cikumiiyo ca ku myaka yoshe. Lizina lyendi lyapwa lyakujela nakukomokesa!

¹⁰ Kukomoka Shukulu Kalunga kunapu vushangumukilo vwa mana, voshe vaje vanyunga mashiko endi vali na mana. Vashangazale Shukulu Kalunga ku myaka yoshe!