Myaso 109 - Livulu lya Shukulu Kalunga

Kulinyenyeta kwa munu omo ali mu tuyando

¹ Njikushangazala yove Njambi, kesi woloke kuluu.

² Vaka-vuvi na vaka-makuli valinakunjilwisa, valinakwendeka vyuma vya makuli ali yange.

³ Vaka-vuvi valinakunjivangeya, valinakunjilwisa kwakujeneka mulonga.

⁴ Nambe yange njivazema, oloni vakevo vanjiyeluwisa, oloni yange njikavalombelela.

⁵ Vakevo vanjiilwisila vuvi ku vuvwa vuje njikalingi, nakunjiilwisila cizindo a cizemo cange kuli vakevo.

⁶ Vendeka ngwavo, “Anguleni munu wamuvi ngeci amulwise, citozi cendi emane nakumuvangeya mulonga.

⁷ Omo vamusompa vanapande kumuhisa, na malombelo endi lalo apwe vuvi.

⁸ Matangwa akuyoya kwendi apwe amandondo, munu weka akahinge a vipangi vyendi!

⁹ Vana vendi vapwe visiwa, na munakazi wendi apwe fwile!

¹⁰ Vana vendi vapwe vaka-kwendangana, co vapwe vaka-kulomba vyakulya. Vavasheke mu vingundu muje vanakala nakuyoyela.

¹¹ Muka-kukumwisa ambate vufuko vwendi vwoshe, co vangenzi vapukule vyoshe vije vyapangelele.

¹² Kesi kukale umo amuzivile mema ku mbunge, co lalo kesi kukale umo alele visiwa vendi embwe.

¹³ Vatekulwila vendi voshe vatse, co lizina lyendi valivale ku visemwa vije vikaija kulutwe.

¹⁴ Shukulu Kalunga anuke vuvi vwa vakukulwila vendi, co kesi asambese vuvi vwa vaina.

¹⁵ Shukulu Kalunga anuke vuvi vwavo simbu yoshe, oloni vakevo ni vavevale hivya!

¹⁶ Munu ou kakele na mema ku mbunge, oloni wayandesele nakutsiya tuutu na vaka-kujeneka, na vaka-kuzeya mu vimbunge.

¹⁷ Wasingile vakwavo, co ikeye lalo apwe wakusinga! Kavezikisile vakwavo, co ikeye kesi vamuvezikise lalo!

¹⁸ Wapwisile visingo ngwe vuzalo vwendi, co visingo vyendi vikovele muli ikeye ngwe mema, visingo vikovele lalo mu vitsiya vyendi ngwe mazi.

¹⁹ Visingo vyendi vipwe ngwe vuzalo simbu yoshe vimuzengeleke ngwe mwiva.”

²⁰ Eci cipwe cihiso cakama ku vitozi vange cakutunda kuli Shukulu Kalunga, vitozi vaje vendeka vyuma vyavivi ali yange.

²¹ Oloni yove Shukulu Kalunga wa Akamwa ya Vyoshe, njikwase ngwe muwakulaesele, co njipatule omwo cizemo cove cije kucesi kutenguluka capwa cacivwa.

²² Omwo nji kautu na muka-kujeneka, co mbunge yange inapokoka.

²³ Njilinakuzimuka ngwe munzinze wa cingwezi, co njilinakupekumukila noku-noku ngwe limbili-mbili.

²⁴ Mavuli ange anazeye omwo kwonwa kulya, co muvila wange unayondwa.

²⁵ Omo vanu vanjimona, co vanjishendumuna nakulipika ku mitwe yavo.

²⁶ Yove Shukulu Kalunga Njambi yange njikwase, ija unjamene omwo cizemo cove cije kucesi kutenguluka.

²⁷ Vitozi vange vazivuke ngeci yove u muka-kunjamena.

²⁸ Vanjisinge ngano, oloni yove ukanjivezikisa, omo vanjilwisa vakaziva shwamwa, oloni yange ngamba yove njikajolela.

²⁹ Ngecivene, vitozi vange vazale likamba lyavo ngwe vuzalo, co shwamwa lalo ivakole.

³⁰ Njikakandelela manene kuli Shukulu Kalunga, co njikamulemesa mu mbunga ya vanu,

³¹ omwo Shukulu Kalunga ikeye nemanena muka-kuutwa, nakumwamena kuli vaje vashaka kumutsiya.