Myaso 108 - Livulu lya Shukulu Kalunga

Lilombelo lyakukwasa kulwa na vitozi

Mwaso wa Ndaviti

¹ Mbunge yange inakolesa mbe yove Njambi, njikaimba nakukushangazala! Njikenduka a mungulungengu,

² nakushangazala Shukulu Kalunga na kalyalya kange na cisanzi cange!

³ Yove Shukulu Kalunga, njikakukandelela akati ka miyati, njikakushangazala akati ka vanu.

⁴ Cizemo cove cije kucesi kutenguluka cinete ku melu, na kulongwa kwove kunete ku mashelwa.

⁵ Yove Njambi, mwesa vukama vwove mwilu ya melu, na vumpau vwove ano asi oshe!

⁶ Twamene na nzili yove, co kumbulula malombelo etu, ngeci vaje vanu vawazema vavamene.

⁷ Ku mwela wendi wakujela, Njambi wendekele ngwendi, “Njikaangununa Shekeme, njikapangezela Cana ca Sukote ku vanu vange omo yange njili na nzili.

⁸ Ngilyande yapwa yange, na Manase lalo yapwa yange, Efalime yapwa ngwe tepa yange ya nzita, Yunda ikeyo yapwa mulamu wange wa vumwene.

⁹ Mowavi yapwa ngwe mbashiya yange yakujwelela, njikasha vin̄aku vyange a Endome. Kuma vaFilisitiya vayongola ngeci vakalisamba nakuvwaelela ali yange ndi?”

¹⁰ Yove Njambi, iyajo akanjikovelesa mu nganda ije ili mu cimpaka? Iyajo akanjitwamenena ku Endome?

¹¹ Mwa vushunga vene kuma unatuvyana ndi? Kuma kuwasa kuya amo na mashwalale vetu ndi?

¹² Tukwase kulwisa vitozi vetu, omwo kukwasa kwa vanu kunapu kwangoco.

¹³ Omwo tuli amo na Njambi tukahyana, ikeye akafungulula vitozi vetu.