Myaso 107 - Livulu lya Shukulu Kalunga

LIVULU LYAMUCITANU (Mya 107–150) Kushangazala vuvwa vwa Njambi

¹ “Kandeleleni kuli Shukulu Kalunga, omwo ikeye wamuvwa, cizemo cendi cije kucesi kutenguluka cakala ku myaka yoshe!”

² Vanu voshe vaje vanamena Shukulu Kalunga ku tuyando vamushangazale,

³ voshe vaje vanatundisa Shukulu Kalunga ku mafuti a mu ngangela, na mu kangombe ka yambi, na ku kunto, na mu mbwela.

⁴ Vamo vendanganene mu mambo mu ngila yakulamba, kuvawanene ngila yakuya mu nganda ngeci vakakalemo.

⁵ Vazivile njala na lihwila, co vatsile lusike.

⁶ Asinoni mu tuyando twavo, vatambekele kuli Shukulu Kalunga, co wavamenene ku tuyando twavo.

⁷ Shukulu Kalunga wavatwamenenene mu ngila yakushungama, nakuvetesa ku nganda ivanapande kukala.

⁸ Vanu vamukandelele Shukulu Kalunga omwo cizemo cendi cije kucesi kutenguluka, na vyuma lalo vyakukomokesa vije vyavalingilile!

⁹ Ikeye anwisa vaje vali na lihwila, co vaje vali na njala avakutisa na vyuma vyavivwa.

¹⁰ Vamo vakele mu lisusulungu na mu munzinze wa kutsa, vapwile vinzinda vaje vavakutile na malyenge,

¹¹ omwo vatengulukilile mashiko a Njambi Muka-nzili yoshe, nakuvyana vilongesa vyendi.

¹² Vazeyele omwo vipangi vyavo vyakukaluwa, vawililile asi, oloni naumo wai wavakwasele.

¹³ Asinoni mu tuyando twavo vatambekele kuli Shukulu Kalunga, co Shukulu Kalunga wavamenene ku tuyando twavo.

¹⁴ Wavatundisile mu lisusulungu, na mu munzinze wa kutsa, co wavatwile malyenge avo.

¹⁵ Vanu vamukandelele Shukulu Kalunga omwo a cizemo cendi cije kucesi kutenguluka, na vyuma lalo vyakukomokesa vije vyavalingilile.

¹⁶ Shukulu Kalunga atavula vikolo vya vunengu, nakuvatula mavalo a vutale.

¹⁷ Vamo vapwile vilema omwo vivi vyavo,

¹⁸ kuvasele kulya vyakulya, co vakele kuyehi na kutsa.

¹⁹ Asinoni mu tuyando twavo, vatambekele kuli Shukulu Kalunga, co wavamenene ku tuyando twavo.

²⁰ Wavakangwisile na lijwi lyendi lya nzili, nakuvamena kukunyonga.

²¹ Vanu vamukandelele Shukulu Kalunga omwo a cizemo cendi cije kucesi kutenguluka, na a vyuma lalo vyakukomokesa vije vyavalingilile.

²² Vanu vanapande kumukombelela vin̄ombelo vya cikandelela, nakwambulula vilinga vyendi mu myaso yakujolela!

²³ Vanu vamo vakele nakuya ku mema a kalunga mu mato, nakulandesa vyuma vyavo a mema a kalunga.

²⁴ Vamwene vilinga vya Shukulu Kalunga, na vipangi vyendi vyakukomokesa a mema a kalunga.

²⁵ Shukulu Kalunga washikile, co lihunzi lya nzili lyashangumukile kuhuwa nakukatula mankimba.

²⁶ Mato akama akele nakujundokela mwilu avuvili-vili, nakumbwitama kwisi ya mema a kalunga, a vushonde vwangacije, vanu kuvasele kulitakamesa lalo embwe.

²⁷ Vatanozokele nakupelyangela ngwe vanu vaka-kupenda, na mana avo oshe ahwile.

²⁸ Asinoni mu tuyando twavo vatambekele kuli Shukulu Kalunga, co wavamenene ku vukalu vwavo.

²⁹ Shukulu Kalunga wolwesele lihunzi, co mankimba alendamanene kuluu, alikelele kungwanjanga.

³⁰ Vanu vajolelele omwo mankimba olokele kuluu, co Shukulu Kalunga wavetesele mwamuvwa ku cikuma kuje kuvashakele kuya.

³¹ Vanu vamukandelele Shukulu Kalunga omwo a cizemo cendi cije kucesi kutenguluka, na a vyuma lalo vyakukomokesa vije vyavalingilile.

³² Vaalese Shukulu Kalunga mu cikungulukilo ca vanu, nakumushangazala mu munga ya vantwama.

³³ Shukulu Kalunga womisile vindonga, womisile masima a tuvwelu-vwelu.

³⁴ Watengulwile livu lya vwilo kupwa mambo ya mwongwa, omwo vuvi vwa vaje vakele muje.

³⁵ Watengulwile mambo kupwa vingunja vya mema, na livu lyakuma kupwa masima a tuvwelu-vwelu.

³⁶ Watavesele vanu vaka-njala kutunga muje, co vatungile nganda ngeci vayoyelemo.

³⁷ Vanu vakuvile vimbuto mu mahya nakukuna mikolovozi ya vushuka vwa vinyu, co vatejele nakuungulula vimbuto vyavingi.

³⁸ Shukulu Kalunga wavezikisile vanu vendi, co vakele na vana vavangi, katavele ngeci matanga a vingombe vyavo atepuluke.

³⁹ Omo vitozi va vanu va Njambi vavafungulwile, co vavayandesele.

⁴⁰ Shukulu Kalunga washawisile vanu vaje vayandesele vanu vendi, co wavendanganesele mu mambo mu vingila vyakulamba.

⁴¹ Oloni Shukulu Kalunga wapatwile vanu vendi ku tuyando twavo, co watumisile naanga yavo ngwe matanga a vimanga.

⁴² Vaka-vushunga vamona evi, co vajolela, oloni vaka-vuvi voshe vakavolwesa kuluu.

⁴³ Voshe vaje vaka-mana vayongole a vyuma evi, vayongole cizemo ca Shukulu Kalunga cije kucesi kutenguluka.