Myaso 106 - Livulu lya Shukulu Kalunga

Vuvwa vwa Shukulu Kalunga kuli vanu vendi

¹ Shangazaleni Shukulu Kalunga! Kandeleleni kuli Shukulu Kalunga, omwo ikeye wapwa wamuvwa, cizemo cendi cije kucesi kutenguluka cakala ku myaka yoshe.

² Iyajo asa kwambulula vilinga vya nzili ya Shukulu Kalunga? Iyajo asa kumushangazala nakupwisa?

³ Vavezika vanu vaje valinga vushunga, vanu vaje valinga vuvwa simbu yoshe!

⁴ Yove Shukulu Kalunga njanuke, omo umwesa ngozi kuli vanu vove, nange lalo njanuke omo wamena vanu vove.

⁵ Nange lalo njivezike amo na vanu vove, vaje vaunaangula ngeci njivwaelele amo navo, vavwaelela omwo vakevo vapwa vanu vove.

⁶ Tunalingi vuvi ngwe muvalingile vakukulwila vetu, tunalingi mwamuvi, co tunaviisa.

⁷ Omo vakukulwila vetu vakele mu Ingito, kuvazivukile vilinga vyakukomokesa vya Shukulu Kalunga, vevalele vukama vwa cizemo ca Shukulu Kalunga cije kucesi kutenguluka, co vakutengulukilile yove Njambi Muka-nzili yoshe kuje ku Lishali Lyakuvenga.

⁸ Nameme ngoco Shukulu Kalunga wavamenene, ngwe muje muwavakulaesele, ngeci uvamwese nzili yove yakama.

⁹ Akushika kwove mema a mu Lishali Lyakuvenga omine oshe cau, co wetisile vanu vove a livu lyakuma ngwe mu mambo.

¹⁰ Wavamenene ku vitozi vavo, co wavapatwile ku vitozi vavo.

¹¹ Oloni mema akupwile vitozi vavo, co naumo wai wasaleleo.

¹² Asinoni vakulaelele majwi endi, co vembile nakumushangazala.

¹³ Oloni vwasi-vwasi vanu vevalele vipangi vya Shukulu Kalunga, vavyanene kunangula kwendi.

¹⁴ Vanu vakele na mashungu a vyakulya muje mu mambo. Nakweseka Njambi muje vene mu mambo.

¹⁵ Njambi wavanene vije vivalombele, oloni watumine mushongo wauvi manene ali vakevo.

¹⁶ Omo vanu mu mambo vazivilile lifuwa Mosesa na Alone ngamba wakujela wa Shukulu Kalunga,

¹⁷ co asi eshamene nakuleula Ndatane, nakufwika lalo Avilame na naanga yendi.

¹⁸ Tuhya lalo twezile ali vakevo, co twenyekele vaka-vuvi voshe.

¹⁹ Vanu vamungile muna ngombe wa ngolinde ku Sinai, nakulemesa uje kamponya.

²⁰ Valandakanene vumpau vwa Njambi, na cifwa ca kasitu wakulya mwila.

²¹ Vevalele Njambi uje wavamenene, Njambi uje wapangele vikomokeso vyakama mu Ingito.

²² Vevalele Njambi uje walingile vyuma vyakukomokesa mu lifuti lya Ingito, na vyuma vyakujujwisa vije vyalingile ku Lishali Lyakuvenga.

²³ Ngecivene, Njambi wendekele ngwendi akanyongesa vanu vendi, oloni Mosesa ngamba yendi uje yaangwile wemanene mukati ku mesho a Njambi nakuvindika vukalu vwendi ngeci kesi avanyongese.

²⁴ Vanu vayeluwisile lifuti lije lyalivwa, kuvakulaelele cikulaeso ca Njambi.

²⁵ Valinyenyetele mu vimbalaka vyavo, co kuvononokele ku lijwi lya Shukulu Kalunga.

²⁶ Ngecivene, Shukulu Kalunga walisingile nakwolola livoko lyendi, ngwendi vanapande kutsila mu mambo,

²⁷ nakushandwela lalo vatekulwila vavo akati ka vaka-kujeneka kukulaela, nakutsila mu lifuti lya vungenzi.

²⁸ Vanu valemesele njambi lizina lyendi Mbale-Peole, co valile vin̄ombelo vivakombelelele ku vinjambi va kutsa.

²⁹ Vashangumwine vukalu vwa Shukulu Kalunga a vilinga vyavo vyavivi, co mushongo wakulitambwisa wezile ali vakevo.

³⁰ Oloni Finehase wemanene mukati nakuvindika vukalu vwa Shukulu Kalunga, co uje mushongo wakulitambwisa walikelele.

³¹ Eci vamutumbwilileco kupwa vushunga, na visemwa vyoshe lalo vije vikakalako, vakamutumbwilaco kupwa vushunga.

³² Vanu valuvalesele Shukulu Kalunga ku masima a Meliva, co Mosesa wakele mu vukalu omwo ya vilinga vyavo.

³³ Omwo valuvalesele munzinzime wa Mosesa, co wendekele majwi alishamena.

³⁴ Kuvanyongesele vanu vaje vaka-kujeneka kukulaela, ngwe muje mwavashikile Shukulu Kalunga,

³⁵ oloni valyambatelele na ije miyati, co vatembunwine vilinga vya vaka-kujeneka kukulaela.

³⁶ Vanu va Njambi valemesele tumponya, tuje twapwile nganjo kuli vakevo.

³⁷ Vakombelelele vana vavo va vanalume na ava va vanakazi ku minzinzime yakujwala.

³⁸ Vatsiile vana vakujeneka mulonga, co lifuti lyaviile na maninga.

³⁹ Valiviisile na vilinga vyavo evi, co kuvapwile va kulongwa kuli Njambi.

⁴⁰ Ngecivene, Shukulu Kalunga waluvalele na vanu vendi, co wazivile vunyengwe omo vakevo.

⁴¹ Co wavakundikile ku mavoko a vanu vaje vaka-kujeneka kukulaela, ngeci vitozi vavo vavashwanene.

⁴² Vitozi vavo vavayandesele, co vavafungulwile.

⁴³ Visimbu vyavingi Shukulu Kalunga wavapatwile, oloni vakevo vamutengulukilile Shukulu Kalunga, nakulinga manene vuvi.

⁴⁴ Oloni Shukulu Kalunga wavazivile omo vatambekele, co wamwene tuyando twavo.

⁴⁵ Shukulu Kalunga wanukile cikumiiyo cendi omo vakevo, co watengulwile viyongola vyendi omo cizemo cendi cije kucesi kutenguluka.

⁴⁶ Shukulu Kalunga walingisile vitozi kuzivilako vanu vendi mema ku mbunge.

⁴⁷ Shukulu Kalunga Njambi yetu twamene, tutundise akati ka miyati ya vanu, ngeci tukandelele nakushangazala lizina lyove.

⁴⁸ Shangazaleni Shukulu Kalunga Njambi wa Isalele ku myaka yoshe, vanu voshe vendeke ngwavo, “Ewa!” Shangazaleni Shukulu Kalunga!