Myaso 105 - Livulu lya Shukulu Kalunga

Njambi na vanu vendi

¹ Kandeleleni kuli Shukulu Kalunga, ambululeni vukama vwendi, tsimaneseni vilinga vyendi akati ka vanu!

² Imbeni nakushangazala Shukulu Kalunga, ambululeni vyuma vyoshe vyakukomokesa vije vyanalingi!

³ Vwaeleleni mu lizina lyendi lyakujela, vimbunge vya vaje vashakezeka Shukulu Kalunga vijolele.

⁴ Kulaeleni Shukulu Kalunga na nzili yendi, shakezekeni cihanga cendi simbu yoshe.

⁵ Anukeni vizivukiso vije vyalingile Njambi nakusompa kuje kwaanene.

⁶ Yeni vatekulwila va Avilahama ngamba yendi, neni vatekulwila va Yakomba munu uje yaangwile.

⁷ Ikeye Shukulu Kalunga Njambi yetu, mashiko endi ali mu kaye mwoshe.

⁸ Ikeye akanyungu cikumiiyo cendi ku myaka yoshe, na cikulaeso cendi ku visemwa vyakupwa 1,000.

⁹ Ikeye akanyungu lizivasano lije lyalingile na Avilahama, nakunyunga lalo cikulaeso cendi kuli Isake.

¹⁰ Shukulu Kalunga walikumiiye cikumiiyo na Yakomba, cije ca myaka yoshe.

¹¹ Ikeye wendekele ngwendi, “Njikakwana lifuti lya Kanana, likelyo likapwa vushwana vwove.”

¹² Vanu va Njambi vapwile vavandondo lika akuvalava, co vakevo vapwile vangenzi mu lifuti lya Kanana.

¹³ Vakele nakwendangana mu lifuti na lifuti, kutunda ku vumwene vumo nakweta ku vumwene vukwavo.

¹⁴ Oloni Njambi katavesele umo ngeci avayandese, co wanangwile vimyene ngeci vavanyunge.

¹⁵ Wendekele kuli vakevo ngwendi, “Kesi muvulumune vangamba vange vakwangula, co kesi muvulumune vaka-kwimanena vange!”

¹⁶ Shukulu Kalunga watumine njala ya lyangengela mu lifuti lyavo, co mu lifuti mwoshe kumwakele vyakulya.

¹⁷ Oloni Shukulu Kalunga watumine Yosefa kulutwe lwavo, Yosefa uje ivalandesele ngwe ndungo.

¹⁸ Mendi a Yosefa vaavavalesele akuwaka mu tukunju, na mukoshi wendi lalo vawakele mu malyenge,

¹⁹ noo vije vyendekele ikeye Yosefa vipwe vya vushunga, co lijwi lya Shukulu Kalunga lyamumwesele ngeci ikeye wapwile wa vushunga.

²⁰ Asinoni Mwene wa Ingito wamwecelele, muka-kushwana miyati wamupatwile.

²¹ Mwene wa Ingito wapwisile Yosefa muka-kushika njuvo yendi, wamupwisile muka-kushwana vyuma vyoshe vije vyakele mu Ingito,

²² wamwanene nzili yakushika vamyata vendi, na nzili lalo yakulongesa vaka-kumunangula.

²³ Asinoni Yakomba waile ku Ingito, wapwile mungenzi mu lifuti lya Hame.

²⁴ Shukulu Kalunga watumisile vanu vendi manene, wavapwisile vaka-nzili kutuvakana vitozi vavo.

²⁵ Njambi watengulwile vimbunge vya vaka-Ingito ngeci vazinde vanu vendi, nakutumba matumbe amavi kuli vangamba vendi.

²⁶ Njambi watumine ngamba yendi Mosesa, na Alone uje yaangwile.

²⁷ Vasholwele vilinga vya Njambi vya nzili, co valingile vizivukiso na vikomokeso mu Ingito.

²⁸ Njambi watumine lisusulungu mu lifuti, oloni vaka-Ingito kuvononokele lishiko lyendi.

²⁹ Wemwisile mema avo kupwa maninga, co visi vavo voshe vatsile.

³⁰ Mu lifuti lyavo mwoshe mwashulile mambotwe, nameme mu lipela lya mwene mwoshe mwashulile mambotwe.

³¹ Njambi washikile, co kwakele vinjame vya vinzinzi na vina mu lifuti mwoshe.

³² Njambi watumine nyonzi ya mamanya na mihyato ije yakele nakuhyahyata mu lifuti lyavo.

³³ Mikolovozi ya vushuka vwa vinyu na miti ya mikuyu lalo yaviile, co miti yoshe yapokokele.

³⁴ Washikile, co vimbimba vezile vavangi-vangi vaje naumo wai wasele kuvalava,

³⁵ vimbimba valile vimena vyoshe vya mu lifuti, valile vyakulya vyoshe vije vyamenene mu lifuti.

³⁶ Watsiile vana va vanalume va va ntwatwa ku naanga yoshe ya mu Ingito.

³⁷ Asinoni Njambi watuwisile vaIsalele, vambatele siliva na ngolinde, voshe vapwile vaka-nzili navukangule.

³⁸ Vaka-Ingito vazivile lyova lya vaIsalele, co vajolelele omo vaIsalele vatundile mu lifuti.

³⁹ Njambi waakele lishelwa akamwa ya vanu vendi, na tuhya twakuvatwila ceke ku vutsiki.

⁴⁰ Valombele, co wavatuminine makokwa vavangi, wavanene vyakulya vyakutunda mwilu, co valile vakutile.

⁴¹ Njambi washokolwele limanya, co mema atuukile manene, ajalelele mu mambo ngwe ndonga.

⁴² Njambi wanukile cikulaeso cendi cakujela, kuli ngamba yendi Avilahama.

⁴³ Ngecivene, Njambi watuwisile vanu vendi vakwangula mu Ingito, co vembile nakulisamba nakujolela.

⁴⁴ Wavanene mafuti a vanu va miyati yeka, co wavanene lalo mahya avo.

⁴⁵ Njambi walingile vyuma evi ngeci vanu vendi vanyunge vizilika vyendi, nakwononoka lalo mashiko endi. Shangazaleni Shukulu Kalunga!