Myaso 104 - Livulu lya Shukulu Kalunga

Kushangazala Ishamatanga

¹ Mbunge yange ishangazale Shukulu Kalunga! Yove Shukulu Kalunga Njambi yange, yove wapwa uwakama! Yove washula na vulemu na vumpau,

² yove walifwika ceke ngwe vuzalo. Yove wajangumwine melu ngwe mbalaka,

³ co watungila limbo lyove akamwa ya mema. Mashelwa waapwisa matemba ove, ukende a mambava a lihunzi.

⁴ Lihunzi walipwisa miluwaa vove, co milangi ya tuhya yapwa vangamba vove.

⁵ Yove wajalele luvula lwa kaye ngeci kaye kesi kashengenye.

⁶ Wafwikile kaye na nzinga ngwe vuzalo vwa vulaja, co mema afwikile minkinda.

⁷ Omwo waluvalele mema atewele omo azivile kushika kwove kwa nzili, co aitile vwasi.

⁸ Mema atundile ku minkinda nakushelumukila mu cimbongo, ashelumukilile ku mutambela kuje kuwaatumbwilile.

⁹ Yove watwile nginga ngeci mema kesi ajombokeo, ngeci ano asi kesi ajalele.

¹⁰ Unetisa mema a tuvwelu-vwelu mu vimbongo, co lalo vindonga vilinakwita mukati ka malundu.

¹¹ Tusitu vawana mema mu vindonga, mema atsiya lihwila lya vingolo.

¹² Tuzila vanatungila mashwa avo ku miti ije ili kuyehi na tuvwelu-vwelu, co valinakwimba oku vali ku minango.

¹³ Yove ukanyokesa nyonzi a malundu yakutunda mwilu, asi anashulu na vivezikiso vyove.

¹⁴ Umenesa mwila wa vingombe, co umenesa vimena ngeci munu alime vyakulya vyendi,

¹⁵ nakulima lalo vinyu ngeci vivwaelelese mbunge ya munu, na mazi a olive akulikwita ku mesho endi, na likende ngeci limwane nzili.

¹⁶ Miti ya Shukulu Kalunga inyokela nyonzi yaingi, miti ya kendale ya ku Lembanone ije yakunine.

¹⁷ Tuzila vatungila mashwa avo kuje, kanyange-yange natungila lishwa lyendi ku miti ya tulipi.

¹⁸ Ku minkinda yailaja kwakala makunda, co mashea vavanda mu mamanya.

¹⁹ Yove Shukulu Kalunga watangele ngonde nakwimika myaka, co litangwa lizivuka simbu yakulauka kwalyo.

²⁰ Watangele lisusulungu, co ku vutsiki tusitu voshe valyendela ngoco.

²¹ Vana va vindumba valinakwaanena vyakulya vyavo, vashakezeka vyakulya vyavo kuli Njambi.

²² Omo litangwa lituuka, co veluka lalo, nakuvutama mu viteke vyavo.

²³ Asinoni vanu vaya nakupanga vipangi vyavo, co vaundangana noo cingwezi.

²⁴ Yove Shukulu Kalunga unatanga vyuma vyavingi! Wavitangele vyoshe na mana ove! Kaye kanashulu na vije viwatangele.

²⁵ Kuli mema a kalunga akama akujanjavala, muje muli vyuma vyakuyoya vyavingi-vingi, vyakama nevi vyavindondo.

²⁶ Mu mema a kalunga mukemwo muje mwakaita-ita mato akama, mukemwo lalo mwakala Levyatane uje iwatangele ngeci ehelemo.

²⁷ Voshe ava vakenga kuli yove, ngeci uvane vyakulya vyavo a simbu ije inavapande.

²⁸ Omo uvana vyakulya vyakutunda mu livoko lyove, co valya vakuta.

²⁹ Omo uvajenjuka, co vaziva lyova, omo utundisa mwonyo wove muli vakevo, co vatsa, nakwilukila lalo ku livu kuje kuvatundile.

³⁰ Omo uvelwisila mwonyo, co vayoya, waana mwonyo wauha ano asi.

³¹ Vumpau vwa Shukulu Kalunga vwakala ku myaka yoshe! Shukulu Kalunga avwaelele na vije vyanatanga!

³² Ikeye akenga asi, co asi ajaja, ikeye akwata a minkinda, co ikakumuka vwisi.

³³ Mukuyoya kwange kwoshe, njikembila Shukulu Kalunga, simbu yoshe yakuyoya kwange njikaimba nakushangazala Njambi yange.

³⁴ Shukulu Kalunga avwaelele na visinganyeka vyange, omwo njijolela muli ikeye.

³⁵ Vaka-vuvi vavanyongese ano asi, na vaka-kujeneka kukulaela kesi vakaleko lalo embwe! Mbunge yange ishangazale Shukulu Kalunga! Shangazaleni Shukulu Kalunga.