Myaso 103 - Livulu lya Shukulu Kalunga

Cizemo ca Njambi

Mwaso wa Ndaviti

¹ Mbunge yange ishangazale Shukulu Kalunga, na muvila wange woshe ushangazale lizina lyendi lyakujela!

² Mbunge yange ishangazale Shukulu Kalunga, co kesi wivale vivezikiso vyendi vyoshe.

³ Ikeye muka-kunjisambesa ku vivi vyange vyoshe, nakukangwisa mishongo yange yoshe.

⁴ Shukulu Kalunga akanyungu mwonyo wange, ku vukalo vwa vatsi, cizemo cendi cije kucesi kutenguluka na mema ku mbunge, vinapu ngwe cilongo ku mutwe wange,

⁵ ikeye anjana vyuma vyavivwa mukuyoya kwange, ngeci njipwe nji mukwenje njikole na nzili ngwe ngonga.

⁶ Shukulu Kalunga akasompo mwa vushunga, akalingi lalo vuvwa kuli voshe vaje vavayandesa.

⁷ Washolwele viyongola vyendi kuli Mosesa, nakumwesa vilinga vyendi vya nzili ku vanu va Isalele.

⁸ Shukulu Kalunga ikeye wa ngozi na mema ku mbunge, kesi kuluvala vwasi, washula na cizemo cije kucesi kutenguluka.

⁹ Shukulu Kalunga kesi kuhisa simbu yoshe, ikeye lalo kesi kuluvala simbu yoshe embwe.

¹⁰ Ikeye kesi kutuhisa ngwe ku vuvi vwetu embwe, nambe kutwilwisila vuvi vwetu ngwe ku milonga yetu.

¹¹ Ngwe omo muwapwa melu aje akala kulyala na asi, mukemwo mucafwa cizemo cendi cije kucesi kutenguluka kuli vaje vamukomoka.

¹² Ngwe muvyalyangunuka ngangela na kangombe ka yambi, mukemwo lalo mwakatundisa vuvi vwetu.

¹³ Ngwe ishe ya munu atetela vana vendi, mukemwo lalo Shukulu Kalunga mwakatetela vaje vamukomoka.

¹⁴ Omwo ikeye azivuka muje mwatutangele, azivuka ngeci yetu twapwa likungu.

¹⁵ Mwonyo wa munu unapu ngwe mwila, munu akula mwamuvwa ngwe shani ya mu shwata,

¹⁶ oloni omo lihunzi lihuwa, co shani ipekumuka, co naumo wai akanuka aje a mwela ayakele.

¹⁷ Oloni cizemo ca Shukulu Kalunga kucesi kutenguluka kuli vaje vamukomoka, cikakalako myaka yoshe, na vuvwa vwendi lalo vukakala ku cisemwa coshe,

¹⁸ kuli vaje vanyunga cikumiiyo cendi, na kuli vaje vakulaela nakwononoka mashiko endi.

¹⁹ Shukulu Kalunga natumbika litanda lyendi mwilu, ikeye mwene wa vyoshe.

²⁰ Yeni tungelo va nzili shangazaleni Shukulu Kalunga, yeni vaka-kwononoka mashiko endi,

²¹ yeni voshe vaka-nzili mulinakutolilila ku lijwi lyendi, shangazaleni Shukulu Kalunga, yeni vangamba vendi vaje vakalingi cizango cendi!

²² Shangazaleni Shukulu Kalunga yeni voshe vitanga vyendi, na mu mitambela mwoshe muje mwalinakushwana! Mbunge yange ishangazale Shukulu Kalunga!