Myaso 102 - Livulu lya Shukulu Kalunga

Mukwenje ali mu tuyando alombela kuli Njambi

¹ Njitolilile omo njilombela yove Shukulu Kalunga, mutambi wange wete kuli yove ngeci unjikwase!

² Kesi unjikengese nima a litangwa lya n̄avava yange, a litangwa lije njitambeka unapande kunjitolilila, nakunjikumbulula vwasi.

³ Omwo matangwa ange alinakuhwa ngwe vwisi, co vitsiya vyange vilinakwenya ngwe cimbundi ca tuhya.

⁴ Mbunge yange inazeye, co inomu cau ngwe mwila, nange kunjesi lalo na cizango cakulya vyakulya.

⁵ Njinayondwa manene omwo kukemanga kwange.

⁶ Njinapu ngwe likuvi mu mambo, njinafu lalo ngwe likungulu uje ali mu ngundu.

⁷ Njinalala cilavu-lavu, njinapu ngwe kazila uje ali endi lika a kashongwa ka njuvo.

⁸ Vitozi vange vanjishaula litangwa lyoshe, voshe vaje valinakunjiyengula valinakukun̄ula lizina lyange.

⁹ Omwo njinali lito ngwe likende, vyakunwa vyange vanavikumbasana na misozi,

¹⁰ omwo vukalu vwove nakuluvala kwove, unanjumbila kuti.

¹¹ Matangwa ange anafu ngwe munzinze wa cingwezi, njinapu ngwe mwila wakuma.

¹² Oloni yove Shukulu Kalunga wapwa u mwene ku myaka yoshe, visemwa vyoshe vakakwanuka.

¹³ Kala na mema ku mbunge na Siyone, omwo simbu inete yakumutetela, ino ikeyo vene simbu yaivwa!

¹⁴ Vangamba vove vazema Siyone, nameme ikeyo vanainyongesa, vangamba vove vaizivila mema ku mbunge, nameme inapu ngundu.

¹⁵ Ngecivene, miyati yoshe vakasingimika Shukulu Kalunga, co vimyene voshe va ano asi vakashangazala vumpau vwove.

¹⁶ Omo Shukulu Kalunga akatungulula Siyone, co vumpau vwendi vukasholoka.

¹⁷ Akatolilila nakukumbulula malombelo a vanu vaje vakele nakuyanda.

¹⁸ Sonekela vyuma evi ku cisemwa cije cikaija kulutwe, ngeci vanu vaje kanda vasemuke, navo lalo vakashangazale Shukulu Kalunga, soneka ngwove,

¹⁹ “Shukulu Kalunga wakengele asi oku ali mwilu mu mwela wendi wakujela, oku ali mwilu Shukulu Kalunga wakengele ano asi,

²⁰ ngeci azive kukemanga kwa vinzinda, nakupatula voshe vaje vavanatumbwila kutsa.”

²¹ Vakambulula lizina lya Shukulu Kalunga mu Siyone, co vakamushangazala lalo mu Yelusalema,

²² omo vanu va ku miyati yoshe vakakunguluka amo, nakulemesa Shukulu Kalunga.

²³ Shukulu Kalunga nanjizeyesa omo njicili nji mukwenje, matangwa akuyoya kwange lalo naakeesa.

²⁴ Ngecivene, njendekele ngwange, “Yove Njambi yange, kesi unjambate ololo vene simbu kanda njicikuluvale! Yove Shukulu Kalunga unapande kuyoya ku myaka yoshe.”

²⁵ Ku san̄ulu yove wajalele luvula lwa asi, co melu akewo vipangi vya mavoko ove.

²⁶ Vyoshe evi vikahwa, oloni yove kuuli, vikevyo lalo vikakula ngwe vuzalo. Yove ukavitengulula ngwe muukatengulula vuzalo, co vyoshe vikanyonga.

²⁷ Oloni yove simbu yoshe wafwa mumo, co myaka yove kuyikahu embwe.

²⁸ Vana vetu vakakala mwamuvwa, co akunyunga kwove vatekulwila vavo vakakala mu kwoloka.