Myaso 101 - Livulu lya Shukulu Kalunga

Cikulaeso ca mwene

Mwaso wa Ndaviti

¹ Njikaimba kuli yove Shukulu Kalunga, njikaimba mwaso wa a kulongwa kwove na vushunga vwove.

² Njikayoya kuyoya kwakuvwa. Simbu ikajo ukaija kuli yange? Njikayoya mu njuvo yange na mbunge yakujela.

³ Kunjikalingi cuma cacivi, njizinda vilinga vya vaka-kujeneka kukulaela kuli Njambi, kunjikombuko mbunge kuli vakevo embwe.

⁴ Vanu va vimbunge vyavivi vakakala kulyala nange, kunjikalingi vyuma vimo vyavivi.

⁵ Njikolwesa munu woshe uje afweya mukwavo, kunjikatava munu wa kulyalesa, na mbunge yendi lalo yakulyaka ku vukama, kupwa musamba wange.

⁶ Njikashakezeka vanu vaje va kulongwa kuli Njambi, njikavatava ngeci vakakale amo nange, voshe vaje venda mu ngila ya vushunga, vakapwa vanu vaka-kunjipangela.

⁷ Muka-makuli naumo wai akakala mu lipela lyange, kukwesi muka-civembulu lalo akakala mu lipela lyange.

⁸ A litangwa na litangwa njikolwesa vaka-kujeneka kukulaela vaje vali mu lifuti lyetu, njikatundisa vaka-vuvi voshe mu nganda ya Shukulu Kalunga.