Myaso 10 - Livulu lya Shukulu Kalunga

Lilombelo lya vushunga

¹ Omwo vikajo uli kulyala nange yove Shukulu Kalunga? Omwo vikajo kuusholokela a simbu ya tuyando?

² Vaka-vuvi vali na kulyalesa nakuyandesa vaka-kuutwa, vatse mu myeto ije ivanalitela vakevo vavenya.

³ Muka-vuvi alyalesa na mashungu a mu mbunge yendi, co muka-cipululu asinga nakuvyana Shukulu Kalunga.

⁴ Muka-vuvi kombuko mbunge kuli Shukulu Kalunga, mu kulyalesa kwendi ayongola ngwendi Njambi waiko.

⁵ Muka-vuvi avezika mu vyuma vyoshe vije vyalinakulinga. Kasa kuzivisisa kusompa kwa Njambi, co lalo apopolola vitozi vendi.

⁶ Endeka mu mbunge yendi ngwendi, “Kunjikonwa embwe, co lalo kunjikakala mu tuyando.”

⁷ Endekesi yendi inashulu na visingo, na makuli, na muuka, akazambula kwendeka majwi amavi akuluvalesa.

⁸ Alishweka mu membo, mukuvandamena kutsiya vanu vakujeneka mulonga. Alalela vushonge uje nazeye,

⁹ avandamena mu mwela wendi wavushweke ngwe ndumba, alinakuvandamena muje ngeci akwate tuutu, co avakwata nakuvakokela mu mweto wendi.

¹⁰ Vaje vanazeye vawa, omwo nzili yendi yakama inavahyana.

¹¹ Muka-vuvi endeka mu mbunge yendi ngwendi, “Njambi nevala, nakenge kweka, co kasa kunjimona!”

¹² Hisa vaka-vuvi Shukulu Kalunga! Anuka vaje valinakuyanda!

¹³ Vatijo muka-vuvi asa kushaula Njambi? Nakulyendekesa mu mbunge yendi ngwendi, “Njambi kakanjihisa embwe!”

¹⁴ Oloni yove unacimono unazivuka vukalu na tuyando, co walivwaesela kukwasa. Muka-kuzeya aliita kuli yove, omwo simbu yoshe u muka-kukwasa vaka-kujeneka.

¹⁵ Tundisa nzili ya vaka-vuvi, vahise omwo vuvi vwavo vuvanalingi, noo vanalikela kuvulinga.

¹⁶ Shukulu Kalunga ikeye wapwa mwene wa ku myaka yoshe, vaje valemesa vinjambi veka vakanyonga mu lifuti lyendi.

¹⁷ Yove Shukulu Kalunga, ukatolilila ku malombelo a vaka-kulikeesa, co ukavatakamesa.

¹⁸ Ukaziva mutambi wa vaka-kuyanda na visiwa, ukavasompela mu vushunga, ngeci munu naumo wai akavazivise lalo lyova.