Muka-kwambulula 9 - Livulu lya Shukulu Kalunga

¹ Njayongwele manene a vyoshe evi, co njamwene ngeci Njambi ali na nzili a voshe, ali na nzili ali vaka-mana vaje vayoya mu vushunga, nameme cizemo cavo nambe cizindo cavo. Naumo wai azivuka vije vikamwizila kulutwe.

² Kukwesi kwangunuka. Kuvindama kumolika kwija kuli vaka-vushunga, na kuli vaka-vuvi lalo, kuli vavavwa na kuli vavavi, kuli vaka-kutava, na kuli vaje kesi vaka-kutava, kuli vaje vaka-kukombelela vin̄ombelo na kuli vaje kuvesi kukombelela vin̄ombelo. Munu wamuvwa kesi na vuvwa vwakutuvakana muka-vuvi, co muka-kulisinga kesi na vuvwa vwakutuvakana uje kesi kulisinga.

³ Ovu vunapu vuvi mu vyuma vyoshe vije vilinakulingiwa ano asi. Kuvindama kumolika kwija ku voshe, co lalo vimbunge vya vanu vinashulu na vuvi, vuzaluke vuli mu vimbunge, co vwasi-vwasi vatsa.

⁴ Uje woshe ayoya ali na cinyangavili, ngwe katali wa mwonyo natuvakana ndumba wa kutsa.

⁵ Eyo, vaka-kuyoya vazivuka ngeci litangwa limo vakatsa, oloni vatsi neci vene vazivuka cai. Kuvesi na cikandelela kulutwe cai vanavevala hivya.

⁶ Cizemo cavo, na cizindo cavo, na cipululu cavo, vyoshe vinyonga amo navo, co nalumo lalo lwai vakalipandakana mu vyuma vije vilingiwa ano asi.

⁷ Twalao kulya vyakulya vyove nakuvwaelela, nwa vinyu vyove na mbunge yakujolela, omwo Njambi wayongwele laja ngeci evi vikevyo unapande kulinga.

⁸ Simbu yoshe zala vuzalo vwavuvwa nakuvwava mazi ku mutwe wove.

⁹ Vwaelela na munakazi uje iwazema, matangwa oshe akuyoya kwove kwangoco kuje kwanakwana Njambi ano asi. Vwaelela na matangwa oshe aje anapu angoco, omwo evi vikevyo viwukawana mukuundangana kwove kwoshe.

¹⁰ Panga na nzili mu vyuma vyoshe vije viwulinga, omwo ulinakuya ku vukalo vwa vatsi kuje kukwesi vipangi lalo vyai, kukwesi kuyongola, kukwesi kuzivuka, kukwesi mana.

¹¹ Njanangukile cuma cikwavo lalo ngeci muno mu kaye, vaka-kushatuka manene kuvesi kuhyana kushatuka simbu yoshe, co vaka-kusimpa kuvesi kuhyana nzita simbu yoshe, co vaka-mana kuvesi kuwana vufuko simbu yoshe, na vaka-vutongwe kuvesi kuwana vitumbamo vyakama simbu yoshe. Luvinda lukaija ku munu woshe-iwoshe.

¹² Omwo munu kazivuka simbu yendi omo yeta. Ngwe tuzila omo vakatsi vwasi-vwasi mu mweto, ngwe lalo visi omo vakatsi a linimbwa, mukemwo lalo na vanu vakatsi mu nganjo omo simbu ya vuvi ije kutwavandamenene yeta.

Viyongola a mana na a vulema

¹³ Njinamono mana akwavo lalo ano asi, mana akama aje anjikomokesele.

¹⁴ Kwakele nganda yaindondo muje mwakele vanu vavandondo. Co mwene umo muka-nzili wailwisile. Waizengelekele nakulyanganya kukovela mukati ka vivumbe.

¹⁵ Oloni muje mu nganda mwakele munalume umo wa kautu uje naumo wai wamwanukile, oloni uje kautu wapwile wakunyanyama manene ngeci wasele kwamena ije nganda na mana endi.

¹⁶ Njalyendekesele mu mbunge yange ngwange, “Mana apwa amavwa manene kutuvakana nzili,” nameme ngoco, mana a kautu vawayeluwisa, co majwi endi kuvawatolilila.

¹⁷ Mwamuvwa manene kutolilila ku majwi a kwoloka a muka-mana, kutuvakana kutambeka kwa muka-kushwana munga ya vilema.

¹⁸ Mana apwa amavwa manene kutuvakana vitwa vya nzita, oloni muka-vuvi umo asa kunyongesa vyuma vyavivwa vyavingi.