Muka-kwambulula 8 - Livulu lya Shukulu Kalunga

¹ Iyajo nalifu na muka-mana? Iyajo azivuka mwakunungulwila cuma? Mana a munu avwaelelesa cihanga cendi, nakujolesa.

Ononoka mwene

² Njikunangula ngeci unyunge cikulaeso cove kuli mwene omwo walisingileco ku mesho a Njambi.

³ Mwene akalingi vyoshe vije ashaka, tunda ku mesho endi. Kesi ukale kuyehi nendi.

⁴ Omo lijwi lya mwene lili na nzili, iyajo asa kumwihula ngwendi, “Vikajo ulinakulinga ngeci?”

⁵ Nga wononoka mashiko a mwene, co ukakala mwamuvwa, muka-mana azivuka ngila na simbu yakulinga vyuma.

⁶ Vyuma vyoshe vili na simbu yavyo na ngila yavyo ya kuvilinga, nameme kuyoya kwa munu kunapu kwakukalu manene!

⁷ Naumo wai wa ali yetu azivuka vije vikalingiwa kulutwe, co kukwesi umo ngeci atulekevyo.

⁸ Naumo wai asa kuvyana litangwa lyendi lya kutsa. Eci capwa cuma cacikalu cije kutwasa kuvyana, kutwasa kuputumuka ku cikeco.

Vaka-vuvi na vaka-vushunga

⁹ Njamwene vyoshe evi omo njayongwele vyuma vije vikalingiwa ano asi, aje ali vanu vamo vaje vali na nzili, co vamo valinakuyanda mwisi yavo.

¹⁰ Eyo, njamwene vaka-vuvi vavatsinda mu vimbumbo vyavo, oloni akutunda ku vimbumbo, vanu vashangazala vaka-vuvi vaje vanatsi mu nganda muje vene vaje vaka-vuvi valingilile vuvi vwavo. Eci cinapu cangoco.

¹¹ Omwo vikajo vanu vakalingi milonga yaingi? Omwo kuvesi kuhisa milonga vwasi.

¹² Muka-vuvi nasa kulinga milonga 100 oloni anga aciyoya. Eyo, njizivuka vivalinakwendeka ngwavo, “Nga ukomoka Njambi, co vyuma vyoshe vikapwa vyavivwa kuli yove,

¹³ oloni vyuma kuvikapu vyavivwa kuli vaka-vuvi. Myonyo yavo inapu ngwe munzinze, co vakatsa omo vacili vavandondo omwo kuvesi kukomoka Njambi.”

¹⁴ Oloni eci cinapu cangoco. Kenga vije vilinakulingiwa mu kaye, visimbu vimo vaka-vushunga vakawana cihiso cije capande vaka-vuvi, co vaka-vuvi vakatambula cikandelela cije capande vaka-vushunga. Co yange njendeka ngwange cuma eci cinapu cangoco.

¹⁵ Ngecivene, yange njinalihisa ngeci munu napande kulivwaelelesa ikeye vavenya, omwo senga yalinayo mu mwonyo wendi lika inapu kulya nakunwa nakulivwaelelesa ikeye vavenya. Nasa kulinga cuma eci muje mwapanga a simbu ya mwonyo wendi uje wanamwana Njambi ano asi.

¹⁶ Omo njesekele kupwa muka-mana na kulilongesa vije vilinakulingiwa ano asi, co njamwene ngeci njakele nakutona vutsiki na mutanya,

¹⁷ co kunjazivisisile vije vyakele nakulinga Njambi. Nameme uundangana na nzili, navimo viwuwana vyai. Vaka-mana vakeseka kuzivuka, oloni kuvesi kuzivuka vyoshe.