Muka-kwambulula 7 - Livulu lya Shukulu Kalunga

Viyongola vya a mwonyo

¹ Lizina lyalivwa lyatuvakana mazi a seo yakama, co litangwa lya kutsa lyatuvakana litangwa lyakusemuka.

² Mwamuvwa kuya ku njuvo kuje kuli vusiwa, kutuvakana kuya ku njuvo kuje kuli ciwano, omwo vaje valinakuyoya vanapande kulyanukisa ngeci kutsa catuvandamena yetu voshe.

³ Vusiwa vunapu vwavuvwa kutuvakana kujola, vusiwa vwasa kusholoka ku cihanga cove, oloni mbunge ivwaelela.

⁴ Munu uje alinakuyongola kuvwaelela simbu yoshe napu cilema, oloni muka-mana akayongola a kutsa.

⁵ Mwamuvwa kukala na vanu vaka-mana ngeci vakunangule, kutuvakana kukala na vilema vaimbe vyakukushangazala.

⁶ Tujolo twa cilema, tunafu ngwe muwakambongozoka mambimbo a liko, vyoshe vinapu vyangoco.

⁷ Omo muka-mana akwisa umo nafu ngwe cilema, nga utambula lizika-kanwa uviisa mana ove.

⁸ Mamaneselelo a cuma anatuvakana vushangumukilo vwaco. Lukakateya lunapu lwaluvwa, kutuvakana kulyalesa.

⁹ Kesi uluvale vwasi embwe, omwo vukalu vwakala mu vimbunge vya vilema.

¹⁰ Kesi wihule ngwove, “Omwo vikajo vyuma vyavwaele manene a matangwa a kunima?” Cihula eci kesi ca mana embwe.

¹¹ Munu woshe ayoya napande kupwa muka-mana, co cinapu cacivwa ngwe uje atambula vushwana.

¹² Omwo mana akwasa vanu, co vimbongo lalo vivakwasa, oloni mana anatuvakana vimbongo omwo mana anyunga mwonyo wa uje alinawo.

¹³ Yongola vipangi vya Njambi. Iyajo asa kushungamesa vije vyanapengesa-pengesa Njambi?

¹⁴ A litangwa limo omo umona vyavivwa vwaelela, co omo tuyando twija anuka ngeci, Njambi ikeye natumu vyoshe kuvwaelela na tuyando, kuuzivuka vika vikalingiwa ku simbu ya kulutwe.

¹⁵ Mukuyoya kwange kwangoco njinamono vyoshe, muka-vushunga anyonga na vushunga vwendi, co muka-vuvi ayoya myaka yaingi na vuvi vwendi.

¹⁶ Ngecivene, kesi upwe u muka-vushunga manene, nambe kupwa u muka-kunyanyama manene, omwo vikajo ulinyongesela yove vavenya?

¹⁷ Kesi upwe u muka-vuvi manene, nambe kesi upwe u cilema, omwo vikajo utsila simbu yove kanda yete?

¹⁸ Kesi ukavangeye vyoshe vivali. Nga usingimika Njambi, ukapwa muka-kuhyana mu vyoshe.

¹⁹ Mana aana nzili kuli munu muka-mana, co natuvakana vaka-kushwana likumi va mu nganda.

²⁰ Kukwesi umo ano asi muka-kulinga vya vushunga simbu yoshe uje kesi kulinga vuvi.

²¹ Kesi utolilile ku vyuma vyoshe vije vivendeka vanu, amo ukaziva ngamba yove akushaula,

²² omwo wazivuka mu mbunge yove ngeci nove lalo unakala nakushaula vakweni visimbu vyavingi.

²³ Njapangesele mana ange akwilula vyoshe evi, co njendekele ngwange, “Njikapwa muka-mana,” oloni njonwele.

²⁴ Vatijo munu asa kuwana muwanungulukila mwonyo? Capwa cacikalu manene kucizivisisa.

²⁵ Njalikundikile ku mana nakulilongesa, co njashakele kuwana mana, nakukumbulula ku vihula vyange, nakulilongesa muvwafwa vuvi, na vulema.

²⁶ Co njawanene cuma cimo cakulula manene kutuvakana kutsa cinapu munakazi, cizemo cendi cinapu ngwe nganjo na mavoko endi anapu ngwe malyenge. Oloni uje munu ononoka Njambi asa kucakunukamo, oloni munu uje kononoka atsa mu nganjo eyi.

²⁷ Eyo, muka-kwambulula wendekele ngwendi, “Njawana eci kamandondo-kamandondo simbu njakele nakuvandamena kukumbulula.

²⁸ Eci cikeco cuma ciyashakele mbunge yange manene, oloni kunjaciwanene embwe. Njawanene munalume umo muka-vushunga akati ka vanalume 1,000, oloni akati ka vanu 1,000, kunjawaneneo munakazi umo muka-vushunga.

²⁹ Kenga, njinawana cuma cimo cakupwa ngeci, Njambi watangele yetu vanu kupwa vaka-vushunga, oloni yetu omwo muuka wetu tunashakezeka vingila vyeka vyavivi.”