Muka-kwambulula 5 - Livulu lya Shukulu Kalunga

Kesi ulinge vwasi vikulaeso

¹ Nyanyameni omo muya ku Njuvo ya Shukulu Kalunga, cinapu cacivwa kuya mukulilongesa kutuvakana kukombelela vin̄ombelo ngwe muvakalingi vilema, nameme vakevo kuvalingile vuvi.

² Yongola simbu kanda wendeke, co kesi ulinge vwasi vikulaeso kuli Njambi, omwo Njambi wakala mwilu, co yove uli ano asi, ngecivene, kesi wendeke manene kutuvakana vije viwasa kulinga.

³ Nga simbu yoshe uyongola-yongola a cuma cimo, co cije cuma uyongola ukacilota. Nga wendeka manene, ukendeka vyuma vya vulema.

⁴ Omwo ulisinga cisingo kuli Njambi, kesi wishwale kucilinga. Njambi kesi kuvwaelela na vilema. Linga vije unamukulaesa.

⁵ Mwamuvwa kesi ulisinge, kutuvakana kulisinga, co kuucilingi.

⁶ Kesi utave majwi ove akutwamenene mu vuvi, ngecivene, leka muka-kukombelela wa Njambi ngwove, “Kesi mukemwo njayongwele.” Njambi asa kunyongesa vyuma vyoshe vije wapangelele, ngecivene, kesi wendeke cuma cije ciluvalesa Njambi.

⁷ Vinjozi vyavingi, na majwi amangi, vinapu vyangoco, oloni unapande kusingimika Njambi.

Mwonyo unapu wangoco

⁸ Nga umona tuutu vavayandesa mu lifuti lyeni nakuvavindika vushunga na moko yavo, co kesi ukomoke a vyuma vyangacije, omwo mwata wamundondo vamunyunga kuli mwata wakama, co akamwa yavo kuvali veka lalo vakama vavanyunga.

⁹ Nameme mwene omwo napu mwata wakama, nendi akatambula vukwasi ku mulambu uje vakafwete a mahya.

¹⁰ Uje woshe azema manene vimbongo, kasa kuviwana, uje woshe azema manene vufuko, kasa kuvuwana. Vinapu vyangoco.

¹¹ Omo vufuko vutuma, co vaka-kuvulya vapwa vavangi lalo. Vimbongo vyove kuvyasa kukunenela cuma cimo cacivwa, vanu veka vakalikwasesavyo.

¹² Muka-kupanga nambe alya vyavindondo nambe alya vyavingi asa kulala tulo, oloni muka-kufuka, nambe nakuta kasa kulala tulo omwo visinganyeka vyendi vinapu vyavingi.

¹³ Kuli cuma cimo cacivi cinjinamono ano asi, vanu vasa kukala na vufuko, oloni vuvanenela lika luvinda,

¹⁴ co vuje vufuko vwazimbalele akuvupangesa mu ngila yaivi, co nacimo cai vakele naco cakusezela vana vavo.

¹⁵ Twezile ano asi mushelengwa, co omo tutsa tukapwa lalo va mushelengwa, nacimo cuma tukambata cai ku vije twapangelele.

¹⁶ Eci lalo naco cinapu cuma cacivi! Tukaya ngwe muje vene mutwezile. Vikajo tuwanao akusheka lihunzi?

¹⁷ Matangwa akuyoya kwetu kwoshe apwa a lisusulungu, tulinakumona tuyando twakama, na mishongo, na vukalu.

¹⁸ Kenga, eci cikeco cinjinamono cije cinapu cacivwa ku munu woshe, cinapu kulya nakunwa nakujolela, a vipangi vyetu vyoshe vije vitunapangela ano asi matangwa amandondo akuyoya kwetu aje anatwana Njambi. Evi vikevyo vyashaka Njambi ngeci tuvilinge.

¹⁹ Nga Njambi aana munu vufuko na vivala ngeci munu avwaelele navyo, munu napande kukandelela nakuvwaelela a vije vyanapangela. Evi vinapu vwana vwakutunda kuli Njambi.

²⁰ Omwo Njambi natavesa munu ngeci avwaelele, kakalishoshomwena lalo manene avundondo vwa matangwa endi akuyoya.