Muka-kwambulula 4 - Livulu lya Shukulu Kalunga

Mwonyo unapu wangoco

¹ Asinoni njakengele lalo a vyoshe vya vushunga vije vilinakulingiwa ano asi. Vaka-kuyanda vakele nakulila, co naumo wai wavazembelekele. Naumo wai wavazembelekele, omwo vaje vaka-kuvayandesa vakele na nzili ali vakevo.

² Co njayongwele ngeci vanu vaje vanatsi laja valimwamuvwa manene kutuvakana vanu vaje vacili nakuyoya.

³ Oloni vaje kanda vasemuke, valimwamuvwa manene kutuvakana vaje vanasemuka laja, omwo vaje kanda vasemuke kanda vacimone vyuma vyavivi vije vilinakulingiwa ano asi.

⁴ Asinoni njamwene vanu omo vaundanganene kushaka kukala na vufuko vwavungi kutuvakana vakwavo. Oloni vinapu vyangoco. Vinapu lika ngwe kusheka lihunzi.

⁵ Vilema kuvashaka kupanga, co valanduka ku njala.

⁶ Amo mukemwo, oloni mwamuvwa kukala lika na vyavindondo mu kwoloka kutuvakana kuungama visimbu vyoshe nakupanga na mavoko avali mukusheka lihunzi.

⁷ Njamwene cuma cimo lalo cije capwa cangoco ano asi.

⁸ Kwakele munu uje wayoyele endi lika. Kakele na mwana wa munalume, nambe ndolome, oloni simbu yoshe wakele nakupanga, kapwisilemo vufuko vuje vwakele navwo. Omwo vikajo wakele nakuundanganena manene nakulishuula vavenya ku vyuma vyoshe vyakuvwaelela? Evi vinapu vyangoco lalo, co vinapu vyakukomokesa mukuyoya.

⁹ Vanu vavali vapwa vavavwa kutuvakana munu umo, omwo muvuvali vwavo vasa kupanga mwamuvwa vipangi vyavo.

¹⁰ Nga umo wavo awila asi, co mukwavo asa kumukwasa nakumwindula. Oloni nga munu endi lika awa, cinapu cacivi manene omwo kukwesi umo wakumukwasa ngeci enduke.

¹¹ Co lalo nga vanu vavali valala amolika, co valitwiminina, oloni wasa kulitwiminina vatijo ove lika?

¹² Munu umo asa kukatukila umo weni mukulinga nendi lwozi, oloni kasa kulinga lwozi neni muvavali. Ngwe muvakendeka ngwavo, “Mukole wakuzenga mutatu waukalu kuuvatula.”

¹³ Wasa kupwa mukwenje wa vuutu, oloni nga uli na mana unatuvakana mwene wa mukulunu wa cilema uje kesi kutava kumunangula.

¹⁴ Nameme yove kuwasemukilile ku naanga ya vumwene, oloni unapu u cinzinda nambe kautu, anga vene wasa kupwa mwene.

¹⁵ A simbu imo njamwene vanu voshe va ano asi vakavangeya ntwama wa mukwenje uje washwanene a vumwene.

¹⁶ Vanu vaje vamukavangeyeye vapwile vavangi manene-nene, oloni mu myaka ya kulutwe, naumo wai akavwaelela. Evi vyangoco lalo. Vinapu lika ngwe kusheka lihunzi.