Muka-kwambulula 3 - Livulu lya Shukulu Kalunga

Cuma na cuma cili na simbu yaco

¹ Vyuma vyoshe vili ano asi vili na simbu yavyo ije yanemika Njambi.

² Kuli simbu yakusemuka, na simbu ya kutsa, kuli simbu yakukuna, na simbu yakutukula vivanakunu,

³ kuli simbu yakutsiya, na simbu yakwindula, kuli simbu yakusiwula, na simbu yakutunga.

⁴ Kuli simbu ya vusiwa, na simbu yakujolela, kuli simbu yakulila, na simbu yakukina,

⁵ kuli simbu yakulizema, na simbu yakulizinda, kuli simbu yakulitsemba, na simbu yakujeneka kulitsemba.

⁶ Kuli simbu yakushakezeka vyuma, na simbu yakuvizimbalesa, kuli simbu yakutulika, na simbu yakushandola,

⁷ kuli simbu yakutavula, na simbu yakutonga, kuli simbu ya kwoloka kuluu, na simbu yakusimutwiya.

⁸ Kuli simbu ya cizemo, na simbu ya cizindo, kuli simbu ya nzita, na simbu ya kwoloka.

⁹ Muka-kupanga awanao vikajo akuundangana kwendi?

¹⁰ Njazivuka vitele vyakulema vije vyanatutwiki Njambi.

¹¹ Njambi naaka simbu yaivwa ya vyuma vyoshe. Co lalo nalingisa vanu kuyongola vyuma vya kulutwe, oloni nameme ngoco, munu kasa kuzivuka vije vyanapanga Njambi kutunda akulivanga kweta na ku mamaneselelo.

¹² Njinazivuka ngeci nacimo cacivwa kuli yetu cai, kutuvakana kuvwaelela nakulinga mwamuvwa simbu tuciyoya.

¹³ Omwo vwana vwa Njambi ku vanu vunapu kuvwaelela kuje tuwana mukulya na mukunwa nakuvwaelela lalo kuje tuwana mu vipangi vije tulinakulinga.

¹⁴ Njinazivuka ngeci vyuma vyoshe vije vyakalingi Njambi vikakala ku myaka yoshe. Nacimo cai vakaakelako nameme kutundisako. Njambi nalingi vyuma evi ngeci vanu vamukomoke.

¹⁵ Cuma coshe ciliko lelo na ku san̄ulu kucakele, co cije cikakalako kulutwe, kucakele na ku san̄ulu. Njambi akalingisa cuma cimo ngeci cilingiwe lalo ku simbu na simbu.

Mu kaye kumwesi vushunga

¹⁶ Co njamwene cuma cimo ano asi, mu mutambela wa vushunga, mwakele vuvi, mu mutambela wa vuvi, mwakele vushunga.

¹⁷ Njalyendekesele mu mbunge yange ngwange, “Njambi asompa vaka-vushunga na vaka-vuvi mumolika, omwo vyuma vyoshe na vilinga vyoshe, vikalingiwa a simbu yavyo ivavimikila.”

¹⁸ Njayongwele ngeci ngwange Njambi alinakutwilula kutumwesa ngeci kuma kutwesi na vuvwa kutuvakana tusitu.

¹⁹ Ngeci mwa tusitu, tuyoya, co tutsa, tuvavoshe tunapu mumolika. Voshe vanapu vitanga vyakulifwa. Munu kesi na seo kutuvakana kasitu embwe, omwo mwonyo wapwa wangoco kuli munu na kuli kasitu.

²⁰ Vyuma vyoshe vyakuyoya vikai ku mutambela umolika. Vatutundisile ku livu, co lalo tukeluka ku livu kutwatundile.

²¹ Iyajo asa kuzivuka ngeci mwonyo wa munu uya kwilu nambe mwonyo wa kasitu uya mu livu?

²² Njanangukile ngeci cuma cacivwa cije citwasa kulinga cinapu kulivwaelelesa na vije vitunapangela. Nacimo cai twasa kulinga. Kukwesi ngila itwasa kuzivukila vije vikalingiwa omo tunatsi.