Muka-kwambulula 2 - Livulu lya Shukulu Kalunga

¹ Njalyendekesele mu mbunge, nakweseka kuwana kuvwaelela mukwafwa, oloni njawanene ngeci, neci lalo cinapu cangoco.

² Njendekele ngwange, “Tujolo twapwa vulema. Senga ikwasa vikajo?”

³ Njashakele kuwana vyuma vika vije vinapu vyavivwa kuli yetu mu simbu yaindondo ije tulinayo ano asi. Ngecivene, njayongwele kulivwaelelesa yange vavenya na vinyu ngeci njiwane vati muvwafwa vulema na mana.

⁴ Njapangele vipangi vyakama. Njatungile vinjuvo, co njakunine mikolovozi ya vushuka vwa vinyu.

⁵ Njalimine mahya a vishani na mahya a miti ya vushuka yakuliseza-seza,

⁶ njendile mashali a mema akwitazela ku miti.

⁷ Njalandele vindungo va vanalume na vindungo lalo va vanakazi, co njakele na vindungo vakukitila mu njuvo yange. Njafukile vimuna vavangi kutuvakana vimuna va vanu voshe vaje vakele mu Yelusalema.

⁸ Vimyene va miyati yeka vanjinenelele siliva na ngolinde, na vufuko vwa seo yakama. Vanalume na vanakazi vanjimbilile myaso mukunjitundisa malunge, co njakele na vanakazi vavangi.

⁹ Njapwile nji mwene wakama, kutuvakana vimyene voshe vaje vakele mu Yelusalema, co lalo njakele na mana.

¹⁰ Vyuma vyoshe vinjashakele, njaviwanene. Njalingile senga. Njalyalesele a vyuma vije vinjapangele, co vyoshe evi vyapwile cikandelela cange.

¹¹ Asinoni njayongwele a vije vyoshe vinjalingile, na muje njaundanganene a cipangi cije njapangele, co njamwene ngeci vyoshe vinapu vyangoco. Vinapu lika ngwe kusheka lihunzi, navimo vyai vinjawaneneo ano asi.

¹² Nameme ngoco, mwene asa kulinga lika vije vivalingile vimyene va ku san̄ulu. Ngecivene, njashangumukile kuyongola mukwalumbunukila kukala na mana, na kuzaluka, na vulema.

¹³ Njamwene ngeci mana apwa amavwa kutuvakana vulema, ngwe mutanya wapwa wauvwa kutuvakana lisusulungu.

¹⁴ Vaka-mana vasa kumona kuje valinakuya, co vilema kuvasa kumona kuvaya. Oloni njizivuka ngeci kuvindama kunavandamena yetu voshe.

¹⁵ Njalyendekesele mu mbunge yange ngwange, “Vyuma vije vikalingiwa kuli vilema vikalingiwa kuli yange lalo, vikajo njiwanao akukala na mana angacije?” Co njalikumbulwile yange vavenya ngwange, “Vyuma vyoshe vinapu vyangoco.”

¹⁶ Naumo wai akanuka vaka-mana, co lalo naumo wai akanuka vilema. A matangwa aje alinakwija kulutwe tuvavoshe vakatwivala. Tuvavoshe tukatsa cifwa cimo, vaka-mana na vilema.

¹⁷ Ngecivene, kuyoya kunapu kwangoco kuli yange, omwo vyuma vyoshe vili ano asi vyanjinenela tuyando lika. Co vyuma vyoshe vinapu vyangoco, vinapu lika ngwe kusheka lihunzi.

¹⁸ Nacimo cai cije cinjapangelele cinjawanene cakele na seo kuli yange, omwo njazivukile ngeci njikaciseza kuli uje akanjishwana.

¹⁹ Iyajo azivuka ngeci uje akanjishwana akapwa muka-mana nambe cilema? Oloni ikeye akakala na vyuma vyoshe vije vinjapangelele, vyuma vyoshe vije vinjawanene mu mana ange ano asi. Vyuma vyoshe vinapu vyangoco.

²⁰ Co njaliveyele akuundangana manene na nzili ano asi.

²¹ Omwo munu apanga vipangi vyendi na mana, nakuzivuka, na vutongwe, co aseza vyoshe vije vyanawana kuli munu uje kavipangelele. Eci lalo cinapu cangoco kucavwaele!

²² Munu akawanao vikajo akuundangana kwoshe kuje kwalinakuundangana ano asi?

²³ Matangwa endi oshe, vipangi vyendi vikamunenela vusiwa na tuyando. Nambe ku vutsiki mbunge yendi kuyesi kuhwima. Vyuma vyoshe evi vinapu vyangoco.

²⁴ Kukwesi cuma cacivwa ku munu cije cinatuvakana kulya, nakunwa, nakukala mwamuvwa mu vipangi vyendi. Njazivukile ngeci vyuma evi vinapu vwana vwakutunda kuli Njambi.

²⁵ Kukwesi umo uje avwaelela mukulya nakukala mwamuvwa ngwe yange.

²⁶ Njambi aana mana, nakuzivuka, nakuvwaelela kuli vaje vamuvwaelelesa, oloni akapangesa vaka-vuvi, kuwana nakutulika, ngeci vije vivawana vavyane kuli vaje vamuvwaelelesa. Evi vyoshe vinapu vyangoco, vinapu lika ngwe kusheka lihunzi.