Muka-kwambulula 12 - Livulu lya Shukulu Kalunga

¹ Anuka Ishamatanga wove simbu ucili mukwenje, omo kanda matangwa a tuyando ete, na myaka ya tuyando yete omo ukendeka ngwove, “Kunjawanenemo kujolela mu mwonyo wange.”

² Simbu kanda litangwa na ngonde, na vingongonosi vitsitsivale na mashelwa a nyonzi kuwaketi.

³ Asinoni mavoko ove aje anakunyungile akajaja, co na mendi ove aje anakala na nzili akazeya. Mayo ove kuwakasa kutsakinya vyakulya, mesho ove akatsitsivala kuukamono mwamuvwa.

⁴ Matwi ove kuwakazivi muyoyo wa mu vitapalo. Co kuukazivi muyoyo wa n̄unju ya likina omo itwa nambe omo vaimba myaso, oloni nameme kazila omo aimba, co akakwindula.

⁵ Ukaziva lyova lya mitambela ya malundu, co kwenda kukapwa vushonde kuli yove. Vin̄ambu vyove vikakala na vwele kuukasa kwendangana, co lishungu lyoshe likahwa. Tulinakuya ku mutambela wetu wa mamaneselelo wakuhwimina, co kukakala kulila mu vitapalo.

⁶ Co lilyenge lya siliva likavatuka, na ndeya ya ngolinde ikawa, co ikatsa, mukole wa ku lisima ukashutuka, na njava ya mema ikatsa.

⁷ Mivila yetu ikeluka ku livu, oloni mwonyo ukeluka kuli Njambi uje watwanenewo.

⁸ Vyangoco, vyangoco, ngwendi Muka-kwambulula. Vyoshe vinapu vyangoco.

Mamaneselelo a vin̄anda

⁹ Oloni omwo Muka-kwambulula wapwile muka-mana, walongesele vanu vije vyazivukile. Ikeye walilongesele visimo, co welwile vushunga vwavyo.

¹⁰ Muka-kwambulula wesekele kuwana majwi akuzembeleka, oloni majwi asonekele apwile a kulongwa.

¹¹ Visimutwiya vya vaka-mana vinapu ngwe viti vyakushongomoka vije vivakalikwasesa tunyungi mukutwamenena vimanga, co visimo vyoshe vinapu ngwe vimbambo vyakupameyeya manene. Njambi Kanyungi ketu tuvavoshe ikeye natwana evi visimo.

¹² Munange, kuli cuma ceka cakukengelela. Kukwesi mamaneselelo akusoneka malivulu, co lalo kulilongesa manene cikakujukisa.

¹³ A vyoshe evi kuli cuma cimolika cakwendeka, cikeco eci, singimika Njambi, co ononoka mashiko endi, omwo evi vyoshe vikevyo vivatangelele munu.

¹⁴ Njambi akasompa vyuma vyoshe vije tulinakulinga, nambe vyavivwa, nambe vyavivi, nameme vene vyuma vije vyakulingila mu vushweke.