Muka-kwambulula 11 - Livulu lya Shukulu Kalunga

Vije vyanapande kulinga munu wa mana

¹ Pangesa vimbongo vyove mu vipangi vyakulanda nakulandulula, co a litangwa limo ukawanao vimo.

² Aka vyove vije ulinavyo mu mitambela yakuliseza-seza, omwo kuuzivuka litangwa lije tuyando tukwizila.

³ Kuje kuwila muti kukekwo vene kuukalala. Omwo mashelwa anatimiiya, co nyonzi inyoka.

⁴ Nga uvandamena lihunzi kuukakunu, co uje avandamena mashelwa kakateje.

⁵ Naumo wai azivuka vati mwana akahwimi omo ali mwimo, ngecivene, naumo wai azivuka vipangi vya Njambi uje watangele vyuma vyoshe.

⁶ Kuna mbuto yove mutondo, co twalao nakupanga noo cingwezi. Iyajo azivuka? Amo vipangi vyove vikapwa vyakuvezika, na vimbuto vyove vikamena nakwima vyakulya.

⁷ Ceke cinapu cacivwa, co mbunge ivwaelela a kumona litangwa.

⁸ Kandelela a mwaka na mwaka omwo ulinakuyoya, nambe uyoya simbu yakama, anuka ngeci ukatsa. Kukwesi cuma cimo ciwukakengelela kulutwe.

Kunangula vakwenje

⁹ Vakwenje vwaeleleni a vukwenje vweni, pweni vaka-kuvwaelela simbu mucili mu vakwenje. Lingeni vyoshe vimushaka kulinga, co kaveni mashungu a vimbunge vyeni. Oloni anukeni ngweni, Njambi akamisompa a vije vyoshe vimulinakulinga.

¹⁰ Kesi mulishoshomwene mu vimbunge vyeni, nambe kuvavalesa vimbunge vyeni, omwo simbu ya vukwenje vweni inapu yaindondo.