Muka-kwambulula 1 - Livulu lya Shukulu Kalunga

Mwonyo unapu wangoco

¹ Awa akewo majwi a muka-kwambulula, muna Ndaviti, uje wapwile mwene mu Yelusalema.

² Muka-kwambulula ngwendi vinapu vyangoco-ngoco, vyuma vyoshe vinapu vyangoco.

³ Vikajo vyawanao munu a vipangi vyoshe vije vyalinakuundangana ano asi?

⁴ Visemwa viija, co visemwa viya, oloni kaye anga vene kakala myaka yoshe.

⁵ Litangwa lituuka, co lalo lilauka, lizambwila vwasi-vwasi ku mutambela walyo kuje kulikatuukila.

⁶ Lihunzi lihuwila ku mbwela, na ku kunto, lilizenga noku-noku, kwoshe-ikwoshe.

⁷ Vindonga vyoshe vikatwala mema avyo ku mema a kalunga, oloni mema a kalunga kuwesi kushula embwe. Mema eluka kuje kuyashangumukila ndonga, co ashangumuka kwita lalo.

⁸ Vyuma vyoshe vijukisa, vyuma vije munu kasa kwambulula. Mesho etu kuwesi kukuta na vyuma vyakumona, na matwi etu kuwesi kushula na vyuma vyakuziva.

⁹ Vije vyakeleko akulivanga vikakalako lalo kulutwe. Vije vyalingiwile laja vikalingiwa lalo kulutwe. Kukwesi cuma caciha ano asi.

¹⁰ Munu umo asa kwendeka ngwendi, “Kengeni cuma eci caciha!” Oloni cuma eci cakeleko laja ku san̄ulu simbu kanda tusemuke.

¹¹ Naumo wai asa kwanuka vyuma vije vyalingiwile ku san̄ulu, ku matangwa a kulutwe naumo wai akanuka vyuma vije vilingiwa ololo, na vyuma vije vikalingiwa kulutwe.

Vije vyamwene muka-kwambulula

¹² Yange muka-kwambulula, njapwile mwene wa Isalele mu Yelusalema.

¹³ Na mana ange oshe, njesekele kwilula nakulilongesa vyuma vyoshe vije vilingiwa muno mu kaye. Njambi nakaluwisa vyuma evi ngeci yetu vanu kesi tuzivisise.

¹⁴ Njinamono vyuma vyoshe vyalingiwa ano asi, kengeni, vyuma vyoshe vinapu vyangoco. Cinapu lika ngwe kusheka lihunzi.

¹⁵ Kuwasa kushungamesa cuma cije ca kupenga-penga, co lalo kuwasa kulava vyuma vije kuvyesiko.

¹⁶ Njalyendekesele mu mbunge yange ngwange, “Njili na mana manene kutuvakana voshe vaje vashwanene mu Yelusalema. Njili na cizango cakulilongesa, co njalilongesa vyuma vyavingi.”

¹⁷ Njayongwele kulilongesa ngeci njangunune kuzivisisa na vulema, mana na vuzaluke. Oloni njacimwene ngwange cinapu lika ngwe kusheka lihunzi.

¹⁸ Kukala na mana manene kunena kulinyenga, uje ali na mana manene vusiwa lalo kuli ikeye vupwa vwakama.