Mika 6 - Livulu lya Shukulu Kalunga

N̄anda ya Shukulu Kalunga na Isalele

¹ Tolilileni ku vije vyendeka Shukulu Kalunga ngwendi, “Katuka, endeka n̄anda yove ku munkinda, co malundu azive vije viwendeka. Tavesa minkinda na malundu vazive vije viwendeka.

² “Yeni minkinda, yeni luvula lwa ku myaka yoshe lwa asi, tolilileni ku n̄anda ya Shukulu Kalunga! Shukulu Kalunga ali na n̄anda na vanu vendi. Akasompesa Isalele.”

³ Co Shukulu Kalunga wehwile ngwendi, “Vanu vange, vikajo njinalingi kuli yeni? Mu cifwa mukajo njinapu citele kuli yeni? Njikumbululeni.

⁴ Njamitundisile mu Ingito, nakumipatula mu vundungo. Njatumine Mosesa, na Alone, na Milyamu mukumitwamenena.

⁵ Vanu vange, anukeni vije vyayongwele kulinga Mwene Mbalake wa Mowavi kuli yeni, na muje mwamukumbulwile Mbalame muna Mbeole. Anukeni vyuma vije vyalingiwile a ngila mukutunda ku cilombo ca Shitime nakweta ku Ngilingale. Anukeni vyuma vije, co mukananguka vije vinjalingile mukumyamena.”

Vije vyashaka Shukulu Kalunga

⁶ Vikajo vinjikatwala kuli Shukulu Kalunga Njambi wa mwilu, omo njiya nakumulemesa? Kuma njasa kutwala vana va vingombe vavavwa manene mukwenyeka kupwa vin̄ombelo kuli ikeye ndi?

⁷ Kuma Shukulu Kalunga akavwaelela nga njimutwalela vimanga vavangi-vangi nameme mazi amangi a olive a kuhwa? Kuma njasa kumwana munange wa ntwatwa kupwa n̄ombelo yakufweta vuvi vwange ndi?

⁸ Embwe, Shukulu Kalunga natuleke vije vyavivwa vyashaka kuli yeni vikevyo evi, kulinga vije vya vushunga nakumwesa cizemo cije kucesi kutenguluka nakuyoya mu kulitombola na kulikeesa kuli Njambi yeni.

⁹ Cinapu cuma ca mangana kukomoka Shukulu Kalunga. Alinakutambeka ku nganda ngwendi, “Tolilileni yeni vanu vaje vanalikungulwila mu nganda!

¹⁰ Mu vinjuvo vya vaka-vuvi muli vufuko vuje vawanene akujeneka kulongwa. Veseka seteko ya makuli, cuma cije cinjazinda.

¹¹ Vatijo njasa kusambesa vanu vaje vapeselesa vipeseleso vya makuli na vulemu vwa makuli?

¹² Vaka-kufuka veni va mu nganda valinakukwisa tuutu, co muvavoshe munapu vaka-makuli.

¹³ Ngecivene, njinashangumuka kumilwisa na vin̄ome nakuminyongesa omwo ya vuvi vweni.

¹⁴ Mukalya, oloni kumukakuta. Co simbu yoshe mukakala na njala. Mukatulika vyuma, oloni kumukasa kuvinyunga, coshe cimukatulika njikacinyongesa mu nzita.

¹⁵ Mukakuna vimbuto, oloni kumukaviteje. Mukakamuna mazi ku olive, oloni kumukaavwava. Mukalinga vinyu, oloni kumukavinu.

¹⁶ Eci cikalingiwa omwo munakavangeya vilinga vyavivi vya Mwene Omeli, na munendi Mwene Ahave. Munakavangeya mashiko avo, ngecivene, njikaminyongesa. Co vanu voshe vakamishaula. Vanu vange vakamishaula kwoshe-ikwoshe.”