Mika 5 - Livulu lya Shukulu Kalunga

¹ Vanu va mu Yelusalema, kungululeni mashwalale veni! Vanatuzengeleka! Valwisa ntwama wa Isalele!

Njambi akulaesa muka-kushwana kutunda ku Mbetelehema

² Shukulu Kalunga alinakwendeka ngwendi, “Yove Mbetelehema Efaleta yove wapwa uwamundondo akati ka vinganda vya mu Yunda, oloni kuli yove kukatunda muka-kushwana Isalele, uje naanga yendi yakeleko tunde ku san̄ulu.”

³ Ngecivene, Shukulu Kalunga akana vanu vendi mu mavoko a vitozi vavo noo munakazi uje nakiti munendi wa munalume. Asinoni vavushoko vwendi vaje vasalele mu vunzinda vakeluka nakulipandakana na vaIsalele.

⁴ Omo akaija, akashwana vanu vendi na nzili yakutunda kuli Shukulu Kalunga na vukama vwavavenya Shukulu Kalunga Njambi. Vanu vendi vakakala mu kwoloka omwo vanu va mu kaye mwoshe vakamona vukama vwendi,

⁵ co ikeye akanena kwoloka. Omo vaAsilya vakazengeleka lifuti lyetu nakuvujula vivumbe vyetu, co tukalanya vantwama vetu va nzili ngeci vakuvalwise.

Kwamena na cihiso

⁶ A nzili ya vitwa vakafungulula Asilya, na lifuti lya Nimelonde, co vakatwamena kuli vaAsilya omo vakovela mu lifuti lyetu.

⁷ Vanu va Isalele vaje vasaleleo vakapwa ngwe lime lyakutunda kuli Shukulu Kalunga lya a miyati yoshe ya vanu, ngwe nyonzi ya vusuku-mbundu ya a vimena. Vakakenga lika kuli Njambi, kesi kuli munu.

⁸ Co vaje vasaleleo vakapwa akati ka miyati ya vanu ngwe ndumba ashakezeka tusitu mu shwata nambe ngwe ndumba ali akati ka vimanga, avakwata, co avasanyozola vimbazuvwila-vimbazuvwila, co kukwesi umo akavamena.

⁹ Isalele akafungulula vitozi vendi nakuvanyongesa voshe njwa.

¹⁰ Shukulu Kalunga alinakwendeka ngwendi, “A litangwa lije njikambata tuvalu tweni nakunyongesa matemba eni.

¹¹ Njikanyongesa vinganda vya mu lifuti lyeni nakusiwula vimpaka vyeni vyoshe.

¹² Njikanyongesa vyemba vyeni, co kumukakala lalo na vimbanda.

¹³ Njikanyongesa tumponya tweni na vimanda vyeni vya mamanya vyakujela, co kumukalemesa lalo vyuma vije vimukapanga.

¹⁴ Njikasiwula vimweso vya Ashela njambi wa munakazi mu lifuti lyeni nakunyongesa vinganda vyeni.

¹⁵ Co mu vukalu vwange vwakama njikalinga shambandinga miyati yoshe ya vanu vaje kuvanjononokele.”