Mika 3 - Livulu lya Shukulu Kalunga

Mika avayesa vantwama va vaIsalele

¹ Tolilileni yeni vaka-kushwana va Isalele! Munapande kuzivuka vushunga,

² oloni mwazinda vije vyavivwa nakuzema vije vyavivi. Mujuva vanu vange oku vaciyoya nakuvajamozola mishuni a vitsiya vyavo.

³ Mulya situ ya vanu vange. Mujuva cikonde cavo, mupokozola vitsiya vyavo vipazu-vipazu, nakuviteleka ngwe situ ya mu ndeo.

⁴ Simbu ilinakwija omo mukalilila kuli Shukulu Kalunga, oloni kakamikumbulula, kakatolilila ku malombelo eni, omwo munalingi vuvi.

⁵ Vanu vange vanavakwisa kuli vaka-kwimanena vaje vakulaesa kwoloka kuli vaje vavafweta, oloni vambulula muzimbu wa nzita yakujujwisa kuli vaje vajeneka kuvafweta. Shukulu Kalunga alinakwendeka kuli ava vaka-kwimanena ngwendi,

⁶ Vaka-kwimanena, litangwa lyeni ololo lihwa, litangwa lilinakumitokela. Omwo mulinakutanganesa vanu vange, co kumukakala na vimona vya vuka-kwimanena, co kumukasa kuumikiya cuma cai.

⁷ Vaje vakomikiya vya kulutwe vakashauka akwonwa kumona vivomikiiye. Voshe vakavaya omwo Njambi kakavakumbulula.

⁸ Oloni ngeci mwange, Shukulu Kalunga nanjishulisa na munzinzime wendi na nzili yendi, nakunjana mana a vushunga nakusimpa mukuleka vanu va mu Isalele vuvi vwavo muvwafwa.

⁹ Njitolilileni, yeni vaka-kushwana va Isalele, yeni vaje vazinda vushunga nakutengulukila ku vuvi.

¹⁰ Mulinakutunga nganda ya Njambi, Yelusalema a luvula lwakulitsiya vushunga.

¹¹ Vaka-kushwana nganda vashika na mazika-kanwa, vaka-kukombelela vanungulula Mashiko na fweto, co vaka-kwimanena vambulula vya vuka-kwimanena na vimbongo. Oloni vanajendamena ali Shukulu Kalunga omo vendeka ngwavo, “Shukulu Kalunga ali netu. Nacimo cuma cacivi cai ciija kuli yetu.”

¹² Ngecivene, omwo yeni, Siyone vakailima ngwe lihya, co Yelusalema ikemuka numbo ya vivumbe, na lilundu lya Njuvo ya Shukulu Kalunga likemuka shwata.