Mika 2 - Livulu lya Shukulu Kalunga

Vwana vwa vaje vaka-kuyandesa tuutu

¹ Cikapwa cacikalu manene kuli vaje vatumba matumbe amavi oku vanalala. Omo kukya mutondo, vwasi-vwasi omo vanawana simbu, co valinga vuvi vuje vuvanayongola.

² Omo vashaka mahya, co vawambata, omo vashaka vinjuvo, co vavitunga. Naimo naanga ya munu nambe cuma cili mwamuvwa cai.

³ Ngecivene, Shukulu Kalunga alinakwendeka ngwendi, “Njilinakuyongola kunena tuyando twakama ali yeni, co kumukasa kuvanda embwe. Mukakala mu vukalu, co kumukende na kulyalesa lalo.

⁴ Omo ije simbu iketa, vanu vakendeka majwi amavi ali yeni kupwa cimweso ca tuyando twakama, co vakaimba mwaso uje wa vusiwa ali yeni ngwavo, ‘Tunanyongo njwa! Shukulu Kalunga natutambula lifuti lyetu nakulyana kuli vaje vatukwatele vunzinda.’ ”

⁵ Ngecivene, omo simbu ikaija yakwilwisila vanu va Shukulu Kalunga lifuti lyavo, co kukukakala mutambela weni.

⁶ Vanu vakanjambulwila nakwendeka ngwavo, “Kesi utwambulwile. Kesi utwambulwile ovyo vyoshe. Njambi kakatuzivisa shwamwa embwe.

⁷ Kuma mwayongola ngeci vanu va mu Isalele vali mu cisingo ndi? Kuma Shukulu Kalunga kasa kuvandamena ndi? Kuma asa kulinga vyuma vyangacije ndi? Kuma kesi kwendeka mwamuvwa kuli vaje vaka-kulongwa ndi?”

⁸ Co Shukulu Kalunga wakumbulwile ngwendi, “Munalwisa vanu vange ngwe vitozi. Mwambata tupote kujeneka mema ku mbunge kuli vaje vaita omo veluka ku nzita.

⁹ Musheka vanakazi va vanu vange a membo avazema, co munevi vana vavo vavivezikiso vyange ku myaka yoshe.

¹⁰ Katukeni muye, kukwesi mwamuvwa lalo kuno embwe. Vuvi vweni vunaviisa uno mutambela nakuunyongesa woshe njwa.

¹¹ “Ava vanu vashaka muka-kwimanena uje wa vishaki na makuli, nakwendeka ngwendi, ‘Njambulula ngeci vinyu na vwala vikamitumina!’

¹² “Oloni njikamikungulwila amolika, yeni vanu voshe va mu Isalele vaje vanasalao. Njikamikungulwila amolika ngwe vimanga veluka ku vutanga. Ngwe vulilo vunashulu na vimanga, lifuti lyeni likakala na vanu vavangi.”

¹³ Njambi akavashokolwela ngila, nakuvatwamenena kutunda mu vunzinda. Co vakatavozola vikolo vya nganda nakuliila ngoco. Mwene wavo, Shukulu Kalunga akavatundisamo.