Mbimbi 5 - Livulu lya Shukulu Kalunga

Lilombelo lya mema ku mbunge

¹ Yove Shukulu Kalunga anuka vije vinalingiwa kuli yetu. Kenga ali yetu, co mona kushauka kwetu.

² Vufuko vwetu vuli mu mavoko a vangenzi, co vaka-kwija valinakuyoyela mu vinjuvo vyetu.

³ Vitozi vanatsii vatatetu, co ololo vananetu vanapu vifwile.

⁴ Tunapande kufweta mema tulinakunwa, co tunapande kulanda vitale vyakwota vije tunajeneka.

⁵ Valinakutwendesa manene ngwe vimulu nambe ngwe tumelo, tunajuka manene, oloni nalumo lwai vatutavesa kuhwima.

⁶ Akuwana vyakulya vyakupwisamo ngeci tuyoye, twile nakuvilomba ku Ingito na ku Asilya.

⁷ Vakukulwila vetu valingile vuvi, oloni ololo voshe vanatsi, co ololo tulinakuyanda omwo vuvi vwavo.

⁸ Vindungo valinakutushwana, co naumo wai asa kutupatula ku nzili yavo.

⁹ Vaka-kutsiya valinakuyambangela mwaya lifuti mwoshe, myonyo yetu ili mu vushonde omo tuya mukushakezeka vyakulya.

¹⁰ Njala inatunenela mushongo wa lusike, co cikonde cetu cishaluka manene ngwe tuhya.

¹¹ Vawisile vanakazi amolika na vambanda va mu vinganda vya mu Yunda nakulinga navo vuvi a munkinda wa Siyone.

¹² Vantwama vetu vanavatwala mukuvashukika, co tukulukazi vetu kuvesi nakuvasingimika.

¹³ Vakwenje vetu valinakuvasindiya kutwa tiliku ngwe vindungo, vanike va vanalume valinakupelyangela na vitele vyakulema vya vitale.

¹⁴ Tukulukazi lalo kuvesi na simbu yakutumbama ku cikolo ca nganda, co matukuka a vakwenje kuvesi na simbu lalo yakwimba myaso.

¹⁵ Kuvwaelela kunatundu mu vimbunge vyetu, co kuviilila kukekwo kunengi mu mwela wakulisamba.

¹⁶ Nacimo cuma cinasalao lalo cai ku vije twalyalesele navyo. Twalingile vuvi, co ololo tunanyongo.

¹⁷ Tulinakuvinja mukati ka vimbunge vyetu, co kutwasa kumona omwo misozi.

¹⁸ Omwo Munkinda wa Siyone uli mwawo lika mu ngundu, co vimbanje lika valinakwendelamo.

¹⁹ Oloni yove Shukulu Kalunga, wapwa u mwene ku myaka yoshe, co ukashwana kutwala na ku shongo ya myaka.

²⁰ Omwo vikajo unatusezela ngacije simbu yakama? Kuma kuukatwanuka lalo ndi?

²¹ Shukulu Kalunga twilwisile kuli yove! Co tukeluka! Twilwisile lalo vumpau vwetu vwalaja.

²² Indi unatuvyana vene ku myaka yoshe ndi? Kuma kukwesi naa asikisila kuluvala kwove ndi?