Mbimbi 4 - Livulu lya Shukulu Kalunga

Munima yakuwa kwa Yelusalema

¹ Vuvwa vwa ngolinde yetu yakuvyazima vunahu, mamanya a Njuvo ya Shukulu Kalunga anashandokela mu vitapalo mwoshe.

² Vakwenje va Siyone vapwile va seo yakama kuli yetu ngwe ngolinde, oloni ololo valinakuvapangesa ngwe vindeo vyangoco vya vuma.

³ Nameme vaina ya vana va vimbanje akalele mwamuvwa vana vendi, oloni vanu vange vanapu ngwe vanavilanda, vali na muuka kuli vana vavo.

⁴ Vecelela vana vavo kulanduka ku njala na kutsa ku lihwila, vanike valinakulomba vyakulya oloni naumo wai avanavyo.

⁵ Vanu vaje vakele nakulya vyakulya vyavivwa valinakulanduka ku njala mu vitapalo, vanu vaje vayoyele kuyoya kwakuvwa, valinakushakezeka vyakulya mu vimbulu vya mazilo.

⁶ Vanu vange vanavanyanyamesa manene kutuvakana vuvi vwa Sondoma, nganda ije yanyongele na nzili ya Njambi.

⁷ Vana va vimyene vetu va vanalume kuvapwile vaka-kujwala embwe, oloni vapwile vakutoka to ngwe mavele, vakele na nzili, co lalo vapwile vakutakama, nakuvyazima navukangule.

⁸ Ololo vanavevala mu vitapalo kujeneka kuvazivuka, vihanga vyavo vinazivala vwi, co vikonde vyavo vinominina a vitsiya vyavo cau ngwe viti.

⁹ Vaje vatsililile mu nzita vatsile mwamuvwa kutuvakana vaje vanatsi kukotokela, vaje valandukile ku njala noo vatsile omwo vajenekele vyakulya vyakuvayoyesa.

¹⁰ Tuyando twakama tuje twezile ali vanu vange twavanenelele tuyando twakukomokesa, visemi va vanakazi vatelekele vana vavo kupwa vyakulya vyavo.

¹¹ Shukulu Kalunga wecelele vukalu vwendi vwakama, washwamekele tuhya a Siyone tuje twayenyekele yoshe njwa.

¹² Naumo wai kwoshe-ikwoshe nambe ku vaka-kushwana va miyati yeka wakulaelele ngeci vitozi vasa kutuva nakukovela mu vikolo vya Yelusalema.

¹³ Oloni eci calingiwile, omo vaka-kwimanena va mu Yelusalema valingile vuvi, co vaka-kukombelela vamwo vakele na mulonga wakunena kutsa kwa vanu vakujeneka mulonga.

¹⁴ Co vantwama vendi vakele nakwendangana mu vitapalo ngwe tupuputwa. Valijwalesele na maninga, co naumo wai wasele kuvakwata.

¹⁵ Vanu vatambekele ngwavo, “Tundeni kuli yetu! Munalijwalesa kesi mutukwate!” Ngecivene, vakele nakwendangana kutunda ku lifuti limo, nakuya ku lifuti likwavo, oloni naumo wai wavatambwile.

¹⁶ Shukulu Kalunga kombileko mbunge lalo kuli vakevo, ikeye vavenya wavashandwele. Kasingimikile nameme vaka-kukombelela vetu, nambe vantwama vetu.

¹⁷ Twakengelelele vukwasi kwija kuli yetu noo twajukile kukengelela. Twakengelelele ngeci tumone vukwasi vutunda ku muyati umo wa vanu, oloni muyati wa vanu naumo wai watwanene vukwasi.

¹⁸ Vitozi vakele nakutukengelela, oloni kutwasele nameme kwenda mu vitapalo. Matangwa etu ahwile, co twetele ku shongo yawo.

¹⁹ Vaka-kutukava vatushekele vwasi kutuvakana vingonga vakupulula. Vatukavele mu malundu, nakutukwatela mu mambo cishitumukila.

²⁰ Co vafungulwile nsina yakuyoya kwetu, ikeyo mwene uje yaangwile Shukulu Kalunga, uje itwakulaelele ngwetu akatunyunga kuli voshe vatukovelela nakutulwisa.

²¹ Yeni vanu va Endome na Uze, joleleni, vwaeleleni mwoshe mumunashakela. Neni lalo tuyando tweni tulinakwija, neni lalo mukapelyangela mushelengwa na shwamwa.

²² Siyone natambula fweto yendi ya vuvi, co Shukulu Kalunga kakavatumbika lalo mu vunzinda embwe. Oloni Endome, Shukulu Kalunga akakunyanyamesa nakusholola milonga ya vilinga vyove.