Mbimbi 3 - Livulu lya Shukulu Kalunga

Kunyanyamesa nakutenguluka na cinyangavili

¹ Yange njizivuka mucapwa kunyanyamesa ca Njambi.

² Wanjishekele nakunjikovelesa mu lisusulungu,

³ co wanjipupile kwilukilamo nakwilukilamo lalo kujeneka kunjizivila mema ku mbunge.

⁴ Wasezele muvila wange na cikonde cange mikiki mikiki, napokozola vitsiya vyange.

⁵ Nanjishokela mu kamenga kakukaluwa na tuyando.

⁶ Nanjisindiya kukala mu lisusulungu lya kutsa, ngwe munu uje watsile laja.

⁷ Nanjikutu mu malyenge, co njinapu nji cinzinda, kunjesi lalo na cinyangavili cakuputumukamo cai.

⁸ Njilinakuteta nakutambeka ngeci vanjikwase, oloni Njambi shendi kunjitolilila

⁹ Njipelyangela omo njenda, co vivumbe vya mamanya vinanjizikinina kwoshe kunjitengulukila.

¹⁰ Vilinakunjivandela ngwe mbeya nakunjijombokela ngwe ndumba.

¹¹ Wanjishekele kunjitundisa mu tapalo, nakunjisanyozola vipuka-vipuka, co wanjisezele mbwa.

¹² Wananele vuta vwendi vwa lusipa ngeci njipwe cimango ca mikili yendi.

¹³ Washele manene mikili yendi a muvila wange nakuyikovelesa manene.

¹⁴ Vanu valinakunjijola litangwa lyoshe, co yange njinapu cuma cakujolesa kuli vakevo voshe.

¹⁵ Wanjisindiiye kunwa vyakulula nakunjilisa vyakulya na vyakunwa vyakulula.

¹⁶ Wakwitiiye cihanga cange asi nakunjisindiya ngeci njilye mamanya.

¹⁷ Co njinevala muvwafwa vukangule, kwoloka nakuvwaelela.

¹⁸ Kunjesi na simbu yakama yakuyoya lalo yai, cinyangavili cange muli Shukulu Kalunga cinahu.

¹⁹ Viyongola vyakukemanga kwange, na vulika vwange vilula ngwe mwaze.

²⁰ Njilinakuviyongola simbu yoshe, ngeci mwonyo wange unazeye.

²¹ Oloni cinyangavili ciiluka omo njanuka cuma cimolika cikeco eci.

²² Cizemo ca Shukulu Kalunga cije kucesi kutenguluka na mema ku mbunge yendi, kuvyesi kuhwa embwe,

²³ Vyapwa vyaviha mutondo na mutondo, kulongwa kwove Shukulu Kalunga, kwapwa kwakama manene.

²⁴ Shukulu Kalunga lika ikeye njishaka, muli ikeye njinaka cinyangavili cange.

²⁵ Shukulu Kalunga wapwa wamuvwa kuli voshe vaje vamukulaela,

²⁶ ngecivene, cinapu cacivwa kuli yetu kumuvandamena nakusimpa ngeci atwamene.

²⁷ Co lalo cinapu cacivwa kuli yetu a simbu ya vwanike vwetu, kulilongesa kusimpa eci.

²⁸ Omo tulinakuyanda, tunapande kutumbama mwetu lika mukusimpa ca kwoloka,

²⁹ tunapande kukulama nakwononoka, amo kucili cinyangavili.

³⁰ Nambe valinakutupupa nakututuka oloni tunapande kuvitambula vyoshe.

³¹ Shukulu Kalunga muka-mema ku mbunge kasa kutumbila kuti ku myaka yoshe embwe.

³² Nameme atunenela vusiwa, oloni cizemo cendi ali yetu mwa vushunga anga cili na nzili.

³³ Nalumo lwai avwaelela mukutuyandesa nambe kutuzivisa kuvavala.

³⁴ Shukulu Kalunga azivuka omo minzinzime yetu valinakuyiyandesa mu kamenga,

³⁵ azivuka omo vatuvyanena vushunga vuje vwatwanene,

³⁶ omo vavindika kusompa mwa vushunga mu mbanja, ikeye avizivuka vyoshe evi.

³⁷ Naumo wai asa kulinga cuma cimo kwakujeneka cizango ca Shukulu Kalunga.

³⁸ Vuvwa na vuvi vyoshe vilingiwa akushika kwa Shukulu Kalunga.

³⁹ Vikajo tulinakulinyenyetela omo Shukulu Kalunga atunyanyamesa omwo vuvi vwetu simbu tucili nakuyoya?

⁴⁰ Twiluleni vingila vyetu yetu vavenya nakwiluka kuli Shukulu Kalunga.

⁴¹ Tushokololeni vimbunge vyetu kuli Njambi wa mwilu nakumulomba ngwetu,

⁴² “Tunalingi vuvi nakukutengulukila, co yove Shukulu Kalunga, kuwatusambesele embwe.

⁴³ “Mu vukalu vwove watushekele nakututsiya kujeneka kutuzivilako mema ku mbunge.

⁴⁴ Walifwika mu lishelwa lyakama manene ngeci malombelo etu kuwasa kweta kuli yove.

⁴⁵ Unatava miyati yeka kutupangesa ngwe lishito lyakukombela.

⁴⁶ “Vitozi vetu voshe valinakututuka nakutushendumuna.

⁴⁷ Tunakala mu tuyando twakama nakunyonga, co tulinakuyoya mu vushonde na mu lyova.

⁴⁸ Mesho ange alinakwita misozi ngwe vana va vindonga vya mita akunyonga kwa vanu vange.

⁴⁹ “Misozi yange ilinakwitika kujeneka kulikela ngwe muna ndonga,

⁵⁰ noo Shukulu Kalunga nakenge ano asi oku ali mwilu nakutukwasa.

⁵¹ Mbunge yange ili na vusiwa omo njamwene vije vyalingiwile kuli vanakazi va mu nganda.

⁵² “Vitozi vanjikwatele ngwe kazila kwakujeka mulonga wakunjizindila.

⁵³ Vanjumbilile mu mbulu vutona, nakushoka ku cikolo na limanya.

⁵⁴ Mema ashangumukile kunjifwika, co njayongwele ngwange kutsa kuli muyehi nange.

⁵⁵ “Omo njakele mwisi yaije mbulu, njatambekele kuli yove Shukulu Kalunga.

⁵⁶ Omo njakulambelelele ngeci utolilile ku mutambi wange, co yove wanjizivile.

⁵⁷ Wanjikumbulwile nakunjileka ngeci kesi njizive lyova.

⁵⁸ “Shukulu Kalunga wezile nakunjipatula, co waamenene mwonyo wange.

⁵⁹ Njisompe mwamuvwa, yove uzivuka vivi vije vivanalingi kuli yange.

⁶⁰ Uzivuka muje vitozi vange muvanjizindila, na muje muvakanjitumbila vutumbe vwakunjilwisa.

⁶¹ “Yove Shukulu Kalunga wavazivi muvali nakunjituka, uzivuka matumbe avo oshe.

⁶² Litangwa lyoshe vendeka lika vya ali yange nakuyongola viyongola vyavo.

⁶³ Tunde mutondo kweta ku vutsiki vashendumuna lika yange.

⁶⁴ “Yove Shukulu Kalunga, vanyanyamese a vije vanalingi,

⁶⁵ vasinge nakuvajenekesa cinyangavili!

⁶⁶ Yove Shukulu Kalunga, vasheke na vukalu nakuvanyongesa ano a kaye!”