Mbimbi 2 - Livulu lya Shukulu Kalunga

Cihiso ca Shukulu Kalunga a Yelusalema

¹ Shukulu Kalunga mu vukalu vwendi, nafwiki Siyone na lisusulungu. Nawisila asi vuvwa vwa Isalele nakuvupwisa vwangoco. A litangwa lya vukalu vwendi Shukulu Kalunga wasezele nameme vene Njuvo yendi.

² Shukulu Kalunga wanyongesele membo oshe a mu Yunda kujeneka mema ku mbunge, co mu vukalu vwendi wasiwile vimpaka vije vyanyungile lifuti, wazivisile shwamwa vumwene na vaka-kushwana vavwo.

³ Mu vukalu vwendi wavindikile nzili ya Isalele, wavyanene kutukwasa omo vitozi vatulwisile. Waluvalele netu ngwe tuhya tuje tunyongesa vyuma vyoshe.

⁴ Wananele mikili yendi ali yetu ngwe citozi, ikeye watsiile voshe vaje twavwaelelele nakujolela navo. Twazivile vukalu vwendi ngwe tuhya muno mu Yelusalema.

⁵ Shukulu Kalunga nanyongesa Isalele ngwe citozi, naseza vimpaka vyendi na mapela endi mu ngundu. Nanena vusiwa vwa myaka yoshe, ali vanu va mu Yunda.

⁶ Wapujwile Njuvo yendi vimbazuvwila-mbazuvwila muje twakele nakumulemesela. Ikeye namanesa matangwa akujela na Matangwa Akuhwima. Mu vukalu vwendi vwakama wavyanene mwene, na muka-kukombelela.

⁷ Shukulu Kalunga wasezele mutula wendi, nakuseza lalo Njuvo yendi yakujela, ikeye watavele vitozi kusiwula vivumbe vyayo. Vitozi valingile muyoyo mu Njuvo ya Shukulu Kalunga, ngwe a litangwa lya ciwano.

⁸ Shukulu Kalunga washakele ngeci vivumbe vya Siyone viwe, ikeye wavisetekele ngeci vinyonge. Tuposhi na vivumbe vilinakulila nakujaja ngwe vanu.

⁹ Vikolo vinanyongo mu livu, mikambo yavyo yoshe inatsenozoka. Mwene na vanu va vulemu ololo vali mu vunzinda. Ololo naumo wai lalo alongesa mashiko, co vaka-kwimanena kuvesi na vimona lalo vyakutunda kuli Shukulu Kalunga.

¹⁰ Vakulunu va mu Yelusalema vanatumbama asi kuluu, vanalishuwila livu a mitwe yavo, co vanazala vikeleya. Vambanda vanakulamesa mitwe yavo asi.

¹¹ Mesho ange avenga ngengu nakulila, mwonyo wange uli mu vukalu. Njinazeye na vusiwa akunyonga kwa vanu vange. Vanike na vimbututu valinakulezumukila mu vitapalo vya mu nganda.

¹² Valinakulomba vainavo vyakulya na vyakunwa, co vawila mu vitapalo ngwe vaje vanavetwa, omwo mwonyo wavo ulinakuhwa, co vatsila mu mavoko a vainavo.

¹³ Ove Yelusalema, Yelusalema injazema, vikajo njendeka kuli yove? Vatijo njikuzembeleka? Kukwesi umo wayandele ngeci wai. Tuyando twove tunaama ngwe mema a kalunga, iyajo asa kukukangwisa?

¹⁴ Vaka-kwimanena vove navimo vyai vya vushunga vakulekele, kuvanga makuli lika, vakukwisile nakwambulula kwavo, co yove kuwalitavelele vuvi vwove. Vakevo vakulingisile kuyongola ngeci kesi utenguluke ku vuvi vwove.

¹⁵ Vanu vaita mu nganda vakushendumuna omo vakukenga. Valipika ku mitwe yavo nakujola akuviya kwa Yelusalema ngwavo, “Eyi ikeyo vene nganda ije yaivwa? Nganda yakujolela ano a kaye oshe?”

¹⁶ Vitozi vove voshe valinakukushendumuna nakukukenga na cizindo. Valishumanga ku tunwa nakulipembula ngwavo, “Tunainyongesa! Eli likelyo litangwa twavandamenene!”

¹⁷ Shukulu Kalunga nalingi vije vyashakele kulinga, ikeye natunyongesa kujeneka mema ku mbunge, ngwe muje mwatunangwile ku san̄ulu. Ikeye nahyanesa vitozi vetu, navaana kujolela omo tunau.

¹⁸ Yove civumbe ca Yelusalema, vimbunge vya vanu vove vyatambekele kuli Shukulu Kalunga. Misozi yove iite mutanya na vutsiki ngwe ndonga, kesi ujuke kulila nakulinyenga!

¹⁹ Induka-induka vutsiki vwoshe ngeci ulombele kuli Shukulu Kalunga, ngeci ecele mbunge yove nakumulomba ngeci akuzivileko mema ku mbunge a vana vove vaje valinakulanduka ku njala mu vimbango vyoshe vya vitapalo!

²⁰ Yove Shukulu Kalunga, kenga ali vaje ulinakuyandesa! Vanakazi valinakulya vana vavo vaje vavazema! Vaka-kukombelela na vaka-kwimanena valinakuvatsiila mu Njuvo yove!

²¹ Vakwenje na tukulukazi vanalala mu vitapalo vanatsi. Vakwenje na vambanda, vitozi vanavatsii na mikwale. Yove wavatsiile kujeneka kuvazivilako mema ku mbunge, a litangwa lya vukalu vwove.

²² Yove walanyele vitozi vange ngwe ku litangwa lya ciwano, ngeci vanjizivise munjunju. Co naumo wai waputumukile a litangwa lya vukalu vwove. Vatsiile vana vange, vaje njalelele nakuvazema.