Mbimbi 1 - Livulu lya Shukulu Kalunga

Vusiwa vwa Yelusalema

¹ Yelusalema, nganda ije yashulile na vanu, ololo inapu ngundu! Nganda ije vakele nakusingimika mu kaye mwoshe, ololo inapu ngwe fwile. Nganda ije yapwile ngwe lishano a vinganda vyoshe, ololo inapu ngwe ndungo.

² Vutsiki vwoshe alinakulila, co misozi yendi ilinakwolomokela ku vinana vyendi. Vasamba vendi voshe vaje vakele navo, naumo wai aliko ngeci amuzembeleke. Vasamba vendi voshe vanamwende vungungu, ololo voshe vanamutengulukila nakumulwisa.

³ Vanu va mu Yunda vanapu vinzinda, vanaseze membo avo, omwo kayando kakama manene na mapakeso a muuka, valinakuyoya mu mafuti eka, kuvesi na mutambela wavo. Vitozi vavo vanavazengeleka ku mitambela yoshe, noku kuvatewela kwai.

⁴ Vitapalo vyakuya ku Siyone vilinakulila ngwe vanu, omwo naumo wai alinakwendamo mukuya ku Njuvo ya Shukulu Kalunga, mukulemesa a matangwa akujela. Vambanda vaje vakele nakwimbila kuje valinakuyanda, co vaka-kukombelela valinakukemanga lika. Vikolo vya mu nganda vili mupulungwa, co Siyone ili mu vukalu.

⁵ Vitozi vendi vanamufungulula, co ali mu mavoko avo. Shukulu Kalunga namunyanyamesa omwo vuvi vwendi vwavungi, vana vendi vanavafungulula nakuvatwala.

⁶ Vuvwa vwa Yelusalema vunahu, vantwama vendi vanapu ngwe vishonge, vaje vanazeye na njala, vaje nzili yavo ilinakuhwa, omwo valinakutewa viyambi.

⁷ A matangwa a tuyando, Yelusalema alinakwanuka vuyoye vwavuvwa vuje vwayoyele a matangwa a kunima, oloni napu ngundu. Omo wakele mu mavoko a vitozi, naumo wai wamukwasele. Vaje vamufungulwile vajolele akuwa kwendi.

⁸ Yelusalema navulumuna manene, co napu wa mazilo, voshe vaje vamusingimikile valinakumushendumuna. Vanamumono ali mushelengwa, akemanga nakuvandesa cihanga cendi omwo shwamwa.

⁹ Mazilo endi asholokele mu vuzalo vwendi, oloni ikeye kombileko mbunge kukujwala kwendi. Kuwa kwendi kwapwile kwakukomokesa, naumo wai wamuzembelekele. Vitozi vendi vanahyana, co atambeka kuli Shukulu Kalunga ngeci amuzivileko mema ku mbunge.

¹⁰ Vitozi vendi vamwivile vufuko vwendi vwoshe. Wavamwene vakovela mu Njuvo ya Shukulu Kalunga citona-mesho, muje vene vavenya Shukulu Kalunga wavindikile vaka-kujeneka kukulaela kukovelamo.

¹¹ Vanu vendi valinakukemanga oku vashakezeka vyakulya, valinakulandakana vufuko vwavo na vyakulya ngeci vivayoyese. Nganda ilinakutambeka ngwayo, “Shukulu Kalunga, kenga kuli yange, kenga omo njili mu tuyando twakama.”

¹² “Kuma eci kucesi nakulumbununa cuma cimo kuli yeni mulinakwita mu ngila ndi? Kengeni nga kuli umo namono tuyando ngwe yange, tuyando tuje nanjinenela Shukulu Kalunga a simbu ya vukalu vwendi vwakama.

¹³ “Watumine tuhya kutunda kwilu, tuhya tuje twenyele mukati kange. Ikeye wanjitelelele mweto, co wanjikokelele asi, wanjisezele njinatsi citunulu, co njonwele nzili litangwa lyoshe.

¹⁴ Ikeye wazivukile vuvi vwange vwoshe co wavukutiiya amo vwoshe, wavuzengelele ku mukoshi wange, co vwanjizeyesele manene omwo vulemu vwavwo. Shukulu Kalunga wanjanene ku mavoko a vitozi vange, co njonwele kuvayeluwisa.

¹⁵ “Shukulu Kalunga wayeluwisile mashwalale vange va nzili, watumine mbunga ya mashwalale kunyongesa vakwenje vange. Ikeye watsenene vanu vange ngwe cikamwino ca mikolovozi ya vushuka vwa vinyu.

¹⁶ “Omwo vyuma evi mukemwo njilila misozi. Naumo wai anjizembeleka, nambe kunjitakamesa. Vitozi vananjifungulula, co vanu vange kuvesi na cuma cimo cije civanasala naco.

¹⁷ “Njolola mavoko ange, oloni naumo wai anjikwasa, Shukulu Kalunga nanjisanena vitozi ngeci vakunjilwise ku mitambela yoshe, Vananjipwisa ngwe cuma ca mazilo.

¹⁸ “Oloni Shukulu Kalunga napu wa vushunga, omwo yange kunjononokele mashiko endi. Yeni vanu muli kwoshe-ikwoshe njitolilileni, kengeni vusiwa vwange. Vakwenje vange na vambanda vange vanavatwala ku vunzinda.

¹⁹ “Njasanene vasamba vange, oloni vavyanene kunjikwasa. Vaka-kukombelela amo na vantwama vatsililile mu vitapalo vya mu nganda, mukushakezeka vyakulya ngeci vivayoyese.

²⁰ “Shukulu Kalunga, kenga tuyando twange, kenga kukemanga kwa mwonyo wange! Mbunge yange ilinakulwa mu nulo, omwo vusiwa vwa vuvi vwange. Kuli kulitsiya mu vitapalo, nameme mu vinjuvo muli kutsa.

²¹ “Vanu vazivile kukemanga kwange, oloni naumo wai wanjizembelekele. Vitozi vange voshe vanavwaelela omo yove unanena tuyando ali yange. Nena vwasi litangwa lije liwakulaesele, yandesa vitozi vange ngwe munjilinakuyanda yange.

²² “Vahise akuvulumuna kwavo kwoshe, vanyanyamese, ngwe muwanjinyanyamesele yange omwo vuvi vwange. Njilinakukemanga mu tuyando, co cinyangavili cange coshe cinahu.”