Mateo 9 - Livulu lya Shukulu Kalunga

Yesu akangwisa muka-kayekele

¹ Yesu wakovelele mu vwato, wajavukile musambwa ya lishali, co wezile kwimbo lyendi.

² Co vanu vamunenelele munalume umo muka-kayekele walalele a linala. Co omo Yesu wamwene kukulaela kwavo, wendekele kuli uje muka-kayekele ngwendi, “Simpa, munange, vivi vyove vanavisambesa.”

³ Co vamo valongisi va majwi a Lishiko vendekele akati kavo ngwavo, “Munalume ou alinakushaula Njambi!”

⁴ Oloni Yesu wazivukile viyongola vyavo, co wavehwile ngwendi, “Vikajo mulinakuyongwela vyuma vyavivi mu vimbunge vyeni?

⁵ Kuma cacasi kwendeka ngwange, ‘Vivi vyove vanavisambesa,’ nambe kwendeka ngwange, ‘Katuka wende’?

⁶ Njikamimwesa ngeci muzivuke ngweni kuma Muna Munu ali na moko ano asi yakusambesa vuvi.” Ngecivene, wendekele kuli uje muka-kayekele ngwendi, “Katuka, ambata linala lyove, co uye kwimbo lyove!”

⁷ Co uje munalume wakatukile, waile kwimbo lyendi.

⁸ Omo vanu vacimwene, vakele na lyova, co vashangazalele Njambi uje waanene vanu moko yakufwa ngacije.

Yesu asana Mateo

⁹ Omo Yesu watundile ku mutambela uje, wamwene munu lizina lyendi Mateo, natumbama ku njuvo yakutambwila lisimu. Co Yesu wendekele kuli ikeye ngwendi, “Njikave.” Co Mateo wakatukile wamukavele.

¹⁰ Omo Yesu wakele nakulya ku mesa mu njuvo ya Mateo, vavangi vaka-kutambula lisimu na vaka-vuvi vezile vatumbamene amo na Yesu na vandongisi vendi ku mesa.

¹¹ Co omo vaFaliseo vacimwene, vehwile vandongisi vendi ngwavo, “Omwo vikajo mulongisi weni alinakulya na vaka-kutambula lisimu na vaje vaka-vuvi?”

¹² Oloni omo Yesu wazivileko, co wendekele navo ngwendi, “Vakangule kuvesi kusetela cimbanda embwe, oloni kuvanga vaka-kuvinja lika.

¹³ Yeni mukalilongese mwaya majwi a visoneka vati endeka, ngwawo, ‘Yange njishaka kutetela, kunjishaka n̄ombelo ya tusitu,’ omwo yange kunjezile mukusana vanu vaje vanalimono vakevo vavenya ngwavo vaka-vushunga, oloni vanu vaje vaka-vuvi.”

Cihula ca a kulikela kulya

¹⁴ Asinoni vandongisi va Yowano Muka-kumbwitika vezile kuli Yesu nakumwihula ngwavo, “Omwo vikajo yetu na vaFaliseo tukalikela kulya visimbu vyavingi, oloni vandongisi vove kuvesi kulikela kulya?”

¹⁵ Yesu wavakumbulwile ngwendi, “Kuma yeni mukengelela vangenzi ku ciwano ca vulo ngeci vaye na njala ndi? Mwa vushunga vene embwe! Omo vavenya vulo acili navo kuvapandele kulinga ngacije. Oloni litangwa likaija omo vakatundisa vavenya vulo akati kavo, asinoni vakalikela kulya.

¹⁶ “Naumo wai atongela citopeko ca nanga yaiha a kazaku kalaja, omwo cije citopeko caciha citavula nanga yalaja, co cikaseza mbengwa yakama.

¹⁷ Nameme ngoco kuvesi kulongela vinyu vyaviha mu vinjeke vya vilambu vyalaja embwe, nga valingamo, vije vinjeke vya vilambu vitavuka, co vinyu viitikila mwangoco. Oloni vinyu vyaviha vavilongela mu vinjeke vya vilambu vyaviha, co vyoshe vivali vavinyunga mwamuvwa.”

Muna Njailosi wa mumbanda na munakazi uje wakwatele ku cikoveyo ca Yesu

¹⁸ Omo Yesu acili nakwendeka navo vyuma evi, kengeni, mukulunu umo wa vaYunda wezile kuli ikeye, co watsikamene a mavuli endi ku mesho a Yesu wendekele ngwendi, “Munange wa munakazi natsi simbu ino vene, oloni tuye ukamukambeke mavoko, co akayoya.”

¹⁹ Ngecivene, Yesu wakatukile wamukavele, co vandongisi vendi vaile amo nendi.

²⁰ Munakazi umo wakele na mushongo wakwita maninga myaka likumi na ivali wezile munima ya Yesu wamukwatele ku mukundwilo wa cikoveyo cendi.

²¹ Omwo wayongwele mu mbunge yendi ngwendi, “Nga njikwata lika ku mukundwilo wa cikoveyo cendi, njikanguka.”

²² Yesu watengulukile wamumwene, co wendekele ngwendi, “Simpa, munange, kukulaela kwove kunakukangwisa.” Co uje munakazi kutunda simbu ije vene wakangukile.

²³ Co omo Yesu wezile ku njuvo ya uje mukulunu, co wamwene vanu vakele nakulila, co vanu vavangi vakele nakulinyenga,

²⁴ wendekele ngwendi, “Tuukeni, muvavoshe! Ou mwanike katsile embwe, oloni nalala lika tulo.” Co voshe vamujolele, nakumushendumuna.

²⁵ Oloni omo vanu voshe vatuukile, Yesu wakovelele ku mulili wa uje mumbanda, co wamukwatele ku livoko, co uje mumbanda wendukile.

²⁶ Co lutsimo olu lwashandokelele mu mitambela ya lifuti lyoshe.

Yesu atonesa tupuputwa va vanalume vavali

²⁷ Co omo Yesu watundile kuje, tupuputwa vavali vakele kuje vamukavele, vatambekele ngwavo, “Ove muna Ndaviti, tuzivileko mema ku mbunge!”

²⁸ Omo Yesu wakovelele mu njuvo, vaje tupuputwa vavali vezile kuli Yesu, co Yesu wavehwile ngwendi, “Kuma yeni mwakulaela ngweni yange njasa kumikangwisa ndi?” Vakevo vamukumbulwile ngwavo, “Eyo shukulu.”

²⁹ Asinoni Yesu wakwatele a mesho avo wendekele ngwendi, “Cilingiwe kuli yeni ngwe kukulaela kweni.”

³⁰ Co mesho avo atonene. Co Yesu wavasin̄ikile ngwendi, “Kesi mulekeko munu umo embwe.”

³¹ Oloni omo vaile vashandwele vije vyavasin̄ikile Yesu mu mutambela woshe wa lifuti lije.

Kaveveve endeka

³² Omo vatundileko, vanu vamo vanenele kaveveve kuli Yesu, omwo wakele na munzinzime wakujwala.

³³ Oloni omo Yesu watundisile uje munzinzime wakujwala, uje munalume wendekele, co vanu voshe vakomokele vendekele ngwavo, “Yetu kanda tumone cuma cakufwa ngacije mu Isalele!”

³⁴ Oloni vaFaliseo vendekele ngwavo, “Mwene wa minzinzime yakujwala ikeye alinakumwana nzili yakutundisa minzinzime yakujwala!”

Yesu azivila vanu mema ku mbunge

³⁵ Co Yesu waitanganene mwaya membo akama na mu tumembo twatundondo. Walongesele mu masinangonge avo, wambulwile Vin̄anda Vyavivwa vya Vumwene vwa Njambi, co nakukangwisa vaka-mishongo na vaka-kuvinja vakuliseza-seza.

³⁶ Omo wamwene vimbunga vya vanu, wavazivilile mema ku mbunge, omwo vakele nakuyandangela nakujuka, ngwe vimanga kuvesi na kanyungi.

³⁷ Ngecivene, wendekele kuli vandongisi vendi ngwendi, “Mwa vushunga vene vimbuto vinatumu, oloni vaka-kuteja vavandondo.

³⁸ Ngecivene, lombeleni kuli vavenya vimbuto ngeci atume vaka-kuteja vimbuto vyendi.”