Mateo 8 - Livulu lya Shukulu Kalunga

Yesu akangwisa muka-mbumba

¹ Omo Yesu washelumukilile ku munkinda, mbunga yakama vamukavele.

² Asinoni munu umo wakele nakuyanda na mushongo wa mbumba wezile watsikamene ku mesho endi, wendekele ngwendi, “Shukulu, nga mushaka, mwasa kunjijelesa.”

³ Co Yesu wolwele livoko lyendi wamukwatele, wendekele ngwendi, “Njishaka, jela.” Co aje vene wajelele ku mushongo wendi wa mbumba.

⁴ Co Yesu wamulekele ngwendi, “Tolilila! Kesi ulekeko munu umo cuma eci embwe, oloni ya ukalisholole kuli muka-kukombelela ngeci akakwilule, asinoni ukakombelele n̄ombelo ije yashikile Mosesa, ngeci voshe vakazivuke ngwavo vanakukangwisa.”

Yesu akangwisa ngamba ya mukulunu wa mashwalale va Loma

⁵ Omo Yesu wakovelele mu Kapenauma, mukulunu wa mashwalale va Loma wezile kuli ikeye, wamulombele ngwendi,

⁶ “Shukulu, ngamba yange nalala mu njuvo alinakuvinja mushongo wa kayekele, co alinakuyanda manene.”

⁷ Yesu wamukumbulwile ngwendi, “Njiija nakumukangwisa.”

⁸ Oloni uje mukulunu wa mashwalale wamukumbulwile ngwendi, “Shukulu, kucapandele yove kukovela mu njuvo yange, oloni endeka lika na lijwi, co ngamba yange akakanguka.

⁹ Omwo nange njili mwisi ya moko ya vamyata vange, co njili na mashwalale vakanjononoka. Njishika umo ngwange, ‘Ya!’ Co aya, co njishika mukwavo lalo ngwange, ‘Ija!’ Co aija, co lalo njikashiki ndungo yange ngwange, ‘Linga eci!’ Co acilinga.”

¹⁰ Omo wazivile evi, Yesu walikomokelele, co wendekele kuli vanu vaje vamukavele ngwendi, “Mwa vushunga njimileka ngwange, nameme mu lifuti lya Isalele, kumwesi muka-kukulaela wangacije.

¹¹ Njimileka ngwange vavangi vakaija, vakatunda mu ngangela na mu kangombe ka yambi, co vakatumbama ku mesa amo na Avilahama, na Isake, na Yakomba, mu Vumwene vwa mwilu.

¹² Oloni vaje vanapandele ngeci vakatumbame mu Vumwene vuje vakavombila anja mu lisusulungu kuje kukakala kulila nakulingenjenga ku mayo.”

¹³ Co Yesu wendekele kuli uje mukulunu wa mashwalale ngwendi, “Ya kwimbo, cifwe ngoco kuli yove ngwe kukulaela kwove.” Co ngamba yendi wakangukile a simbu ije vene.

Yesu akangwisa vanu vavangi

¹⁴ Co omo Yesu wakovelele mu njuvo ya Petulu, muje wamwene vainamweno ya Petulu vanalala a vulili nakuvinja lisika-sika.

¹⁵ Yesu wamukwatele ku livoko, co lisika-sika lyamutundile, wendukile nakushangumuka kuvapangela.

¹⁶ Omo vetele ku cingwezi, vanu vanenele vanu vavangi vaka-minzinzime yakujwala kuli Yesu, co Yesu wavatundisile minzinzime yakujwala na lijwi, co wakangwisile voshe vaje vavinjile.

¹⁷ Ikeye walingile evi ngwe muje mwendekele Isaya muka-kwimanena ngwendi, “Ikeye vavenya watundisile kuvinja kwetu, co wambatele mishongo yetu.”

Vaje vashaka kukavangeya Yesu

¹⁸ Omo Yesu wamwene vimbunga vyakama vanamuzengeleka, walekele vandongisi vendi ngeci vaye musambwa ya lishali.

¹⁹ Co mulongisi wa majwi a Lishiko wezile kuli ikeye nakwendeka nendi ngwendi, “Mulongisi, njikakukava kwoshe kuuya.”

²⁰ Yesu wamukumbulwile ngwendi, “Vimbanje vali na mena, co lalo tuzila vali na mashwa, oloni Muna Munu kesi naa akusatela mutwe wendi.”

²¹ Munu mukwavo uje wapwile ndongisi yendi, wendekele kuli ikeye ngwendi, “Mwene, njitave akulivanga njiiluke njikatsinde tai tate.”

²² Oloni Yesu wamukumbulwile ngwendi, “Njikave, co seza vatsi valitsinde vakevo vavenya.”

Yesu olwesa lihunzi lyakama

²³ Co omo Yesu wakovelele mu vwato, vandongisi vendi vamukavele.

²⁴ Co vwasi-vwasi lihunzi lyakama lyakatukile a lishali, ngecivene, vwato vwashakele kuvombela. Oloni Yesu walalele.

²⁵ Vandongisi vendi vaile kuli ikeye nakumwindula ngwavo, “Twovole Mwene. Tushaka kutsa.”

²⁶ Co Yesu wavakumbulwile ngwendi, “Omwo vikajo muli na lyova lyangacije, yeni vaka-kukulaela kwakundondo?” Asinoni wakatukile wolwesele lihunzi na mankimba, co kwalendamene kuluu.

²⁷ Co voshe valikomokelele, vendekele ngwavo, “Munu wakufwa vatijo ou? Uje nameme lihunzi na mankimba vimwononoka!”

Yesu akangwisa vanu vavali vaka-minzinzime yakujwala

²⁸ Omo Yesu wetele mu lifuti lya Ngandalene, ku mutambela ukwavo wa lishali, waliwanene na vanalume vavali vatundile ku viilo. Vanalume ava vakele na minzinzime yakujwala yakukomokesa manene, ngecivene, naumo wai wasele kwitila mu ngila ije.

²⁹ Co vwasi-vwasi vatambekele ngwavo, “Ushaka kulinga vika netu ove Muna Njambi? Unaija nakutunyanyamesa omo simbu yetu kanda icete ndi?”

³⁰ Kuyehi navo kwakele vutanga vwakama vwa vingulu vwakele nakulila kuje,

³¹ co ije minzinzime yakujwala yalombele Yesu ngwayo, “Nga ututundisa muli vano vanu, tutume mu vutanga vwa vingulu vaje.”

³² Co Yesu wailekele ngwendi, “Yeni,” ngecivene, yatundile muli vaje vanu, co yakakovelele mu vutanga vwa vingulu. Vutanga vwoshe vwashatukilile mu lishali, co vwakanyongelelemo.

³³ Vaje vanu vaka-kunyunga vingulu vashatukilile ku nganda, co vakambulwile vin̄anda vyoshe kuje, co nevi vyalingiwile ali vaje vanu vaka-minzinzime yakujwala.

³⁴ Ngecivene, vanu voshe vatundile ku nganda ije vezile nakuliwana na Yesu, co omo vamuwanene, vamulombele ngeci atunde mu lifuti lyavo.