Mateo 7 - Livulu lya Shukulu Kalunga

Kuhisa vakweni

¹ “Kesi muhise vakweni, kutewa neni Njambi akamihisa.

² Omwo na cihiso cije vene muhisa naco vakweni, cikeco lalo akamihisa naco Njambi, co seteko ije museteka nayo vakweni, ikeyo lalo yakamiseteka nayo Njambi.

³ Omwo vikajo umona kacishoni kali a lisho lya mukweni, oloni kuuyongola mukambo uli mu lisho lyove?

⁴ Nambe vatijo wendeka na mukweni ngwove, ‘Tewa njikutundise kacishoni kali a lisho lyove,’ omo yove uli na mukambo mu lisho lyove?

⁵ Ove muka-civembulu! Akulivanga tundisa mukambo uli mu lisho lyove, asinoni umone mwamuvwa akutundisa kacishoni kali a lisho lya mukweni.

⁶ “Kesi mwane tutali vije vyakujela, co vakamitengulukila nakumilwisa, kesi mumbile makwalale ku vingulu, co vakaalyatangela na vimbemba vyavo.

Kulomba nakusetela nakutota

⁷ “Lombeni, co mukatambula, seteleni, co mukawana, toteni, co vakamishokolwela.

⁸ Omwo woshe alomba atambula, co woshe asetela awana, co woshe atota vakamushokolwela.

⁹ Cisemi mukajo akati keni nga munendi amulomba likende, co ikeye amwana limanya?

¹⁰ Nambe nga munendi amulomba isi, co ikeye amwana linyoka?

¹¹ Inonwa yeni vaka-vuvi, muzivuka kwana vyuma vyavivwa kuli vana veni, kuma Ishweni wa mwilu kakatuvakana manene kwana vyuma vyavivwa kuli vaje vamulomba ndi?

¹² “Ngecivene, vyuma vyoshe vimushaka ngeci vakweni vamilingilevyo, mukemwo vene, neni lalo valingilenivyo, omwo awa akewo majwi a Lishiko lya Mosesa na vilongesa vya vaka-kwimanena.

Cikolo cacindondo

¹³ “Koveleni mu cikolo cacindondo, omwo cikolo cakama na ngila yakujanjavala viya kukunyongesa, co vavangi valinakuyamo.

¹⁴ Omwo cikolo cacindondo na ngila yakulishwata viya ku mwonyo, co vaje vaiwana vanapu vavandondo.

Muti na vushuka vwawo

¹⁵ “Nyanyameni na vaka-kwimanena va makuli, vaje vaija kuli yeni vanalikongomeka ngwe vimanga, oloni mu vimbunge vyavo vanapu ngwe tungunga vavukalu.

¹⁶ Mukavazivukila ku vilinga vyavo. Miti ya mambimbo kuyasa kwima mikolovozi ya vushuka vwa vinyu, nambe mimpundukaina kuyasa kwima mikuyu.

¹⁷ Ngecivene, muti woshe wauvwa ukaimi vushuka vwavuvwa, oloni muti wauvi ukaimi vushuka vwavuvi.

¹⁸ Muti wauvwa kuwasa kwima vushuka vwavuvi, nameme lalo muti wauvi kuwasa kwima vushuka vwavuvwa.

¹⁹ Muti woshe uje kuwimi vushuka vwavuvwa vakaushinja, co vakaumbila mu tuhya.

²⁰ Ngecivene, vaka-kwimanena va makuli mukavazivukila ku vilinga vyavo.

Kunjimizivuka

²¹ “Kesi munu woshe anjitumbula ngwendi, ‘Mwene, Mwene’ akakovela mu Vumwene vwa mwilu embwe, oloni kuvanga vaje vakalingi cizango ca Tate wa mwilu.

²² A Litangwa Lyakusompa, vavangi vakendeka kuli yange ngwavo, ‘Mwene, Mwene! Mu lizina lyove twambulwile muzimbu wa Njambi, co lalo mu lizina lyove twatundisile minzinzime yakujwala, co lalo mu lizina lyove twalingile vizivukiso vyavingi!’

²³ Asinoni njikavakumbulula ngwange, ‘Kunjimizivuka. Tundeni kuli yange, yeni vaka-kulinga vyavivi!’

Vaka-kutunga vinjuvo vavali

²⁴ “Ngecivene, woshe aziva majwi ange awa nakuwononoka, napu ngwe munalume uje wakunyanyama watungilile njuvo yendi a limanya.

²⁵ Nyonzi yanyokele, livazi lyezile, co lihunzi lyakama lyahuwile nakuningangesa ije njuvo. Oloni kuyawile, omwo vaitungilile a limanya.

²⁶ “Oloni woshe aziva majwi ange awa, co kawononoka, co napu ngwe munalume uje wakweva watungilile njuvo yendi a lishen̄avu.

²⁷ Co omo nyonzi yanyokele, na livazi lyezile, co lihunzi lyakama lyahuwile nakuningangesa ije njuvo, co yawile, co kuwa kwayo kwapwile kwakuvi manene!”

Moko ya Yesu akulongesa

²⁸ Co omo Yesu wamanese kwendeka vyuma evi, mbunga ije valikomokelele akulongesa kwendi,

²⁹ omwo ikeye kapwile ngwe valongisi vavo va majwi a Lishiko embwe, co wavalongesele na moko.