Mateo 6 - Livulu lya Shukulu Kalunga

Vilongesa vya a kukwasa vaka-kujeneka

¹ “Nyanyameni kutewa mulingila vushunga vweni ku mesho a vanu ngeci vanu vamone vije vimulinakulinga. Nga mulinga vyuma vije ku mesho a vanu, kumukatambula cikandelela kuli Ishweni uje ali mwilu.

² “Ngecivene, omo mwana cuma kuli muka-kujeneka, kesi mulimwese embwe, ngwe muvakalingi vaka-civembulu mu masinangonge na mu vingila, ngeci vanu vavashangazale. Mwa vushunga njimileka ngwange, vanatambula laja cikandelela cavo.

³ Oloni omo mwana cuma kuli muka-kujeneka, cilingeni mu vushweke ngeci nameme musamba weni kesi acizivuke,

⁴ ngecivene, eyi inapu n̄anda ya mu vushweke. Co Ishweni uje ali mwilu muka-kumona vije mukalingi mu vushweke, akamyana cikandelela ceni.

Vilongesa vya a malombelo

⁵ “Co omo mulombela, kesi mulombele ngwe vaka-civembulu, omwo vakevo vazema kwimana nakulombela mu masinangonge na masambwa-ngila, ngeci vanu voshe vavamone. Mwa vushunga njimileka ngwange, vanatambula laja cikandelela cavo.

⁶ Oloni yove omo ulombela, ya ku mulili wove, nakushoka ku cikolo, co lombela kuli Isho, uje kuwasa kumona. Co Isho uje muka-kumona vije ukalingi mu vushweke, akakwana cikandelela cove.

⁷ “Co mukulomba kweni, kesi mutumise manene majwi amangi akujeneka seo, ngwe muvakalingi vaka-kujeneka kukulaela, omwo vayongola ngwavo vinjambi vavo vakavaziva omwo a majwi avo amangi-mangi.

⁸ Kesi mupwe ngwe vakevo, omwo Ishweni nazivuka laja vije vimunajeneka omo kanda mulombe.

⁹ Omu mukemwo mumunapande kulomba, ngweni, ‘Tatetu uli mwilu, valemese lizina lyove,

¹⁰ Vumwene vwove vwije, cizango cove vacilinge ano asi, ngwe omwo vakacilingi mwilu.

¹¹ Twane kulya kwetu kwa litangwa lyangongo,

¹² tusambese ku milonga yetu, ngwe yetu lalo mutukasambesa vaka-kutuvulumwina.

¹³ Kesi ututwamenene ku vyeseko, oloni twamene ku vuvi! Omwo vumwene vunapu vwove, na nzili na vumpau, ku myaka yoshe. Ewa.’

¹⁴ “Omwo nga musambesa vakweni ku milonga yavo, Ishweni ali mwilu akamisambesa yeni lalo.

¹⁵ Oloni nga kumusambesa vakweni ku milonga yavo, co Ishweni lalo kakamisambesa ku milonga yeni.

Vilongesa vya a kulikela kulya

¹⁶ “Co omo mulikela kulya, kesi mwombwe ngwe muvakalingi vaka-civembulu. Omwo vakevo vakaviisa vihanga vyavo, ngeci vanu vavamone ngwavo vanalikela kulya. Mwa vushunga njimileka ngwange, vanatambula laja cikandelela cavo.

¹⁷ Oloni omo mulikela-kela kulya, jweleni ku mesho nakusakula vin̄ambu vyeni,

¹⁸ ngeci vanu kesi vamimone ngwavo munalikela kulya, kuvanga Ishweni lika uje kumwasa kumona ikeye azivuka. Co Ishweni, muka-kumona vije vimulinakulinga mu vushweke, akamyana cikandelela ceni.

Vufuko vwa mwilu

¹⁹ “Kesi mulitulikile vufuko vwa ano asi, aje ali tunembulu na n̄alawe vikakuvuviisa, co ali na vezi lalo vatuva nakuvwiva.

²⁰ Oloni litulikileni vufuko vwa mwilu, muje tunembulu nameme n̄alawe kuvyasa kuvuviisa, nambe vezi kuvasa kuvutuva nakuvwiva.

²¹ Omwo mbunge yove simbu yoshe yakala kuje kuvwakala vufuko vwove.

Ceke ca muvila

²² “Omwo mesho ove akewo anapu ngwe ndeya ya muvila wove. Ngecivene, nga mesho ove anapu amavwa, muvila wove woshe ukala na ceke.

²³ Oloni nga mesho ove anapu akutsitsivala, muvila wove woshe uli mu lisusulungu. Ngecivene, nga ceke cili muli yove citenguluka kupwa lisusulungu, co lisusulungu muli yove likapwa lyakukomokesa manene.

Njambi na vufuko

²⁴ “Munu naumo wai asa kupangela vashukulu vavali, kuvanga azindeo umo nakuzemao mukwavo, nambe apwa wa kulongwa ku umo nakushaula mukwavo. Co kuwasa kupangela Njambi nakupangela lalo vimbongo.

²⁵ “Ngecivene, njimileka ngwange, kesi mulishoshomwene akuyoya kweni, ngweni tukalya vika, nambe ngweni tukanwa vika, nambe vya mivila yeni ngweni, tukazala vika. Omwo myonyo yeni ili na seo kutuvakana vyakulya. Co mivila yeni lalo ili na seo kutuvakana vyakuzala.

²⁶ Kengeni tuzila, kuvesi kukuva nameme kuteja nambe kutulika mu vishete, oloni Ishweni ali mwilu alinakuvalisa. Yeni muli na seo yakama kutuvakana tuzila.

²⁷ Co iyajo akati keni nga alishoshomwena ase kuwezelela ku matangwa a ku mwonyo wendi?

²⁸ “Co omwo vikoni mukalishoshomwena a vuzalo? Kengeni vishani muje muvikakolo, vikevyo kuvyesi kupanga nambe kulipangela vuzalo vikevyo vavenya.

²⁹ Oloni njimileka ngwange, nameme Mwene Solomoni mu vufuko vwendi vwoshe kazalele vuzalo vwavuvwa ngwe vwa vishani evi.

³⁰ Oloni nga Njambi azika mwila wa mu shwata uje ukalako lelo lika, oloni imene waiko, vaumbila mu liko nakuwenyeka, kuma kasa kumizika ndi? Yeni vaka-kukulaela kwakundondo!

³¹ “Ngecivene, kesi mulishoshomwene ngweni, ‘Tukalya vika?’ Nambe ‘Tukanwa vika?’ Nambe ‘Tukazala vika?’

³² (Omwo vyuma vyoshe evi vikevyo vivakashakezeka vanu vaje vaka-kujeneka kukulaela.) Co Ishweni ali mwilu azivuka ngwendi munajeneka vyuma vyoshe evi.

³³ Oloni akulivanga shakezekeni Vumwene vwendi, na vushunga vwendi, co vyoshe evi akamiwezelelavyo.

³⁴ Ngecivene, kesi mulishoshomwene ku litangwa lya imene, omwo litangwa lya imene likalimwena likelyo vavenya. Kucitava kuwezelelako ku tuyando tuje tulinakwija a litangwa na litangwa.