Mateo 4 - Livulu lya Shukulu Kalunga

Yesu vamweseka

¹ Asinoni Munzinzime watwalele Yesu mu mambo ngeci Liyavola akamweseke.

² Omo Yesu walikelele kulya matangwa makumi awana mutanya na vutsiki, co wazivile njala.

³ Co Liyavola wezile kuli ikeye wendekele ngwendi, “Nga u Muna Njambi, shika mamanya awa ngeci alimuke makende.”

⁴ Oloni Yesu wamukumbulwile ngwendi, “Visoneka vyendeka ngwavyo, ‘Munu kasa kuyoya na makende lika embwe, oloni kuvanga na majwi oshe a Njambi.’ ”

⁵ Co Liyavola watwalele Yesu ku Yelusalema, Nganda Yakujela, wamwimikile a kashongwa ka Njuvo ya Shukulu Kalunga,

⁶ co wendekele kuli ikeye ngwendi, “Nga u Muna Njambi, lyumbile asi, omwo visoneka vyendeka ngwavyo, ‘Njambi akashika tungelo twendi ali yove, co vakakukavwila na mavoko avo, ngeci myanja yove kesi ikatanuke ku limanya.’ ”

⁷ Yesu wamukumbulwile ngwendi, “Oloni visoneka vyendeka ngwavyo, ‘Kesi weseke Shukulu Kalunga Njambi yove.’ ”

⁸ Co Liyavola watwalele lalo Yesu a munkinda waulaja manene, wamumwesele mafuti oshe a ano a kaye na vumpau vwao vwoshe.

⁹ Co Liyavola wendekele kuli ikeye ngwendi, “Nga utsikama a mavuli nakunjilemesa, co vyoshe evi vikapwa vyove.”

¹⁰ Yesu wamukumbulwile ngwendi, “Tunda kuli yange, Satana! Omwo visoneka vinendeka ngwavyo, ‘Ukalemesa Shukulu Kalunga Njambi yove nakumupangela ikeye lika.’ ”

¹¹ Asinoni Liyavola wasezele Yesu, co tungelo vezile nakumukwasa.

Yesu ashangumuka vipangi vyendi mu Ngalileya

¹² Omo Yesu wazivile ngwavo Yowano vanamukwata nakumwaka mu kamenga, co ikeye waile ku Ngalileya.

¹³ Katumbamene kuje ku Nazaleta embwe, oloni waile ku Kapenauma, limbo lije lyakele kuyehi na Lishali lya Ngalileya, mu lifuti lya Zembuloni na lifuti lya Nafetali.

¹⁴ Ngecivene, vije vyendekele Isaya muka-kwimanena vipwe vya vushunga ngwendi,

¹⁵ “Lifuti lya Zembuloni, na lifuti lya Nafetali, mu ngila yakuya ku mema a kalunga, ku mutambela ukwavo wa Ndonga ya Yondau, Ngalileya lifuti lya vanu vaje kesi vaYunda.

¹⁶ Vanu vaje vakele mu lisusulungu vanamono ceke. Vaje vakele mu lifuti lya lisusulungu lya kutsa, ceke cinavatwila.”

¹⁷ Kutunda a simbu ije Yesu washangumukile kwambulula ngwendi, “Tengulukeni mu vimbunge vyeni ngeci mutunde ku vuvi, omwo Vumwene vwa mwilu vuli muyehi.”

Yesu asana vaka-kujevela visi vawana

¹⁸ Omo Yesu wakele nakushwangesa Lishali lya Ngalileya, wamwene vandolome vavali vaka-kujevela visi, Simoni (uje vatumbula Petulu) na ndolome yendi Anduleo, vakele nakutsiya visi mu lishali a linimbwa.

¹⁹ Yesu wendekele kuli vakevo ngwendi, “Njikaveni, co njikamipwisa vaka-kujevela vanu.”

²⁰ Co vwasi-vwasi vasezele manimbwa avo vakavele Yesu.

²¹ Omo washwenyeseleko wamwene lalo vandolome vavali, Yakomba na Yowano vana va Zembendeo, vakele mu vwato amo na ishavo Zembendeo, vakele nakutungulula manimbwa avo, co Yesu wavasanene, co

²² vwasi-vwasi vasezele vwato na ishavo, co vakavele Yesu.

Yesu alongesa nakwambulula nakukangwisa

²³ Yesu wendanganene mu Ngalileya mwoshe, nakulongesa mu masinangonge avo, nakwambulula Vin̄anda Vyavivwa vya Vumwene nakukangwisa vanu voshe vaka-mishongo yoshe na vaka-kuvinja vakuliseza-seza.

²⁴ Lutsimo lwendi lwetele na ku lifuti lyoshe lya Silya, co vamunenelele vaje voshe vakele nakuvinja, vakele na mishongo yakuliseza-seza yoshe na mishongo yeka, na vaje vayandele manene na minzinzime yakujwala, na vaka-kushinya, na vaka-kayekele, co Yesu wavakangwisile voshe.

²⁵ Mbunga yamukavele vaje vatundile ku Ngalileya, na ku Vinganda Likumi, na ku Yelusalema, na ku Yundeya, na ku lifuti lya musambwa ya Ndonga ya Yondau.