Mateo 3 - Livulu lya Shukulu Kalunga

Kwambulula kwa Yowano Muka-kumbwitika

¹ A matangwa aje kwezile Yowano Muka-kumbwitika, wambulwile mu mambo ya Yundeya ngwendi,

² “Tengulukeni ku vivi vyeni, omwo Vumwene vwa mwilu vuli muyehi!”

³ Omo ou ikeye Yowano uje yatumbwile Isaya muka-kwimanena ngwendi, “Lijwi lya umo atambeka mu mambo ngwendi, ‘Vwaeseni tapalo ya Shukulu Kalunga, sheveni mu ngila yendi ngeci akwitilemo!’ ”

⁴ Yowano wazalele vuzalo vwa maka a kamelo, na mwiva wa cipapa mu mbunda yendi, co vyakulya vyendi vyapwile vimbimba mikumbi na vuki.

⁵ Vanu vakutunda ku Yelusalema na ku Yundeya yoshe na ku lifuti lyoshe lije lya kulyata na Yondau vezile kuli ikeye,

⁶ vakevo valitavelele ku vivi vyavo, co wavambwitikile mu Ndonga ya Yondau.

⁷ Oloni omo Yowano wamwene vaFaliseo na vaSanduki vavangi vakele nakwija kuli ikeye ngeci avambwitike, co wendekele kuli vakevo ngwendi, “Eni manyoka! Iyajo naminangula ngeci mutewe vukalu vwa Njambi vuje vulinakwija?

⁸ Lingeni vyuma vije vimwesa ngeci munatenguluka ku vivi vyeni.

⁹ Kesi mulyendekese mu vimbunge vyeni ngweni muli na kukulwila yeni Avilahama. Mwa vushunga njimileka ngwange Njambi asa kutengulula mamanya awa nakuwapwisa vatekulwila va Avilahama!

¹⁰ Njaviti vanayaka laja ku mizi ya miti, muti woshe kuwimi vushuka vwavuvwa vakaushinja nakuumbila mu tuhya.

¹¹ Njimimbwitika mu mema mukumwesa kutenguluka kwa vimbunge vyeni, oloni owo akaija munima yange akamimbwitika na Munzinzime Wakujela na mu tuhya. Ikeye wakama kutuvakana yange, nameme vin̄aku vyendi kunjivyasa kuvyambata.

¹² Shewa ili mu livoko lyendi, ikeye akapepa nakujelesa mwamuvwa vinona vyoshe ku lijungwilo lyendi, co tiliku akaitulikila mu cishete cendi, oloni lijungu lyoshe akalyenyeka na tuhya kutwesi kuzima.”

Yesu vamumbwitika

¹³ A simbu ije Yesu watundile ku Ngalileya wezile kuli Yowano ku Yondau ngeci amumbwitike.

¹⁴ Oloni Yowano washakele kumuvyana ngwendi, “Yange njapandele kwija kuli yove ngeci unjimbwitike, kesi yove wije kuli yange ngeci njikumbwitike!”

¹⁵ Oloni Yesu wamukumbulwile ngwendi, “Njitave ololo vene omwo catupande kupwisamo vushunga vwoshe.” Co Yowano wamutavele.

¹⁶ Omwo Yesu vamumbwitikile, vwasi-vwasi omo watumukile mu mema, co mwilu mwashokolokele, co wamwene Munzinzime wa Njambi watongamene ali ikeye ngwe katela.

¹⁷ Co mwilu mwatundile lijwi ngwalyo, “Ou ikeye Munange injazema, njilinakuvwaelela ali ikeye.”