Mateo 28 - Livulu lya Shukulu Kalunga

Kusanguka kwa Yesu

¹ Omo Litangwa Lyakuhwima lineti, a mungulungengu a litangwa lya Calumingo, Maliya Mangandalena na Maliya mukwavo vaile nakumona ku mbumbo.

² Vwasi-vwasi kwakele mandunduma, omwo kangelo ka mwene washulukile mwilu, watundisile limanya, co watumbameneo.

³ Cifwa cendi cafwile ngwe muhyato, co vuzalo vwendi vwatokele to, ngwe memba.

⁴ Co vaje mashwalale vaka-kunyungako vazivile lyova nakujaja, co vatsile nzanza-vuta.

⁵ Oloni uje kangelo wendekele kuli vaje vanakazi ngwendi, “Kesi muzive lyova. Omwo njinazivuka ngwange mushakezeka Yesu, uje ivashukikile a cilindakano.

⁶ Ikeye waimo muno, omwo nasanguka laja, ngwe muje mwamilekele. Ijeni mumone mu mwela muvamulangekele.

⁷ Asinoni yeni vwasi mukaleke vandongisi vendi ngweni, ‘Nasanguka laja ku vatsi, co nai laja ku Ngalileya kuje vene kukekwo mukamumwena!’ Anukeni vinjinamileka.”

⁸ Ngecivene, vwasi-vwasi vatundile ku mbumbo na lyova nakuvwaelela kwakama, co vashatukile nakukaleka vandongisi vendi.

⁹ Co Yesu waliwanene navo nakwendeka ngwendi, “Kwoloka kukale neni.” Co vezile nakumukwata ku mendi, co vatsikamene nakumulemesa.

¹⁰ Asinoni Yesu wendekele ngwendi, “Kesi muzive lyova. Yeni mukaleke vandolome vange vakaye ku Ngalileya, kukekwo vakanjimwena.”

Vukaleo vwa vaka-kunyunga

¹¹ Omo vaje vanakazi vatundileko, vamo mashwalale vaka-kunyunga ku mbumbo vaile ku nganda nakukaleka vakulunu va vaka-kukombelela vyuma vyoshe vije vyalingiwile kuje.

¹² Co omo vakulunu va vaka-kukombelela na vakulunu vakungulukile amo nakutumba vutumbe vwavo, vafwetele vimbongo vyavingi kuli mashwalale,

¹³ vavashikile ngwavo, “Ambululeni ngweni vandongisi vendi vanezile vutsiki nakumwiva omo tunakele mu tulo.

¹⁴ Co nga nguvulu akazivako, tukamuzika-zika, co yeni kumukakala na cuma cakumishotesa mbunge lalo.”

¹⁵ Ngecivene, vaje vaka-kunyunga vatambwile vije vimbongo valingile ngwe muvavashikile. Co vukaleo ovu vwatsimanene akati ka vaYunda nakweta ku litangwa lyalelo.

Yesu alisholola kuli vandongisi vendi

¹⁶ Vandongisi likumi na umo vaile ku Ngalileya, ku munkinda kuje Yesu wavashikile ngeci vayeko.

¹⁷ Co omo vamumwene, vamulemesele, oloni vamo vakele na vimata.

¹⁸ Co Yesu washwenyele kuyehi navo wendekele navo ngwendi, “Moko yoshe ya mwilu neyi ya ano asi vananjanayo.

¹⁹ Ngecivene, yeni oni, ku miyati yoshe nakuvapwisa vandongisi vange, vambwitikeni mu lizina lya Tate, na Mwana, na Munzinzime Wakujela.

²⁰ Co valongeseni kwononoka vyuma vyoshe vije vinjamishiki. Co anukeni ngweni njikakala neni matangwa oshe noo akukotoka kwa kaye.”