Mateo 26 - Livulu lya Shukulu Kalunga

Vutumbe vwakutsiya Yesu

¹ Omo Yesu wamanesele kulongesa vyuma vyoshe evi, wendekele kuli vandongisi vendi ngwendi,

² “Mwazivuka ngeci omo kwita matangwa avali lika, kukakala Ciwano ca Pasovala, co Muna Munu vakamwana ngeci vamushukike a cilindakano.”

³ Asinoni vakulunu va vaka-kukombelela na vakulunu va vaYunda valikungulwile amo mu lipela lya Kayafase Muka-kukombelelela Wakama.

⁴ Co valingile munga ali Yesu ngeci vawane ngila imo yakumuseveleka nakumukwata ngeci vamutsiye.

⁵ Oloni valyendekesele akati kavo ngwavo, “Kesi tumukwate a simbu ya ciwano, kutewa vanu vakalinga muyoyo.”

Vavwavesa Yesu ku Mbeteniya

⁶ Omo Yesu wakele mu Mbeteniya ku njuvo ya Simoni, munalume umo uje wayandele manene ku mushongo wa mbumba.

⁷ Omo Yesu wakele nakulya ku mesa, munakazi umo wezile kuli ikeye wakele na lilulu lyakushula lya mazi a ndando yakama akunika lwengo lwaluvwa aje etilile ku mutwe wa Yesu.

⁸ Oloni omo vandongisi vendi vacimwene, valuvalele manene vendekele ngwavo, “Omwo vikajo alinakuviisa awa mazi ngacije?

⁹ Omwo mazi awa vanapandele kuwalandesa ndando yakama nakwana vimbongo ku tuutu!”

¹⁰ Oloni Yesu wazivukile vije vivakele nakwendeka, wendekele kuli vakevo ngwendi, “Omwo vikajo mulinakupakesa ou munakazi? Omwo napanga cuma cacivwa manene ali yange.

¹¹ Omwo tuutu muli navo simbu yoshe, oloni yange kunjikakala neni simbu yoshe embwe.

¹² Akwitila awa mazi a muvila wange, nacilingila mukunjivwaesela kunjitsinda.

¹³ Mwa vushunga njimileka ngwange, kwoshe-ikwoshe kuvakambulwila evi vin̄anda vyavivwa mu kaye koshe neci lalo canalingi ou munakazi, vakacambulula nakumwanukilao.”

Yundasa atava kwenda Yesu vungungu

¹⁴ Asinoni ndongisi umo uje wavulikumi na vavali, lizina lyendi Yundasa Isikalyote, waile kuli vakulunu va vaka-kukombelela,

¹⁵ co wavehwile ngwendi, “Vikajo mukanjana nga njikamisholwelaye?” Co vamufwetele makumi atatu a vimbongo vya siliva.

¹⁶ Co kutunda aje vene Yundasa washakezekele ngila imo yaivwa yakwenda Yesu vungungu.

Yesu alya na vandongisi vendi ku Ciwano ca Pasovala

¹⁷ A litangwa lyakulivanga lya Ciwano ca Makende Akujeneka Musima, vandongisi va Yesu vezile kuli ikeye vamwihwile ngwavo, “Kulijo ushaka ngeci tukakuvwaeseleko kulya kwa Ciwano ca Pasovala?”

¹⁸ Wavalekele ngwendi, “Yeni ku munu umo mu nganda, co mukamuleka ngweni, ‘Mulongisi nendeka ngwendi, simbu yange inete, njikalingila Ciwano ca Pasovala mu njuvo yove amo na vandongisi vange.’ ”

¹⁹ Co vandongisi vendi valingile muje mwavalekele Yesu, co vavwaesele vyakulya vya Ciwano ca Pasovala.

²⁰ Omo vetele ku cingwezi, Yesu na vaje likumi na vavali vatumbamene ku mesa nakulya.

²¹ Co omo vakele nakulya Yesu wendekele kuli vandongisi vendi ngwendi, “Mwa vushunga njimileka ngwange umo akati keni akanjenda vungungu.”

²² Co vandongisi vendi vakele na vusiwa manene, co vashangumukile kumwihula umo na umo ngwavo, “Mwa vushunga vene, Mwene aamo yange ndi?”

²³ Yesu wavakumbulwile ngwendi, “Ou vene natanta amo nange mu lilonga omo tunakele nakulya, ikeye vene akanjenda vungungu.

²⁴ Muna Munu akatsa ngwe muje muvasonekele, oloni ngongo yendi uje enda Muna Munu vungungu! Mwamuvwa kuli munu uje nga kasemukile!”

²⁵ Yundasa uje vene wamwendele vungungu, wamwihwile ngwendi, “Mwa vushunga Mulongisi, yange vene ndi?” Yesu wamukumbulwile ngwendi, “Omo vene muunendeka.”

Mesa ya Mwene

²⁶ Omo vakela nakulya, Yesu wanonele likende, walombele lilombelo lyakukandelela, co walipazwile, co walyanene kuli vandongisi vendi ngwendi, “Tambuleni mulye. Eli linapu muvila wange.”

²⁷ Asinoni Yesu wanonele lalo nganja ya vinyu, wakandelelele kuli Njambi, co wavaneneyo nakwendeka ngwendi, “Nwenimo mulishumwine muvavoshe,

²⁸ omwo vinyu evi vinapu maninga ange aje anakolesa cikumiiyo ca Njambi, akwitikila ali vanu vavangi mukuvasambesa ku milonga yavo.

²⁹ Njimileka ngwange, kutunda lelo kunjikanu neni lalo vinyu kuvanga noo a litangwa lije njikanwa neni vyaviha mu Vumwene vwa Tate.”

³⁰ Co omo vamanesele kwimba mwaso, co vatuukile vaile ku Munkinda wa Oliveta.

Yesu endeka ngeci Petulu akamuvyana

³¹ Asinoni Yesu wavalekele ngwendi, “Ku vutsiki vuno vene, yeni voshe mukatewa nakunjiseza ange lika, omwo visoneka vinendeka ngwavyo, ‘Njambi akatsiya kanyungi, co vutanga vwa vimanga vukalishandoka!’

³² Oloni omo njikasanguka, njikalivanga kuya kulutwe lweni ku Ngalileya.”

³³ Petulu wendekele nendi ngwendi, “Nameme voshe vakakuseza yange kunjikakuseza nalumo lwai!”

³⁴ Yesu wakumbulwile Petulu ngwendi, “Mwa vushunga njikuleka ngwange, vutsiki vuno vene simbu ndemba kanda atambeke, ukanjivyana visimbu vitatu ngwove kuunjizivuka.”

³⁵ Petulu wamukumbulwile ngwendi, “Kunjikendeka ngwange kunjikuzivuka, nameme kutsa vene njikatsa amo nove!” Co na vandongisi vakwavo voshe vendekele cuma cimo.

Yesu alombela mu Ngetesemani

³⁶ Asinoni Yesu waile ku mutambela wa Ngetesemani na vandongisi vendi, wendekele ngwendi, “Tumbameni kuno simbu njilinakuya mukulombela.”

³⁷ Co ikeye waile amo na Petulu na vaje vana va Zembendeo vavali, washangumukile kuzeya mu mbunge nakuvupuka manene.

³⁸ Co ikeye wendekele navo ngwendi, “Mbunge yange inazeye na vusiwa vwakama manene vwakunjitwala ku kutsa vene. Njivandameneni kuno nakukengelela amo nange.”

³⁹ Co washwenyeleko kulutwe kamandondo, wavulumanene, co walombelele ngwendi, “Tate, nga citava, nganja eyi ya kayando itunde kuli yange! Kesi ngwe mwaya cizango cange embwe, oloni cizango cove cilingiwe.”

⁴⁰ Asinoni Yesu welukile kuli vandongisi vendi vaje vatatu, co wavawanene vanalala tulo, wendekele kuli Petulu ngwendi, “Kuma kumwasa kukengelela amo nange, nameme simbu imolika?

⁴¹ Toneni nakulombela kutewa mukovela mu vyeseko. Mbunge ishaka vene, oloni muvila unazeye.”

⁴² Lalo simbu yamucivali waile, co walombelele ngwendi, “Tate, nga nganja eyi ya tuyando kuyasa kunjituvakana kuvanga njiinwe, cizango cove cilingiwe.”

⁴³ Co welukile lalo, wawanene vandongisi vendi vanalala tulo, omwo mesho avo alemene manene na tulo.

⁴⁴ Ngecivene, Yesu wavasezele lalo, waile nakulombela simbu yamucitatu nakwendeka majwi amolika.

⁴⁵ Asinoni welukile kuli vandongisi vendi, wavehwile ngwendi, “Kuma anga munacilala nakuhwima ndi? Kengeni! Simbu inete laja, omwo Muna Munu valinakumwana ku nzili ya vaka-vuvi.

⁴⁶ Indukeni, tuyeni. Kengeni, munalume ou alinakunjenda vungungu ali kuno!”

Yesu vamukwata

⁴⁷ Omo Yesu wacikele nakwendeka navo, Yundasa, umo wa vaje likumi na vavali wetele. Co wezile na mbunga yakama vambatele mikwale na vimbweti, vavatumine kuli vakulunu va vaka-kukombelela na kuli vakulunu va vaYunda.

⁴⁸ Muka-kumwenda vungungu wavanene cizivukiso ngwendi, “Uje munalume injikatsemba ikeye vene imushaka. Mukwateni!”

⁴⁹ Co Yundasa wetele washungamene vene ali Yesu, co wendekele kuli Yesu ngwendi, “Kwoloka kukale neni Mulongisi,” co wamutsembele.

⁵⁰ Yesu wamukumbulwile ngwendi, “Ove mukwetu, linga vwasi cije ciwushaka kulinga.” Asinoni vezile, vamukwatele nakumuvumbatela manene.

⁵¹ Co umo uje wakele na vaje vakele na Yesu, washomwene mukwale wendi, co wavatwile litwi lya ndungo ya Muka-kukombelela Wakama.

⁵² Asinoni Yesu wamulekele ngwendi, “Shomeka mukwale wove mu cindalo cawo, omwo voshe vaje vapangesa mikwale yavo vakanyonga ku mikwale yavo.

⁵³ Kuma kuuzivuka ngeci yange njasa kulomba Tate ngeci anjikwase? Co vwasi-vwasi asa kunjitumina vimbunga vya mashwalale va tungelo likumi na vivali ndi?

⁵⁴ Oloni a vyuma vyangacije, co vatijo visoneka vyasa kupwamo, vije vinendeka ngeci vinapande kulingiwa mu cifwa eci vene?”

⁵⁵ Asinoni Yesu wendekele na mbunga ije ngwendi, “Kuma munaija na mikwale na vimbweti mukunjikwata ngwe lipwepwe ndi? Njatumbamene nakulongesa mu Njuvo ya Shukulu Kalunga matangwa oshe, co kumwanjikwatele.

⁵⁶ Oloni vyoshe evi vyalingiwa ngeci vije vivendekele vaka-kwimanena mu visoneka vilingiwe.” Aje vene vandongisi vendi voshe vamusezele, co vatewele.

Vasompa Yesu ku mesho a munga

⁵⁷ Co vaje vakwatele Yesu wamutwalele ku njuvo ya Kayafase, Muka-kukombelela Wakama, kuje kuvakungulukilile valongisi va majwi a Lishiko na vakulunu.

⁵⁸ Oloni Petulu wamukavele alyala kamandondo, noo vetele ku cipango ca njuvo ya Muka-kukombelela Wakama. Co wakovelele mukati, watumbamene amo na vaka-kunyunga, ngeci amone muvihwila vyuma vyoshe.

⁵⁹ Vakulunu va vaka-kukombelela na vaka-Munga voshe vashakele ngila yakuwana vukaleo vwa makuli vwakuvangela Yesu ngeci vamutsiye,

⁶⁰ nameme kwezile vakaleo vavangi va makuli, oloni kuvavuwanene. Akukotoka, vanalume vavali vaile,

⁶¹ vendekele ngwavo, “Ou munu wendekele ngwendi, ‘Yange njasa kusiwula eyi Njuvo ya Shukulu Kalunga, co lalo njasa kuyitunga a matangwa atatu lika.’ ”

⁶² Co uje Muka-kukombelela Wakama wemanene nakwendeka kuli Yesu ngwendi, “Kuma yove kuwesi na majwi akukumbulula a vyuma evi valinakukuvangela ngeci ndi?”

⁶³ Oloni Yesu wolokele kuluu. Co Muka-kukombelela Wakama wendekele kuli ikeye lalo ngwendi, “Mu lizina lya Njambi wakuyoya, ololo njikuleka ulisinge ngeci utuleke nga yove u Wakuvwavesa, Muna Njambi.”

⁶⁴ Yesu wamukumbulwile ngwendi, “Muunendeka mukemwo vene. Oloni njimileka muvavoshe ngwange, tunde a simbu ino mukamona Muna Munu natumbama ku livoko lya cilyo lya Muka-nzili yoshe, alinakwija a mashelwa!”

⁶⁵ A majwi awa, Muka-kukombelela Wakama watavwile vuzalo vwendi nakwendeka ngwendi, “Nashaula Njambi! Vikajo lalo tucishakezekela vukaleo vweka? Ololo vene mwalizivila kushaula kwendi a majwi endi!

⁶⁶ Mwayongola vati?” Vakevo vamukumbulwile ngwavo, “Ali na mulonga, napande kutsa vene.”

⁶⁷ Asinoni vamujekwilile mate ku mesho, co vamupupile vimbanda

⁶⁸ vendekele kuli ikeye ngwavo, “Twambulwile vuka-kwimanena, yove Wakuvwavesa! Tuleke iya nakupupu.”

Petulu avyana Yesu

⁶⁹ Petulu watumbamane anja mu lipela omo kwezile umo mumbanda ngamba ya Muka-kukombelela Wakama, co wendekele kuli Petulu ngwendi, “Nove lalo wakele amo na Yesu wa ku Ngalileya.”

⁷⁰ Oloni Petulu wavyanene ku mesho avo voshe, wakumbulwile ngwendi, “Yange kunjizivuka evi ulinakwendeka.”

⁷¹ Co Petulu waile ku cikolo ca mbanja. Co ngamba mukwavo wamumbanda wamumwene wendekele na vanalume vaje vakele kuje ngwendi, “Ikeye wakele amo na Yesu wa ku Nazaleta.”

⁷² Co lalo Petulu wavyanene nakukumbulula ngwendi, “Njilisinga ngwange kunjimuzivuka ou munalume!”

⁷³ Omo kwetile kasimbu kakandondo lika, co vaje vanalume vemanene kuyehi vezile, vendekele na Petulu ngwavo, “Mwa vushunga vene nove unapu umo wavo, omwo endekesi yove ikeyo inakujombolola!”

⁷⁴ Asinoni Petulu wendekele ngwendi, “Njilisinga ngwange njilinakumileka vushunga! Njambi anjihise nga kesi ngoco! Yange kunjimuzivuka ou munalume!” Aje vene ndemba watambekele,

⁷⁵ co Petulu wanukile lijwi lya Yesu, omo wendekele nendi ngwendi, “Simbu ndemba kanda atambeke, ukanjivyana visimbu vitatu.” Co watuukile anja walilile manene.