Mateo 25 - Livulu lya Shukulu Kalunga

Cisimo ca vambanda likumi

¹ “Asinoni Vumwene vwa mwilu vukafwa ngwe vambanda likumi, vaje vambatele mazi mu vindeya vyavo vaile nakushesha vavenya vulo.

² Vatanu vapwile vakweva, co vatanu lalo vapwile vakunyanyama.

³ Omwo vaje vakweva vambatele vindeya lika, kuvambatele mazi.

⁴ Oloni vaje vakunyanyama vambatele mazi mu malulu amo na vindeya vyavo.

⁵ Omo vavenya vulo weshwalele, ngecivene, vaje vambanda vanengukile vaile mu tulo.

⁶ “Oloni mukati ka vutsiki vazivile mutambi ngwavo, ‘Kengeni, vavenya vulo alinakwija, tuukeni mukamusheshe!’

⁷ Asinoni vaje vambanda voshe vendukile nakushwameka vindeya vyavo.

⁸ Co vaje vakweva vendekele kuli vaje vakunyanyama ngwavo, ‘Twaneniko mazi eni, omwo vindeya vyetu vilinakuzima.’

⁹ Oloni vaje vakunyanyama vavakumbulwile ngwavo, ‘Embwe, kutupwisamo neni netu. Yeni ku vaka-kulandesa mukalilandele yeni vavenya.’

¹⁰ Co omo vambanda vakweva vaile nakulanda mazi, co vavenya vulo wetele, na vaje vambanda vatanu valivwaeselele cimweja vakovelele amo nendi ku ciwano ca vushombolwa, co vashokele lipito.

¹¹ “Munima lalo vaje vambanda vakwavo vezile, vendekele ngwavo, ‘Mwene! Mwene! Tushokolweleniko.’

¹² Oloni wavakumbulwile ngwendi, ‘Mwa vushunga njimileka ngwange, kunjimizivuka.’ ”

¹³ Co Yesu wamanesele kwendeka ngwendi, “Nyanyameni omwo kumuzivuka litangwa nambe simbu.

Cisimo ca vangamba vatatu

¹⁴ “A simbu ije vene Vumwene vwa mwilu vukafwa ngwe munalume umo waile vungenzi ku lifuti lyakulyala, co wasanene vangamba vendi, co wavanene moko a vufuko vwendi.

¹⁵ Waanene kuli umo na umo ngwe ku mana endi, umo wamwanene vimbongo vya ngolinde vyakupwa 5,000 mukwavo wamwanene vimbongo vyakupwa 2,000, co mukwavo wamwanene vimbongo vyakupwa 1,000. Asinoni wakatukile waile vungenzi vwendi.

¹⁶ Uje ngamba watambwile vimbongo vyakupwa 5,000 waile nakukasekasana, wawaneneo lalo vimbongo vyakupwa 5,000.

¹⁷ Mu ngila imo lalo ngamba uje watambwile vimbongo vyakupwa 2,000 waile nakukasekasana, co wawaneneo lalo vimbongo vyakupwa 2,000.

¹⁸ Oloni ngamba uje watambwile vimbongo vyakupwa 1,000 waile, co wakendile citeke washitikile vije vimbongo vya shukulu yendi.

¹⁹ “Omo kwetile matangwa amangi, co uje shukulu ya vangamba vaje welukile, walavele amo navo vije vimbongo vyendi.

²⁰ Co uje ngamba watambwile vimbongo vyakupwa 5,000 wezile, co waanene vimbongo vyeka lalo vyakupwa 5,000, wendekele ngwendi, ‘Shukulu, mwanjanene vimbongo vyakupwa 5,000. Kengeni! Njinawanao lalo vimbongo vyeka vyakupwa 5,000.’

²¹ Shukulu yendi wamukumbulwile ngwendi, ‘Unalingi mwamuvwa manene, u ngamba wamuvwa wa kulongwa! Walongwele ku vyuma vyavindondo, ngecivene, njikakupwisa muka-kunyunga vimbongo vyavingi. Kovela mukuvwaelela kwa shukulu yove!’

²² “Na uje ngamba watambwile vimbongo vyakupwa 2,000 nendi lalo wezile, co wendekele ngwendi, ‘Shukulu, mwanjanene vimbongo vyakupwa 2,000. Kengeni! Njinawanao lalo vimbongo vyeka vyakupwa 2,000.’

²³ Shukulu yendi wamukumbulwile ngwendi, ‘Unalingi mwamuvwa manene, u ngamba wamuvwa wa kulongwa! Walongwele ku vyuma vyavindondo, ngecivene, njikakupwisa muka-kunyunga vimbongo vyavingi. Kovela mukuvwaelela kwa shukulu yove!’

²⁴ Asinoni uje ngamba watambwile vimbongo vyakupwa 1,000 nendi wezile, wendekele ngwendi, ‘Shukulu, njakuzivukile ngwange wapwa u munu wamukalu manene, ukateje kuje kuwakuvile, co ukongulula kuje kuwashandwelele.

²⁵ Ngecivene, njazivile lyova, co njaile nakushitika vimbongo vyove mu livu. Kenga! Vimbongo vyove evi.’

²⁶ Oloni shukulu yendi wamukumbulwile ngwendi, ‘Ove ngamba wamuvi wa vulwa! Wanjizivukile ngwove yange njikateje kuje kunjakuvile, nakukungulula kuje kunjashandwelele?

²⁷ Mwamuvwa nga waanene oyo mbongo yange kuli vaka-kusekasana, co yange omo njinaija nga njinawana mbongo yange amo nakakondweso kayo.

²⁸ Ngecivene, munyekeni ovyo vimbongo, co muvyane kuli uje ali na vimbongo vyakupwa 10,000,

²⁹ omwo uje alinavyo vakamuwezelelako, co akakala na vyavingi, oloni uje kesi navyo, nameme vene vije vyavindondo vyalinavyo vakamutambulavyo.

³⁰ Co ngamba wangacije, mumbileni anja mu lisusulungu, kuje akalila nakulingenjenga ku mayo.’

Kusompa kwakumaneselela

³¹ “Omo Muna Munu akaija mu vumpau vwendi amo na tungelo twendi voshe, akatumbama a litanda lyendi lya vumwene.

³² Co miyati yoshe vakakungulukila kuli ikeye. Asinoni akavangununa vamo oku, vakwavo oku, ngwe muje kanyungi akaangununa vimanga kuvatundisa ku vimembe.

³³ Co akaka vimanga ku livoko lyendi lya cilyo, oloni akaka vimembe ku livoko lyendi lyacimwoshwe.

³⁴ Asinoni mwene akendeka kuli vaje vali ku livoko lyendi lya cilyo ngwendi, ‘Ijeni, yeni vaanavezikisa Tate! Shwaneni vumwene vuje vamivwaeselele tunde kukutanga kwa kaye.

³⁵ Omwo njakele na njala, co mwanjilisile, njakele na lihwila, co mwanjinwisile, njapwile nji mungenzi, co mwanjitambwile,

³⁶ njakele na vuzu, co mwanjizikile, njakele nakuvinja, co mwanjimenekelele, njakele mu kamenga, co mwezile kuli yange.’

³⁷ “Asinoni vaka-vushunga vakamukumbulula ngwavo, ‘Mwene, simbu ikajo twakumwene uli na njala, co twakulisile, nambe simbu ikajo twakumwene uli na lihwila, co twakunwisile?

³⁸ Co simbu ikajo twakumwene u mungenzi, co twakutambwile, nambe na vuzu, co twakuzikile?

³⁹ Co simbu ikajo twakumwene ulinakuvinja, nambe uli mu kamenga, co twezile kuli yove?’

⁴⁰ Co mwene akavakumbulula ngwendi, ‘Mwa vushunga njimileka ngwange, omo mwacilingile kuli umo wa ava vavandondo vasamba vange, mwacilingile kuli yange!’

⁴¹ “Asinoni akendeka lalo kuli vaje vali ku livoko lyendi lyacimwoshwe ngwendi, ‘Tundeni kuli yange, yeni vaka-cisingo! Yeni mu tuhya tuje tuvavwaeselele Satana na tungelo twendi!

⁴² Omwo njakele na njala, co kumwanjilisile, njakele na lihwila, co kumwanjinwisile,

⁴³ njapwile nji mungenzi, co kumwanjitambwile, njakele na vuzu, co kumwanjizikile, njakele nakuvinja na mu kamenga, co kumwanjimenekelele.’

⁴⁴ “Asinoni vakamukumbulula ngwavo, ‘Mwene, simbu ikajo twakumwene uli na njala, nambe na lihwila, nambe u mungenzi, nambe na vuzu, nambe nakuvinja, nambe mu kamenga, co tujeneke kukukwasa?’

⁴⁵ Asinoni akavakumbulula ngwendi, ‘Mwa vushunga njimileka ngwange, omo kumwacilingile kuli umo wa ava vavandondo, kumwacilingile kuli yange.’

⁴⁶ Co ava vakakovela mu tuyando twa myaka yoshe, oloni vaka-vushunga vakakovela mu mwonyo wa myaka yoshe.”