Mateo 24 - Livulu lya Shukulu Kalunga

Yesu endeka a kunyonga kwa Njuvo ya Shukulu Kalunga

¹ Yesu watuukile mu Njuvo ya Shukulu Kalunga, washakele kuya, omo vandongisi vendi vezile kuli ikeye vamumwesele vinjuvo vya Njuvo ya Shukulu Kalunga.

² Oloni Yesu wendekele ngwendi, “Munamono vinjuvo vyoshe evi ndi? Kukukakala limanya limo likasala mu mutambela walyo, oshe akasiwuka.”

Tuyando na mapakeso

³ Co Yesu watumbamene a Munkinda wa Oliveta, vandongisi vendi vezile kuli ikeye mu vushweke, vamwihwile ngwavo, “Tuleke mwaka uka evi vyoshe vikasholoka, co cizivukiso mukajo tukazivuka naco kwija kwove nakukotoka kwa kaye?”

⁴ Co Yesu wavakumbulwile ngwendi, “Nyanyameni, co kesi mutave umo amikwise.

⁵ Omwo vanu vavangi vakaija mu lizina lyange vakendeka ngwavo, ‘Yange vene Wakuvwavesa!’ Co vakatangula vavangi.

⁶ Mukaziva vinzita na lingwavo lya vinzita, oloni kesi mukajujuke. Omwo vyuma evi vinapande kusholoka, oloni kuvilumbununa ngeci kukotoka kwa kaye kunete.

⁷ Omwo lifuti limo likalwa nzita na lifuti likwavo, co vumwene vukalwisa vumwene vukwavo. Kukakala njala ya lyangengela, na mandunduma ku mitambela yakuliseza-seza.

⁸ Vyuma vyoshe evi vinapu ngwe kushangumuka kwa mushongo wakukita mwana.

⁹ “Asinoni vakamikwata nakumiyandesa nakumitsiya, co miyati yoshe vakamizinda omwo lizina lyange.

¹⁰ Co vavangi kuvakanjikulaela a simbu ije, co vakalyenda vungungu umo na mukwavo.

¹¹ Co vaka-kwimanena va makuli vavangi vakasholoka, co vakatangula vanu vavangi.

¹² Co omwo vuvi vunatumu, cizemo ca vanu ku vakwavo vanu cikatonola.

¹³ Oloni woshe uje akakateya na ku shongo akovoka.

¹⁴ Co evi Vin̄anda Vyavivwa vya Vumwene vakavyambulula mu kaye mwoshe ngwe kupwa vukaleo ku miyati yoshe, co asinoni kukotoka kwa kaye kukaija.

Cimweso ca Vunyengwe

¹⁵ “Ngecivene, mukamona Cimweso ca Vunyengwe cije cendekele Ndanyele cinemana mu mwela wakujela.” (Yove ulinakulava zivisisa muvinalumbunukila!)

¹⁶ “Asinoni vaje vali mu Yundeya vakatewele ku malundu.

¹⁷ Munalume uje ali akamwa ya njuvo yendi kesi akashulukeo nakwambata vije vili mu njuvo yendi.

¹⁸ Co munalume uje ali mu lihya lyendi kesi akeluke nakwambata cikoveyo cendi.

¹⁹ Co luvinda ku vanakazi vaje vakakala na tufumba, na vanakazi vaje vakajamwesa a simbu ije!

²⁰ Lombeleni kuli Njambi ngeci kesi mukatewe a simbu ya cisika, nambe a Litangwa Lyakuhwima!

²¹ Omwo a matangwa aje kukakala n̄avava ije kanda vaimoneo laja tunde akutanga kwa kaye kweta nalelo lino. Nambe kulutwe kuyikakalako lalo.

²² Co nga Njambi kaakeesele matangwa aje, nga munu naumo wai akovoka. Oloni naakeesa omwo vanu vendi vaje vaangwile.

²³ “Asinoni, nga munu umo akamileka ngwendi, ‘Kengeni, ali kuno Wakuvwavesa,’ nambe ‘Uje ali kuje,’ kesi mukamukulaele.

²⁴ Omwo kukasholoka vaKuvwavesa va makuli na vaka-kwimanena va makuli, vakamwesa vizivukiso na vikomokeso vyakama, ngecivene, vakatangule nameme vaje vavaangwile kuli Njambi nga citava.

²⁵ Tolilileni! Njinamilekela cimweja omo simbu kanda yete.

²⁶ “Ngecivene, nga vakamileka ngwavo, ‘Kengeni, ali mu mambo,’ kesi mukayemo, nambe nga vakendeka ngwavo, ‘Kengeni, navanda kuno,’ kesi mukavikulaele.

²⁷ Omwo Muna Munu akaija ngwe muhyato utunda mu ngangela kweta na mu kangombe ka yambi.

²⁸ “Kwoshe kuje kuli civimbi kukekwo kukalingulwila makuvi.

Kwija kwa Muna Munu

²⁹ “Vwasi-vwasi omo tuyando twa a matangwa aje tuneti, litangwa likazivala vwii, co ngonde kuyikatu lyezi, co vingongonosi vikawila asi, co vinzili vya mwilu vikaninganga.

³⁰ Asinoni cizivukiso ca Muna Munu cikasholoka mwilu, co miyati yoshe ya ano asi vakalila mbimbi-mitwe omo vakamona Muna Munu alinakwija a mashelwa na nzili na vumpau vwakama.

³¹ Co lupembo lwakama lukaimba, co akatuma tungelo twendi ku vimbango viwana vya ano asi, co vakakungulula vanu vendi vaje vaangwile kutunda ku shongo imo ya kaye nakweta ku shongo ikwavo ya kaye.

Cilongesa ca muti wa mukuyu

³² “Lilongeseni mana ku cisimo ca muti wa mukuyu. Omo minango yawo ijovelela, mwazivuka ngweni nyangao ili muyehi.

³³ Ngecivene, omo mukamona vyuma vyoshe evi, mukazivuka ngeci ikeye ali muyehi, ku cikolo vene.

³⁴ Mwa vushunga njimileka ngwange, vyuma vyoshe evi vikalingiwa simbu kanda vanu ava valinakuyoya ololo voshe vatse.

³⁵ Lilu na asi vikaita, oloni majwi ange kuwakaiti embwe.

Naumo wai azivuka litangwa nambe simbu

³⁶ “Oloni litangwa lije, nambe simbu ije, naumo wai avizivuka, nambe tungelo va mwilu, nambe Mwana, oloni Ishe lika ikeye azivuka.

³⁷ Ngwe mucafwile a matangwa a Nowa, ngecivene, mucikafwa akwija kwa Muna Munu.

³⁸ A matangwa aje omo livazi kanda lyete, vanu valile, vanwile, vambatele, nakushombwesa, noo a litangwa lije omo Nowa wakovelele mu vwato,

³⁹ oloni kuvazivukile cuma muka cikalingiwa noo livazi lyezile, co voshe vanyongele. Mukemwo mucikafwa omo Muna Munu akaija.

⁴⁰ A simbu ije vanu vavali vakapanga mu lihya, umo vakamwambata, mukwavo vakamuseza.

⁴¹ Vanakazi vavali vakatwa mu n̄unju imo, umo vakamwambata, mukwavo vakamuseza.

⁴² “Ngecivene, nyanyameni omwo kumuzivuka simbu ije yakaija Mwene yeni.

⁴³ Oloni zivukeni ngweni, nga vavenya njuvo nazivukile simbu yakaija mwizi, nga natumbamene nakutona ngeci mwizi kesi atuve njuvo yendi.

⁴⁴ Ngecivene, neni livwaeseleni cimweja, omwo Muna Munu aija a simbu ije vene kumwayongwele ngweni aija.

Ngamba wa kulongwa nou wakujeneka kulongwa

⁴⁵ “Iyajo napu ngamba wa kulongwa nakunyanyama? Ikeye uje shukulu yendi namusezela kunyunga vakwavo vangamba nakuvana vyakulya a simbu yaivwa.

⁴⁶ Navezika ngamba uje, omo shukulu yendi akaija, co akumuwana alinakulinga ngeci.

⁴⁷ Mwa vushunga njimileka ngwange, shukulu yendi akamwana moko yakumunyungila vyuma vyendi vyoshe.

⁴⁸ Oloni nga ikeye napu ngamba wamuvi, endeka mu mbunge yendi ngwendi shukulu kaija vwasi,

⁴⁹ co ashangumuka kupupanga vakwavo vangamba, co alya nakunwa amo na vaka-kupenda.

⁵⁰ Asinoni shukulu yendi akaija a litangwa limo a simbu ije kayongwele ngwendi ikeyo yakeluka.

⁵¹ Co shukulu yendi akamumbila anja, co akaya ku cihiso amo na vaka-civembulu. Kuje akalila nakulingenjenga ku mayo.