Mateo 22 - Livulu lya Shukulu Kalunga

Cisimo ca ciwano ca vulo

¹ Co lalo Yesu wapangesele visimo omo wendekele na vanu ngwendi,

² “Vumwene vwa mwilu vunalifu ngwe mwene walingile ciwano ca vulo vwa munendi wa munalume.

³ Co watumine vangamba vendi mukuleka vaje vavalanyele ku ciwano, oloni vakevo vavyanene.

⁴ Ngecivene, watumine vangamba vakwavo lalo kuli vaje vavalanyele ngwendi, ‘Kengeni, njavwaesa laja vyakulya vyange, vingombe vange na vimuna vange vakununa vanavatsii laja, co vyuma vyoshe vinavwaa laja. Ijeni ku ciwano ca vulo!’

⁵ Oloni vaje vavalanyele kuvombileko mbunge, vaile ku vipangi vyavo, umo waile ku lihya lyendi, mukwavo lalo waile ku venda yendi,

⁶ vamoco vakwatele vaje vindungo, vavapupile nakuvatsiya.

⁷ Mwene waluvalele manene, co watumine mashwalale vendi vaile nakutsiya vaje vatsiile vaje vindungo, co venyekele nganda yavo.

⁸ Asinoni wendekele kuli vangamba vendi ngwendi, ‘Ciwano ca vulo vanacivwaesa laja, oloni vanu vaje vavalanyele kuvezileko.

⁹ Ngecivene, yeni ku masambwa-ngila, co voshe vamuwanako vasaneni vaije ku ciwano.’

¹⁰ Ngecivene, vaje vangamba vaile kuje ku masambwa-ngila, co vanenele vanu voshe vaje vavawaneneko, vavavwa na ava vavavi, co ije njuvo ya ciwano ca vulo yashulile ya vanu.

¹¹ “Oloni omo mwene wakovelelemo mukumona vaje vangenzi, co wawanenemo munu umo uje kazalele cikoveyo ca ciwano ca vulo.

¹² Co mwene wamwihwile ngwendi, ‘Musamba, vatijo unakovelele muno kujeneka vuzalo vwa ciwano ca vulo?’ Oloni uje munu wolokele kuluu nacimo cai cendekele.

¹³ Asinoni mwene walekele vangamba vendi ngwendi, ‘Mukuteni ku mavoko na ku mendi, co mumbileni anja mu lisusulungu, kuje akalila nakulingenjenga ku mayo.’ ”

¹⁴ Co Yesu wamanesele kwendeka ngwendi, “Vavangi vanavalanya, oloni vavandondo lika vavanaangula.”

Cihula ca kufweta lisimu

¹⁵ Asinoni vaFaliseo vaile nakutumba vutumbe ngeci vakamweseke na vihula.

¹⁶ Co vatumine vandongisi vavo vamo kuli Yesu naveka lalo vaka-munga ya Helonde ngwavo, “Mulongisi, twazivuka ngwetu yove ukendeka vushunga, co ukalongesa vushunga vwa cizango ca Njambi ali munu, kujeneka kulipesa a viyongola vya vanu, omwo kuwesi kukenga ali munu nambe wapwa wa vulemu nambe kesi wa vulemu.

¹⁷ Tuleke, wayongola vati? Kuma Lishiko lyetu livindika kufweta lisimu kuli Sezale mwene wa vaLoma indi embwe?”

¹⁸ Oloni Yesu wazivukile laja viyongola vyavo na vutumbe vwavo vwavuvi, co wendekele ngwendi, “Yeni vaka-civembulu! Vikajo mulinakunjesekela?

¹⁹ Njimweseni mbongo yakufweta lisimu!” Co vamwanene mbongo imo,

²⁰ co wavehwile ngwendi, “Cihanga ceya na lizina lyeya evi viliho?”

²¹ Vamukumbulwile ngwavo, “Vya Sezale.” Asinoni Yesu wendekele kuli vakevo ngwendi, “Mwamuvwa, ngecivene, aneni kuli Sezale vije vinakundama kuli Sezale, co aneni kuli Njambi vije vinakundama kuli Njambi.”

²² Omo vazivile ngacije, valikomokelele, co vamusezele vaile.

Cihula ca kusanguka ku vatsi

²³ A litangwa lije vene vaSanduki vamo vezile kuli Yesu nakwendeka ngeci vanu kuvakasanguka ku vatsi.

²⁴ Vamwihwile ngwavo, “Mulongisi, Mosesa watusonekelele ngeci nga munalume umo kesi na vana atsa, ndolome yendi ambate uje fwile ngeci vakase kukala na vana ali uje natsi.

²⁵ Kwakele vandolome vatanu na vavali. Wa mukulunu wambatele munakazi, co watsile kujeneka vana, ngecivene, wasezele uje fwile kuli ndolome yendi.

²⁶ Cuma cimo calingiwile kuli ndolome yendi wamucivali, na kuli wamucitatu, co na kuli voshe vaje vatanu na vavali.

²⁷ Akukotoka kwa vyoshe evi uje munakazi watsile.

²⁸ A litangwa lije omo vatsi vakasanguka, uje munakazi akapwa weya akati ka vaje voshe vamwambatele vatanu na vavali?”

²⁹ Oloni Yesu wavakumbulwile ngwendi, “Yeni mwasevuka! Omwo kumuzivuka Visoneka nambe nzili ya Njambi.

³⁰ Omo vatsi vakasanguka, vakevo vakafwa ngwe tungelo vali mwilu, co kuvakambata.

³¹ Co ngwe akusanguka kwa vatsi, kuma kumwalavele vije vyendekele Njambi kuli yeni ngwendi,

³² ‘Yange Njambi ya Avilahama na Njambi ya Isake na Njambi ya Yakomba.’ Ikeye wapwa Njambi wa vaka-kuyoya, kesi wa vaka-kutsa embwe.”

³³ Co omo vije vimbunga vazivileko, valikomokelele akulongesa kwendi.

Lishiko lyakama

³⁴ Omo vaFaliseo vazivile ngeci Yesu nolwesa vaSanduki, valikungulwile amolika,

³⁵ co umo akati kavo wapwile mulongisi wa majwi a Lishiko, wamwihwile cihula cakumweseka.

³⁶ Wamwihwile ngwendi, “Mulongisi, lishiko mukajo lyakama ku Mashiko?”

³⁷ Co Yesu wamukumbulwile ngwendi, “Zema Shukulu Kalunga Njambi yove na mbunge yove yoshe, na mwonyo wove woshe, na mana ove oshe!

³⁸ Eli likelyo lishiko lyakama lyakulivanga.

³⁹ Co lishiko lyamucivali lalo lyakufwa ngwe eli ngwalyo, ‘Unapande kuzema mukweni ngwe muwalizema yove vavenya.’

⁴⁰ Mashiko oshe a Mosesa na vilongesa vya vaka-kwimanena vinemana a mashiko awa avali.”

Cihula ali Wakuvwavesa

⁴¹ Omo vaFaliseo valikungulwile amo, Yesu wavehwile ngwendi,

⁴² “Mulinakuyongola vati ali Wakuvwavesa? Ikeye napu mutekulwila weya?” Vakumbulwile ngwavo, “Ikeye napu mutekulwila wa Ndaviti.”

⁴³ Yesu wavehwile ngwendi, “Omwo vikajo Munzinzime walongesele Ndaviti kwendeka ngwendi, ‘Mwene?’ Ndaviti wendekele ngwendi,

⁴⁴ ‘Shukulu Kalunga wendekele kuli Shukulu yange ngwendi, Tumbama ku livoko lyange lya cilyo, noo njinaka vitozi vove mwisi ya myanja yove.’

⁴⁵ “Nga Ndaviti wamutumbwile ngwendi, ‘Mwene,’ vatijo Wakuvwavesa asa kupwa mutekulwila wa Ndaviti?”

⁴⁶ Co naumo wai wasele kukumbulula Yesu tunde a litangwa lije, naumo wai lalo waashukile kumwihula lijwi limo.