Mateo 20 - Livulu lya Shukulu Kalunga

Vaka-kupanga mu lihya lya mikolovozi ya vushuka vwa vinyu

¹ “Omwo vumwene vwa mwilu vunalifu ngwe vavenya lihya lya mikolovozi ya vushuka vwa vinyu uje watuukile mutondo-tondo waile nakulanya vaka-vipangi ngeci vakapange mu lihya lya mikolovozi ya vushuka vwa vinyu lyendi.

² Ikeye walizivasanene navo kuvafweta fweto ya a litangwa mbongo ya siliva, co wavatumine ku lihya lyendi nakupanga.

³ Co watuukile lalo kuya kuje kwakulandesela a simbu yamucitanu na iwana ku mutondo, co wamwene vakwavo vanemana ngoco kuje,

⁴ ngecivene, wavalekele ngwendi, ‘Neni lalo yeni mukapange ku lihya lyange, njikamifweta muyinapande fweto yeni.’

⁵ Ngecivene, vaile. Asinoni a simbu yamulikumi na ivali na a simbu yamulikumi na vitanu akuteuka kwa litangwa, walingile cuma cimo.

⁶ Co a simbu yamulikumi na vitanu na vivali waile kuje kwakulandesela, co wawanene veka lalo vanemana ngoco. Wavehwile ngwendi, ‘Omwo vikajo munemanena ngoco kuno litangwa lyoshe lyamutunu?’

⁷ Vamukumbulwile ngwavo, ‘Omwo naumo wai natulanya ku vipangi.’ Ikeye wavalekele ngwendi, ‘Yeni mukapange mu lihya lyange lya mikolovozi ya vushuka vwa vinyu.’

⁸ “Co omo vetele ku cingwezi, vavenya lihya walekele muka-kutwamenena vaka-vipangi ngwendi, ‘Sana vaka-vipangi uvane fweto yavo, shangumukila kuli vaka-kukotokela nakutwala kuli vaka-kulivanga.’

⁹ Vanu vaje vashangumukile kupanga a simbu yamulikumi na viitanu na vivali wavafwetele umo na umo mbongo ya siliva.

¹⁰ Ngecivene, omo vaje vaalanyele akulivanga vezile, vayongwele ngwavo vakevo vakatambula vyavingi kutuvakana vakwavo, oloni na vakevo lalo umo na umo watambwile mbongo ya siliva.

¹¹ Vatambwile vimbongo vyavo, co vashangumukile kulinyenyeta kuli uje wavalanyele.

¹² Vendekele nendi ngwavo, ‘Ava vanu vakutokela vanapanga simbu imolika, omo yetu tunapanga litangwa lyoshe lyamutunu nakwenya litanya, co unavafwete kupwisa amo netu?’

¹³ Oloni wakumbulwile umo wavo ngwendi, ‘Tolilila musamba, yange kunjakukwisile. Kuma kutwalizivasanene fweto yakupwa mu mbongo imo ya siliva ndi?

¹⁴ Ambata fweto yove uye. Njishaka kwana kuli ou wakukotokela ngwe munjinana yove.

¹⁵ Kuma kunjapandele kulinga na vimbongo vyange ngwe munjinashakela ndi? Nambe yove kuma uli na cipululu a vungulu vwange ndi?’ ”

¹⁶ Co Yesu wamanesele kwendeka ngwendi, “Ngecivene, vaka-kulivanga vakapwa vaka-kukotokela, co vaka-kukotokela vakapwa vaka-kulivanga.”

Yesu endeka simbu yamucitatu a kutsa kwendi

¹⁷ Co omo Yesu wakele nakuya ku Yelusalema, ikeye waile na vandongisi vendi likumi na vavali kwavo lika nakwendeka navo mu vushweke, omo vakelenakuya mu ngila.

¹⁸ Wavalekele ngwendi, “Tolilileni, tulinakuya ku Yelusalema kuje Muna Munu vakamwana ku mavoko a vakulunu va vaka-kukombelela na kuli valongisi va majwi a Lishiko. Co vakamihisa nakumitwala ku kutsa,

¹⁹ co vakamwana kuli vaje kesi vaYunda vaje vakamushendumuna, nakumupupa, co vakamushukika a cilindakano, oloni omo kuneti matangwa atatu akasanguka.”

Cihula ca cisemi

²⁰ Asinoni munakazi wa Zembendeo wezile kuli Yesu na vana vendi va vanalume vavali, co watsikamene a mavuli ku mesho a Yesu nakumulomba cuma cimo.

²¹ Co Yesu wamwihwile ngwendi, “Vikajo ushaka?” Wamukumbulwile ngwendi, “Tava ngeci vana vange vavali vakatumbame mu Vumwene vwove, umo ku livoko lyove lya cilyo, mukwavo ku livoko lyove lyacimwoshwe.”

²² Oloni Yesu wavakumbulwile ngwendi, “Kumuzivuka eci cuma cimunalombo. Kuma mwasa kunwa ku nganja ya kayando ije injikanwa ndi?” Vamukumbulwile ngwavo, “Twasa.”

²³ Ikeye wavalekele ngwendi, “Mukanwa mwa vushunga mu nganja yange, oloni nzili yakwangula uje akatumbama ku livoko lyange lya cilyo, nameme lyacimwoshe, kunjesi nayo. Oloni myela eyi inapu ya vaje Tate wavavwaeseleleyo laja.”

²⁴ Co omo vaje vandongisi vakwavo likumi vazivile majwi awa, valuvalele na vandolome vavali.

²⁵ Ngecivene, Yesu wavasanene voshe vaije kuli ikeye, wavalekele ngwendi, “Mwazivuka ngweni vaka-kushwana vaje kesi vaka-kukulaela vali na nzili ali vanu vavo, co na vantwama vavo vali na moko yakama ali vakevo.

²⁶ Eyi kesi ikeyo ngila akati keni embwe. Oloni woshe ashaka kupwa wakama, ikeye napande kupwa ngamba ya vakwavo voshe,

²⁷ co woshe ashaka apwe wakulivanga akati keni, ikeye napande kupwa ndungo ya vakwavo voshe,

²⁸ nameme Muna Munu kezile ngeci vanu vamupangele embwe, oloni wezile mukupanga, nakwana mwonyo wendi ngeci apatule vanu vavangi.”

Yesu atonesa mesho a tupuputwa vavali va vanalume

²⁹ Co omo Yesu na vandongisi vendi vatundile ku Yeliko, mbunga yakama yavakavele.

³⁰ Co vanalume vavali va tupuputwa vatumbamene kumukulo wa ngila omwo vazivile ngwavo Yesu alinakwita, vatambekele manene ngwavo, “Ove Muna Ndaviti, tuzivileko mema ku mbunge shukulu!”

³¹ Mbunga ya vanu yavavindikile ngeci voloke kuluu. Oloni vakevo vatambekele manene-nene ngwavo, “Ove Muna Ndaviti, tuzivileko mema ku mbunge shukulu!”

³² Co Yesu wemanene, co wavasanene. Wavehwile ngwendi, “Vika mushaka njimilingilevyo?”

³³ Vamukumbulwile ngwavo, “Shukulu, tushaka ngeci tumone lalo!”

³⁴ Co Yesu wavazivilile mema ku mbunge, wakwatele ku mesho avo, aje vene vatonene, co vamukavele.