Mateo 2 - Livulu lya Shukulu Kalunga

Kwija kwa vaka-mana

¹ Omo Yesu wasemukile mu Mbetelehema, mu lifuti lya Yunda, a simbu ya Mwene Helonde, vaka-mana vatundile mu ngangela, vakevo valilongesele vya vingongonosi, vezile ku Yelusalema

² vehwile ngwavo, “Ulijo mwanike ou nasemuka uje akapwa mwene wa vaYunda? Omwo twamwene ngongonosi yendi ilinakutuuka mu ngangela, ngecivene, tunaija mukumulemesa.”

³ Omo Mwene Helonde wazivile vyuma evi, co walijujukilile manene, amo na voshe vaje vakele mu Yelusalema.

⁴ Co wasanene voshe vakulunu va vaka-kukombelela, na valongisi va majwi a Lishiko wavehwile ngwendi, “Kulijo akasemukila Wakuvwavesa?”

⁵ Vamulekele ngwavo, “Mu Mbetelehema mu Yunda. Omwo vanasoneka ali muka-kwimanena ngwendi,

⁶ ‘Nove Mbetelehema mu lifuti lya Yunda, kesi uwamundondo akati ka vinganda vyakama vya mu Yunda, omwo kuli yove kukatunda muka-kushwana, ikeye akatwamenena vanu vange va Isalele.’ ”

⁷ Ngecivene, Helonde wasanene vaka-mana mu vushweke, co wavakon̄ole simbu ikajo ije ngongonosi yasholokele.

⁸ Co wavatumine ku Mbetelehema wavalekele ngwendi, “Yeni mukehule mwamuvwa ali mwanike ou, omo munamuwana, co mwakunjilekeko, ngeci nange lalo njakuyeko nakumulemesa.”

⁹ Omo vazivile majwi a mwene, vakatukile, vaile, co ije ngongonosi ivamwene mu ngangela yavatwamenenene noo yemanene akamwa ku mutambela kuje kwakele mwanike.

¹⁰ Omo vamwene ngongonosi, co vajolelele manene.

¹¹ Co vakovelele mu njuvo, vamwene mwanike na vaina Maliya, co vatsikamene nakumulemesa. Asinoni vafukwile mu vinjeke vyavo, co vamwanene vwana vwa ngolinde na fulankininsense na miila.

¹² Asinoni velukile ku lifuti lyavo mu ngila yeka, omwo Njambi wavanangwile mu njozi ngeci kesi veluke lalo kuli Helonde.

Vatewesela Yesu ku Ingito

¹³ Omo vanai laja, kangelo ka Mwene washolokele kuli Yosefa mu njozi ngwendi, “Helonde ashakezeka mwanike ngeci amutsiye. Ngecivene, induka, ambata mwanike amo na vaina mutewele ku Ingito, mukakaleko noo njikakuleka ngeci mwiluke.”

¹⁴ Ku vutsiki vuje Yosefa wendukile, wambatele mwanike amo na vaina, co vaile ku Ingito,

¹⁵ kuje vakakele noo Helonde watsile. Eci calingiwile ngeci vipwe vya vushunga vije vyendekele Mwene muli muka-kwimanena ngwendi, “Munange njamusanene ku Ingito.”

Vatsiya vanike

¹⁶ Omo Helonde wamwene ngeci vaka-mana vaje vatundile mu ngangela vanamukwisa, waluvalele manene. Watumine mashwalale vendi ngeci vatsiye vanike voshe va vanalume vaje vakele mu Mbetelehema na mu membo akwatako, washikile ngeci vatsiye vanike vaje vakele na myaka ivali na vaje vavandondo, ngwe muje mwakon̄ele vaka-mana a simbu ije omo ngongonosi yasholokele.

¹⁷ Mu ngila eyi ngeci vyalingiwile vije vyendekele Njelemiya muka-kwimanena ngwendi,

¹⁸ “Vazivile lijwi ku Lama, lijwi lyakulila nakusikoka manene. Lakele alilila vana vendi, katava kumuzembeleka, omwo voshe vanatsi.”

Vatunda ku Ingito

¹⁹ Oloni omo Helonde watsile, kangelo ka Mwene washolokele kuli Yosefa mu njozi ku Ingito, wendekele ngwendi,

²⁰ “Induka, ambata mwanike amo na vaina, muye ku lifuti lya Isalele, omwo vaje vashakele kutsiya mwanike vanatsi.”

²¹ Co Yosefa wendukile, wambatele mwanike amo na vaina, vezile ku lifuti lya Isalele.

²² Omo Yosefa wazivile ngeci Alekelau nashwana a litanda lya ishe Helonde kupwa mwene mu Yundeya, co wazivile lyova lyakuya kuje. Ngecivene, Njambi wamunangwile mu njozi, co watundile kuje waile ku lifuti lya Ngalileya.

²³ Co wakele mu limbo livatumbwile ngwavo Nazaleta, ngeci vilingiwe vije vyendekele muka-kwimanena ngwendi, “Vakamutumbula muka-Nazaleta.”