Mateo 19 - Livulu lya Shukulu Kalunga

Yesu alongesa a kutsiya vulo

¹ Omo Yesu wamanesele kwendeka majwi oshe awa, watundile ku Ngalileya waile ku lifuti lya Yundeya musambwa ya Ndonga ya Yondau.

² Mbunga yakama ya vanu vamukavele, co kuje vene wavakangwisile.

³ Co vaFaliseo vamo vezile kuli ikeye nakumweseka vamwihwile ngwavo, “Kuma Lishiko lyetu litavesa munalume kukondola munakazi wendi a mulonga nkala ndi?”

⁴ Yesu wavakumbulwile ngwendi, “Kumwalavele mu visoneka ngeci akulivanga Ishamatanga wavatangele munalume na munakazi ndi?

⁵ Co Njambi wendekele ngwendi, ‘Omwo a cuma eci munalume akaseza ishe na vaina nakulikumbasana na munakazi wendi, co vakapwa muvila umolika!’

⁶ Ngecivene, kuvakapu lalo vavali, oloni vakapwa muvila umo. Ngecivene, vaje vaanakumbasana Njambi, munu kesi avaangunune.”

⁷ VaFaliseo vamwihwile ngwavo, “Omwo vikajo Mosesa washikile lishiko ali munalume lyakwana munakazi wendi mukanda wakutsiya vulo nakumukondola?”

⁸ Yesu wavakumbulwile ngwendi, “Mosesa wamitavele kukondola vanakazi veni omwo kukaluwa kwa vimbunge vyeni. Oloni kucapwile ngacije a simbu yakutanga.

⁹ Co njimileka ngwange munalume woshe akondola munakazi wendi, nga kesi a mulonga wa vupangala, alinga vupangala nga ambata munakazi weka.”

¹⁰ Vandongisi vendi vendekele kuli ikeye ngwavo, “Nga cinapu ngoco akati ka munalume na munakazi, mwamuvwa kulikela kwambata.”

¹¹ Oloni Yesu wavakumbulwile ngwendi, “Evi vilongesa kuvyakundamene kuli vanu voshe embwe, oloni kuvanga kuli vaje lika Njambi navanavyo.

¹² Omwo kuli vingila vyavingi vije vinajenekesa vanu kwambata, omwo kuvali vamo vazike vasemukile ngacije vene mu memo a vainavo, co kuvali vazike omwo vanu vavalingisile kupwa vazike, co lalo kuvali vamo vazike vakevo vavenya valilingisile vazike omwo Vumwene vwa mwilu. Uje woshe asa kutambula vilongesa evi, avitambule.”

Yesu avezikisa vanike vamo vavandondo

¹³ Asinoni vanu vamo vamunenelele vanike vavandondo ngeci avakambeke mavoko nakuvalombelela, oloni vandongisi vendi vavavindikile.

¹⁴ Oloni Yesu wendekele navo ngwendi, “Eceleni vanike vavandondo vaije kuli yange, co kesi muvavindike, omwo Vumwene vwa mwilu vunapu vwavo.”

¹⁵ Co wavakambekele mavoko endi, co watundile kuje.

Mukwenje wakufuka

¹⁶ Munu umo wezile kuli Yesu, wamwihwile ngwendi, “Mulongisi, cuma mukajo cacivwa cinjinapande kulinga ngeci njitambule mwonyo wa myaka yoshe?”

¹⁷ Co Yesu wamukumbulwile ngwendi, “Vikajo unjihwila a vyuma vyavivwa? Kwali Umolika ikeye wamuvwa. Nga ushaka kukovela mu mwonyo wa myaka yoshe, co nyunga mashiko.”

¹⁸ Wamwihwile ngwendi, “Mashiko akajo?” Co Yesu wamukumbulwile ngwendi, “Kesi utsiye, kesi ukalinge vupangala, kesi ukaive, kesi ukavangele mukweni vukaleo vwa makuli,

¹⁹ singimika isho na vanyoko, co zema mukweni ngwe muwalizema yove vavenya.”

²⁰ Uje mukwenje wendekele ngwendi, “Mashiko oshe awa njawononoka laja, cuma mukajo lalo cinasalako?”

²¹ Yesu wamulekele ngwendi, “Nga ushaka kupwa wakulamba, ya ukalandese vyoshe ulinavyo ukaane vimbongo ku tuutu, co ukakala na vufuko mwilu, asinoni wije unjikave.”

²² Omo uje mukwenje wazivile lijwi eli, waile na vusiwa, omwo ikeye wakele na vufuko vwavungi.

²³ Co Yesu wendekele kuli vandongisi vendi ngwendi, “Mwa vushunga njimileka ngwange, cikapwa cacikalu kuli vaka-kufuka kukovela mu Vumwene vwa mwilu.

²⁴ Njiilukilao lalo ngwange, cacasi kuli kamelo kwita mu lisho lya nguya, kutuvakana muka-kufuka kukovela mu Vumwene vwa mwilu.”

²⁵ Omo vandongisi vendi vazivile vyuma evi, valikomokelele manene, vendekele ngwavo, “Iyajo asa kwovoka?”

²⁶ Oloni Yesu wavakengele shwii, co wavakumbulwile ngwendi, “Eci cinakaluwa lika kuli vanu, oloni kuli Njambi vyuma vyoshe vyavyasi.”

²⁷ Petulu wendekele ngwendi, “Kenga, yetu tunaseza vyuma vyoshe, tunakukava, cooni cikandelela cikajo tukatambula?”

²⁸ Yesu wavakumbulwile ngwendi, “Mwa vushunga njimileka ngwange, omo Muna Munu akatumbama a litanda lyendi lya vumpau mu lifuti lyaliha kulutwe, asinoni neni lalo vaka-kunjikava likumi na vavali mukatumbama a matanda aje likumi na avali, mukushwana miyati ije likumi na ivali ya vanu va Isalele.

²⁹ Co woshe uje naseza vinjuvo vyendi, nambe vandolome vendi, nambe vandokazi vendi, nambe ishe, nambe vaina, nambe vana vendi, nambe mahya endi, omwo yange, akatambula vyuma 100 ku cuma cimo na cimo cije casezele, co Njambi akamwana mwonyo wa myaka yoshe.

³⁰ Oloni vaka-kulivanga vavangi vakapwa vaka-kukotokela, co vaka-kukotokela vavangi vakapwa vaka-kulivanga.