Mateo 16 - Livulu lya Shukulu Kalunga

VaFaliseo valomba cizivukiso

¹ VaFaliseo vamo na vaSanduki vezile kuli Yesu nakumweseka, ngecivene, vamulombele linga avalingile cizivukiso cije cimwesa ngeci Njambi namutava.

² Oloni wavakumbulwile ngwendi, “Omo litangwa lilauka mukendeka ngweni, ‘Lelo kunaki mukalavanda, omwo lilu livenga.’

³ Co lalo ku mutondo mukendeka ngweni, ‘Lelo nyonzi ili muyehi nakunyoka, omwo mashelwa anazivuluka.’ Yeni mwasa kuseteka kutonola na ntwima omo mukenga lilu, oloni kumwasa kuzivuka vya visimbu nambe muvinalumbunukila vizivukiso evi.

⁴ Yeni vanu va muyati wauvi vaka-kujeneka kukulaela! Yeni mwihula lika ngeci njimileke cizivukiso ndi? Embwe! Kuvanga cizivukiso ca Yona lika.” Ngecivene, wavasezele waile.

Musima wa vaFaliseo na vaSanduki

⁵ Omo vandongisi vajavukilile musambwa ku mutambela weka wa lishali, vevalele kwambata makende.

⁶ Yesu wendekele navo ngwendi, “Nyanyameni, co linyungeni ku musima wa vaFaliseo na vaSanduki.”

⁷ Co vashangumukile kulikanangana akati kavo ngwavo, “Alinakwendeka evi omwo kutwambatele makende.”

⁸ Oloni Yesu wazivukile vije vakele nakwendeka, ngecivene, wavehwile ngwendi, “Omwo vikajo mulinakulikanangana akati keni ngweni kumwambatele makende? Yeni vaka-kukulaela kwakundondo!

⁹ Kuma naololo kanda muzivuke ndi? Kuma yeni kumwasa kwanuka muje njapazwile mikasha ya makende itanu kuli vaje vanu 5,000 ndi? Mitonga ya vimbazuvwila ingai mwashulisile?

¹⁰ Nambe ije mikasha ya makende itanu na ivali ya vaje vanu 4,000. Co mitonga ingai mwashulisile?

¹¹ Omwo vikajo kumwazivisisile ngeci yange kunjendekele neni a mikasha ya makende? Nyanyameni ku musima wa vaFaliseo na vaSanduki!”

¹² Asinoni vandongisi vazivukile ngwavo kuma kavalekele kunyanyama ku musima wakulinga mikasha ya makende, oloni kunyanyama ku vilongesa vya vaFaliseo na vaSanduki.

Petulu atava ngeci Yesu ikeye Kilistu Wakuvwavesa

¹³ Omo Yesu waile ku lifuti lya kuyehi na nganda ya Sesaliya Filipu wehwile vandongisi vendi ngwendi, “Vanu valinakutumbula Muna Munu ngwavo ikeye iya?”

¹⁴ Co vamukumbulwile ngwavo, “Vamo valinakwendeka ngwavo yove Yowano Muka-kumbwitika, veka lalo ngwavo yove Elinja, vakwavo lalo ngwavo yove Njelemiya, nambe yove umo wa vaka-kwimanena.”

¹⁵ Wavehwile ngwendi, “Yeni oni munjitumbula ngweni yange iya?”

¹⁶ Simoni Petulu wamukumbulwile ngwendi, “Yove Wakuvwevesa, Muna Njambi Wakuyoya.”

¹⁷ Co Yesu wamukumbulwile ngwendi, “Unavezika ove Simoni muna Yona! Omwo vanu kuvacijombolwele kuli yove, oloni kuvanga Tate uje ali mwilu.

¹⁸ Co yange njikuleka lalo ngwange, yove unapu Petulu, co a limanya eli vene akeo njikatungila cikungulukilo cange, co nzili ya vukalo vwa vatsi kuyikacihyana.

¹⁹ Njikakwana masapi a Vumwene vwa mwilu, co nkala cuma ciwukakuta ano asi, na mwilu vakacikuta lalo, co nkala cuma ciwukazitula ano asi, na mwilu vakacizitula lalo.”

²⁰ Asinoni Yesu wasin̄ikile vandongisi vendi ngwendi kesi valekeko munu umo ngwavo ikeye Kilistu Wakuvwavesa.

Yesu endeka a tuyando twendi na a kutsa kwendi

²¹ Kutunda a simbu ije, Yesu washangumukile kuleka vandongisi vendi ngwendi, “Njinapande kuya ku Yelusalema, nakuyanda manene ku mavoko a vakulunu, na kuli vakulunu va vaka-kukombelela, na kuli valongisi va majwi a Lishiko. Co vakanjitwala ku kutsa, oloni omo kuneti matangwa atatu njikasanguka.”

²² Co Petulu wamutwalele kwavo lika, co wamukandele ngwendi, “Avwe Mwene! Njambi acivindike! Eci kucapandele kulingiwa ali yove embwe!”

²³ Oloni Yesu watengulukile wendekele na Petulu ngwendi, “Tunda kuli yange ove Satana! Yove unapu u citanukiso mu ngila yange, omwo viyongola vyove vinapu vya vunu, kesi vya Njambi embwe!”

²⁴ Asinoni Yesu wendekele kuli vandongisi vendi ngwendi, “Nga munu ashaka kunjikava, napande kulivyana ikeye vavenya, ambate cilindakano cendi, co anjikavangeye.

²⁵ Omwo munu woshe ashaka kunyunga mwonyo wendi auzimbalesa, oloni munu uje azimbalesa mwonyo wendi omwo lizina lyange akauwana.

²⁶ Omwo nga munu afuka kaye koshe, oloni azimbalesa mwonyo wendi vika awanao? Mwa vushunga vene nacimo cai! Nacimo cai munu asa kwingisamo ngeci awane mwonyo wendi.

²⁷ Omwo Muna Munu akaija mu vumpau vwa Ishe amo na tungelo twendi, co asinoni akana kuli munu na munu fweto yendi kupwisa ngwe ku vipangi vyendi.

²⁸ Mwa vushunga njimileka ngwange, kuvali vamo kuno kuvakatsi kuvanga vanamono Muna Munu alinakwija mu vumwene vwendi.”