Mateo 14 - Livulu lya Shukulu Kalunga

Kutsa kwa Yowano Muka-kumbwitika

¹ A simbu ije Helonde, uje washwanene mu Ngalileya, wazivile lutsimo lya Yesu,

² co wendekele kuli vamyata vendi ngwendi, “Ou ikeye vene Yowano Muka-kumbwitika nasanguka ku vatsi mukemwo ali na nzili yakama yakulinga vizivukiso.”

³ Omwo Helonde washikile ngeci vakwate Yowano, co vamukutile nakumwaka mu kamenga, omwo ali Helondiya, munakazi wa ndolome yendi Filipu.

⁴ Omwo Yowano Muka-kumbwitika walekele Helonde ngwendi, “Kesi mwamuvwa kwambata Helondiya!”

⁵ Helonde washakele kutsiya Yowano, oloni wazivile lyova lya vaYunda, omwo vakevo vatumbwile Yowano ngwavo muka-kwimanena.

⁶ Oloni omo litangwa lyakwanuka kusemuka kwa Helonde lyetele, muna Helondiya wa munakazi wakinine ku mesho avo. Co Helonde wazivile kuvwaa

⁷ ngecivene, wamukulaesele ngwendi, “Njilisinga ngwange cuma coshe ulomba njikakwanaco!”

⁸ Vaina vayongwele mwakalinga, co wendekele ngwendi, “Njaneni ololo ano vene mutwe wa Yowano Muka-kumbwitika a lilonga!”

⁹ Co mwene wakele na vusiwa manene, oloni omwo a cikulaeso cije walisingile naco ku mesho a voshe vaje vatumbamene nendi amo ku mesa, co watavele kulomba kwendi.

¹⁰ Ngecivene, vakatapele mutwe wa Yowano mu kamenga.

¹¹ Co mutwe wa Yowano vaunenele a lilonga nakuwana kuli uje mumbanda, co uje mumbanda wautwalele kuli vaina.

¹² Co vandongisi va Yowano vezile nakwambata muvila nakukautsinda, co vaile kuli Yesu kukamulekako.

Yesu alisa vanalume vakupwa 5,000

¹³ Omo Yesu wazivile muzimbu wa kutsa kwa Yowano, watundile ku mutambela uje mu vwato, waile mu mambo kwendi lika. Oloni omo vanu vavizivile vasezele membo avo, co vamukavele.

¹⁴ Yesu watundile mu vwato, co omo wamwene mbunga yakama, wavazivilile mema ku mbunge, co wakangwisile vaje vakele nakuvinja.

¹⁵ Omo kwapwile cingwezi vandongisi vendi vezile kuli ikeye, vendekele ngwavo, “Litangwa linatoko laja, co muno mu mambo, shandola vimbunga evi, co vaye ku membo vakalilandele vyakulya vakevo vavenya.”

¹⁶ Yesu wavalekele ngwendi, “Kuvapandele kuya embwe, yeni vene vaaneni vyakulya ngeci valye.”

¹⁷ Vakevo vendekele nendi ngwavo, “Kutwesi na vyakulya vyeka kuno, kuvanga mikasha ya makende itanu na visi vavali.”

¹⁸ Co wendekele navo ngwendi, “Vineneni kuno kuli yange.”

¹⁹ Asinoni washikile vanu vatumbame asi a mwila, co watambwile ije mikasha ya makende itanu na visi vavali, wakengele mwilu, co wakandelelele kuli Njambi. Wapazwile ije mikasha ya makende wayanene kuli vandongisi vendi, co vandongisi vapangezelele vimbunga vya vanu.

²⁰ Co voshe valile vakutile. Co vandongisi vakungulwile vimbazuvwila vije vyasaleleo vashulisile mitonga likumi na ivali.

²¹ Co vanu vaje valile vapwile vanalume 5,000, kujeneka kulavako vanakazi na vanike.

Yesu enda akamwa ya mema

²² Asinoni Yesu wasindiiye vandongisi vendi ngeci vakovele mu vwato valivange kuya kulutwe musambwa ya lishali, simbu ikeye acishandola vanu ngeci vaye.

²³ Co omo wamanesele kushandola vimbunga vya vanu, walamatele ku munkinda endi lika nakulombela. Omo litangwa lyatokele, Yesu wakele kuje endi lika.

²⁴ Oloni a simbu ije vwato vwakele akati ka lishali, mankimba akele nakupindisa vwato omwo lihunzi lyakele nakuvupekumuna.

²⁵ Co a mungulungengu Yesu wezile kuli vakevo, alinakwenda akamwa ya mema.

²⁶ Omo vandongisi vendi vamumwene alinakwenda akamwa ya mema, vazivile lyova vendekele ngwavo, “Ndumba ya munu!” Co vatambekele na lyova.

²⁷ Oloni Yesu wendekele navo ngwendi, “Simpeni! Yange, kesi muzive lyova!”

²⁸ Co Petulu wamukumbulwile ngwendi, “Mwene, nga mwa vushunga yove, njitave njende a mema njije kuli yove.”

²⁹ Ikeye wamukumbulwile ngwendi, “Ija!” Ngecivene, Petulu watundile mu vwato nakwenda akamwa ya mema kuya kuli Yesu.

³⁰ Oloni omo wazivile lihunzi nakumona mankimba, wazivile lyova, co washangumukile kumbwitama, watambekele ngwendi, “Mwene, njovole!”

³¹ Yesu wolwele livoko lyendi wamukwatele, wamulekele ngwendi, “Yove muka-kukulaela kwakundondo! Vikajo walingila vimata?”

³² Co omo vakovelele mu vwato, lihunzi lyalendamene.

³³ Asinoni vandongisi vaje vakele mu vwato valemesele Yesu vendekele ngwavo, “Mwa vushunga vene yove u Muna Njambi!”

Yesu akangwisa vaka-kuvinja mu Ngenesaleta

³⁴ Co omo vajavukile lishali vezile ku lifuti lya Ngenesaleta.

³⁵ Co omo vanu va ku lifuti lije vamuzivukile, vatumine lijwi mu lifuti lyavo mwoshe, co vamunenelele vaka-kuvinja voshe.

³⁶ Co vamulambelelele ngeci atave vaje vakele nakuvinja vakwate nameme ku mukundwilo wa cikoveyo cendi, co vaje voshe vakwateleko vakangukile.