Mateo 13 - Livulu lya Shukulu Kalunga

Cisimo ca muka-kukuva

¹ A litangwa lije vene, Yesu watuukile mu njuvo, co wakatumbamene ku kenge ya lishali nakulongesa.

² Co mbunga yakama vakungulukile kuli ikeye nakumuzengeleka, ngecivene, wakovelele mu vwato nakutumbamamo, co vimbunga vyoshe vemanene a nunda.

³ Co wavalongesele vyuma vyavingi na visimo ngwendi, “Kwakele munalume umo waile nakukuva vimbuto.

⁴ Co omo wakele nakukuva vimbuto mu lihya, vimo vyawililile kumukulo wa ngila, co tuzila vezile nakuvilya.

⁵ Vimbuto vikwavo vyawililile a mamanya aje kwaakele livu lyalingi. Co vwasi-vwasi vije vimbuto vyashangumukile kumena, omwo kwaakele livu lyalingi.

⁶ Oloni omo litangwa lyatuukile nakutwa litanya, co vije vimbuto vyajujwamene, omwo mizi yavyo kuyakovelele manene mu livu, co vije vimbuto vyomine vwasi cau.

⁷ Vimbuto vikwavo vyawililile akati ka mambimbo, co aje mambimbo akulile avitivile.

⁸ Oloni vimbuto vikwavo vyawililile ku livu lya vwilo, co vyemine, vimo vyemine vimbuto 100, vimo vyemine vimbuto makumi atanu na limo, co vikwavo lalo vyemine vimbuto makumi atatu.”

⁹ Co Yesu wamanesele kwendeka ngwendi, “Uje woshe ali na matwi, azive!”

Vutumbe vwa visimo

¹⁰ Co vandongisi vezile kuli Yesu vamwihwile ngwavo, “Omwo vikajo ukendeka kuli vakevo na visimo?”

¹¹ Asinoni Yesu wavakumbulwile ngwendi, “Kuli yeni vanamyana kuzivuka vyuma vya Vumwene vwa mwilu, oloni vakevo kuvavaneneco.

¹² Omwo munu woshe alinavyo vakamuwezelela vikwavo lalo, co akakala na vyavingi, oloni uje kesi navyo, nameme cije alinaco vakamunyekaco.

¹³ Evi vikevyo vinjikendekela navo mu visimo omwo vakevo vamona, oloni kuvamonesesa, co vaziva, oloni kuvazivi nambe kuzivisisa.

¹⁴ Ngecivene, majwi a Isaya muka-kwimanena anapu a vushunga kuli vakevo, ‘Vanu ava kuziva vakaziva, oloni kuvakazivisisa, vakevo kumona vakamona, oloni kuvakamonesesa,

¹⁵ omwo mana avo akuzeya, co vanaziki mu matwi avo nakulalameka mesho avo, ngeci mesho avo kesi amone, matwi avo kesi azive, mana avo kesi azivisise, co vakatengulukila kuli yange mukuvakangwisa.’

¹⁶ “Ngeci mweni, mwavezika manene! Omwo mesho eni alinakumona, co matwi eni alinakuziva.

¹⁷ Mwa vushunga njimileka ngwange vaka-kwimanena vavangi na vanu va Njambi vavangi vashakele manene kumona vije vimulinakumona, oloni kuvavimwene, co nakuziva vije vimulinakuziva, oloni kuvavizivile.

Yesu alumbununa cisimo ca muka-kukuva

¹⁸ “Tolilileni, nakulilongesa mucinalumbunukila cisimo ca muka-kukuva.

¹⁹ Voshe vanu vaje vaziva majwi awa a Vumwene vwa Njambi oloni kuvawazivisisa, vanapu ngwe vimbuto vije vyawililile kumukulo wa ngila. Uje Muka-vuvi aija nakunyangulamo vije vivakuvile muli vakevo.

²⁰ Vimbuto vije vyawililile a livu lya mamanya vinapu ngwe vaje vanazivi lijwi nakulitambula vwasi-vwasi nakuvwaelela.

²¹ Oloni kulyesi na mizi muli vakevo yai, co likala kasimbu kakandondo lika. Co omo tuyando twija nambe mapakeso omwo lijwi, co aje vene valikela.

²² Vimbuto vije vyawililile akati ka mambimbo vinapu ngwe vaje vaziva lijwi, oloni lipakeso lya mwonyo na cizemo ca vufuko vitundisisa lijwi, co kuvemi vushuka.

²³ Co vimbuto vije vyawililile ku livu lya vwilo, vinapu ngwe vaje vaziva lijwi nakulizivisisa, vaima vushuka, vamo vaima vushuka 100, vakwavo makumi atanu na limo, co vakwavo makumi atatu.”

Cisimo ca shaku

²⁴ Yesu wavatelele cisimo cikwavo lalo ngwendi, “Vumwene vwa mwilu vunalifu ngwe munu umo wakuvile vimbuto vyavivwa mu lihya lyendi.

²⁵ Vutsiki vumo, omo vanu voshe valalele tulo, citozi cendi wezile nakukuvululamo shaku muje mukati ka tiliku, co waile.

²⁶ Omo vimbuto vyamenene nakukola, co vyashangumukile kwima vimbuto, asinoni shaku yamenene.

²⁷ Co vangamba va uje munu vezile nakumwihula ngwavo, ‘Shukulu kuma kumwakunine vimbuto vyavivwa mu lihya lyeni ndi? Inatundu kulijo eyi shaku?’

²⁸ Wavalekele ngwendi, ‘Citozi ikeye nacilingi.’ Vangamba vamwihwile ngwavo, ‘Mushaka ngeci tuye tukatukulemo shaku ndi?’

²⁹ Oloni wavakumbulwile ngwendi, ‘Embwe, omwo mukatukula shaku amo mukatukwila kumo na tiliku.

³⁰ Vyeceni vyoshe vivali vikule amo noo simbu yakuteja inete. Asinoni njikaleka vaka-kuteja ngeci vatukule shaku akulivanga nakuyikuta mikuta, co vayenyeka, co vakungulwile tiliku mu cishete cange.’ ”

Cisimo ca mbuto ya musalata

³¹ Yesu wavatelelele cisimo cikwavo lalo ngwendi, “Vumwene vwa mwilu vunalifu ngwe munu anona kanona kamo ka mbuto ya musalata nakukakuna mu lihya lyendi.

³² Kakeko kapwa kakandondo manene akati ka vimbuto vyoshe vikwavo, oloni omo kakola kapwa muti wakama kutuvakana miti yoshe. Ngecivene, tuzila vaija nakutungila mashwa avo ku minango yawo.”

Cisimo ca musima

³³ Yesu wavatelelele cisimo cikwavo lalo ngwendi, “Vumwene vwa mwilu vunalifu ngwe musima uje wanonele munakazi nakuutsingasana na malita makumi awana a vunga vwa tiliku mu lilonga, noo mukasha woshe wafutunukile.”

Yesu apangesa visimo

³⁴ Yesu wendekele ku vimbunga vya vanu vyuma vyoshe evi na visimo, ikeye kendekele cuma kuli vakevo kujeneka kutao cisimo embwe.

³⁵ Walingile evi mukushulisa vyendekele muka-kwimanena ngwendi, “Njikapangesa visimo omo njendeka kuli vakevo, njikavaleka vyuma vyakushwekesa tunde akutanga kwa kaye.”

Yesu alumbununa cisimo ca shaku

³⁶ Asinoni Yesu wasezele vimbunga vije, co wakovelele mu njuvo. Co vandongisi vendi vezile kuli ikeye, vamwihwile ngwavo, “Tulumbunwine mwamuvwa cisimo ca shaku ya mu lihya.”

³⁷ Yesu wavakumbulwile ngwendi, “Muka-kukuva vije vimbuto vyavivwa, ikeye Muna Munu.

³⁸ Lihya linapu kaye, co vije vimbuto vyavivwa vinapu vanu va Vumwene vwa Njambi, shaku inapu vanu va Muka-vuvi,

³⁹ co citozi uje waikuvile ikeye Liyavola. Co kuteja kunapu kuhwa kwa kaye, vaka-kuteja vakevo tungelo.

⁴⁰ Ngwe omo muvakungulwile shaku nakuyenyeka, ngecivene, mukemwo muvakalinga akuhwa kwa kaye.

⁴¹ Muna Munu akatuma tungelo twendi, co vakakungulula vyuma vyoshe vije vikanene vuvi na vaje voshe vaka-kulinga vuvi nakuvatundisa mu Vumwene vwendi.

⁴² Co vakavombila mu litende lya tuhya, muje mukakala kulila nakulingenjenga ku mayo.

⁴³ Asinoni vaka-kujela va Njambi vakatwa ceke ngwe litangwa mu Vumwene vwa Ishavo. Uje woshe ali na matwi, azive!

Cisimo ca vufuko vwakushweka

⁴⁴ “Vumwene vwa mwilu vunalifu ngwe vufuko vwakushweka mu lihya, vuje munu awana, co avushweka. Asinoni akuvwaelela kwendi aya nakulandesa vyuma vyoshe vije alinavyo, co alanda lije lihya.

Cisimo ca makwalale

⁴⁵ “Vumwene wa mwilu lalo vunalifu ngwe munu muka-kulandulula ashakezeka makwalale.

⁴⁶ Co omo awana likwalale limo lya seo yakama manene, aya nakulandesa vyuma vyendi vyoshe vije alinavyo, co alanda lije likwalale.

Cisimo ca linimbwa

⁴⁷ “Vumwene vwa mwilu lalo vunalifu ngwe linimbwa lije livata mu lishali, co vakwatao visi va miyati yoshe.

⁴⁸ Omo lyashulu, valikokela a nunda, vatumbama, co vaangula visi vavavwa nakuvaka mu vimbangu vyavo, oloni vaje vavavi vavombila kuti.

⁴⁹ Ngecivene, mucikafwa akukotoka kwa kaye, tungelo vakaija nakwangula vaka-vuvi kuvatundisa ku vaka-vushunga.

⁵⁰ Co vaka-vuvi vakavombila mu litende lya tuhya, muje mukakala kulila nakulingenjenga ku mayo.”

Vushunga vwavuha novu vwalaja

⁵¹ Yesu wavehwile ngwendi, “Vyuma vyoshe evi munavizivuka ndi?” Vakumbulwile ngwavo, “Eyo.”

⁵² Co wavakumbulwile ngwendi, “Ngecivene, mulongisi woshe wa majwi a Lishiko, uje ivanalongesa vya Vumwene vwa mwilu nalifu ngwe vavenya njuvo atuwisa vyuma vyendi vyaviha nevi vyalaja mu mulili wendi wakutulikila.”

Yesu vamuvyana ku Nazaleta

⁵³ Omo Yesu wamanesele kwendeka visimo evi, watundile ku mutambela uje,

⁵⁴ co welukile kwimbo lyendi. Walongesele mu sinangonge, co voshe vaje vamuzivile valikomokelele. Valihozwele ngwavo, “Kulijo kwanawana mana awa na vizivukiso vyakufwa ngacije?

⁵⁵ Ou kesi ikeye uje muna muka-kushonga ndi? Ou kesi muna Maliya ndi? Na vandolome vendi kesi Yakomba na Yosefa na Simoni na Yundasa ndi?

⁵⁶ Kuma vandokazi vendi voshe kutwesi navo kuno ndi? Kulijo kwanawana vyuma vyoshe evi?”

⁵⁷ Co vakevo vamuvyanene. Oloni Yesu wendekele kuli vakevo ngwendi, “Muka-kwimanena kesi na kasingimiko hembo lyendi na ku vavushoko vwendi na ku naanga yendi kuvanga kweka.”

⁵⁸ Co kalingile vizivukiso vyavingi kuje omwo kuvakulaelele.