Mateo 11 - Livulu lya Shukulu Kalunga

Yowano Muka-kumbwitika atuma miluwa

¹ Co omo Yesu wamanesele kushika vandongisi vendi likumi na vavali, watundile ku mutambela kuje kwakele waile nakulongesa nakwambulula mu membo aje akele kuje.

² Omo Yowano Muka-kumbwitika wakele mu kamenga wazivile a vipangi vya Kilistu, watumine vandongisi vendi vamo kuli ikeye,

³ nakumwihula ngwavo, “Tuleke, yove vene uje yatumbwile Yowano ngwendi akaija, nambe tucivandamene weka lalo?”

⁴ Co Yesu wavakumbulwile ngwendi, “Yeni mukaleke Yowano vyuma evi vimunazivi nevi vimunamono,

⁵ tupuputwa vatona, vilema venda, vaka-mbumba vajela, tusinda-matwi vaziva, vatsi vasanguka, tuutu vavambulwila Vin̄anda Vyavivwa.

⁶ Co vanavezika vaje kuvesi na vimata ali yange!”

⁷ Omo vandongisi va Yowano vatundile kuli ikeye, Yesu walekele ije mbunga ali Yowano ngwendi, “Omo mwaile kuli Yowano mu mambo, mwakamwene cuma mukajo? Cishoni citepozoka na lihunzi ndi?

⁸ Mwaile nakumona vikajo? Munu nazala vuzalo vwasenga ndi? Vanu vakuzala ngacije vakala mu mapela!

⁹ Njilekeni, mwaile nakumona vikajo? Muka-kwimanena ndi? Eyo, oloni mwakamwene uje natuvakana muka-kwimanena.

¹⁰ Omwo Yowano ikeye uje ivasonekele mu visoneka ngwavyo, ‘Njambi wendekele ngwendi, kenga, njikatuma muluwa wange kulutwe lwove, ikeye akavwaesa ngila yove.’

¹¹ Mwa vushunga njimileka ngwange, akati ka vanu voshe vaje vanakalako, kukwesi umo natuvakana Yowano Muka-kumbwitika. Oloni uje wamundondo mu Vumwene vwa mwilu ikeye natuvakana Yowano.

¹² Kutunda ku matangwa a Yowano Muka-kumbwitika kweta na ku lelo, Vumwene vwa mwilu vanakala nakuvulwisa, co vaka-muuka vavutambula na nzili.

¹³ Omwo vaka-kwimanena voshe na majwi a Lishiko a Mosesa, vambulwile vya Vumwene noo a simbu ya Yowano.

¹⁴ Co nga muli na cizango cakukulaela muzimbu wavo, Yowano ikeye vene Elinja uje ivatumbwile ngwavo akaija.

¹⁵ Uje woshe ali na matwi, azive!

¹⁶ “Yanini vanu va matangwa ano njasa kuvesekesa na vikajo? Vakevo vanafu ngwe vanike vaje vanatumbama ku mutambela wakulandesela vyuma, co vatambekela ku vakwavo ngwavo,

¹⁷ ‘Twamimbilile myaso ya vushombolwa, oloni kumwakinine! Twamimbilile myaso ya vusiwa, oloni kumwalilile!’

¹⁸ Omwo Yowano wezile, kalile vyakulya nambe kunwa vinyu, co vendekele ngwavo, ‘Ali na munzinzime wakujwala!’

¹⁹ Omo Muna Munu wezile, ikeye walile nakunwa, co vanu vendekele ngwavo, ‘Kengeni ou munalume! Watsa akulya na akunwa vinyu, musamba wa vaka-kutambula lisimu na vaka-vuvi!’ Oloni mana a Njambi anasholoka kupwa a vushunga a vilinga vyawo.”

Vinganda vya vaka-kujeneka kukulaela

²⁰ Asinoni Yesu washangumukile kwendeka a vinganda vije kuje kwalingilile vizivukiso vyendi, omwo vanu kuvatengulukile mu vimbunge vyavo, co wendekele ngwendi,

²¹ “Ngongo yove Kolazine! Ngongo yove Mbetesainda! Omwo vizivukiso evi vanalingi kuli yeni, nga vavilingilile mu Tile na mu Sindone, nga vanu vamwo vazalele vikeleya nakulikwita lito kumwesa ngeci vanatenguluka ku vivi vyavo!

²² Oloni njimileka ngwange, a Litangwa Lyakusompa Njambi akatetela manene vanu va ku Tile na Sindone kutuvakana yeni!

²³ Co nove lalo Kapenauma! Washakele kulijundwila yove vavenya mwilu ndi? Ukashelumuka ku vukalo vwa vatsi! Omwo vizivukiso vije vyalingiwile muli yove, nga vyalingiwile mu Sondoma, nga nganda ije anga kuyicili nakweta kulelo lino.

²⁴ Oloni njimileka ngwange, a Litangwa Lyakusompa Njambi akatetela manene vanu va ku Sondoma kutuvakana yeni.”

Ijeni kuli yange muhwime

²⁵ A simbu ije vene Yesu wendekele ngwendi, “Njikukandelela yove Tate, Mwene wa lilu na ano asi! Omwo vyuma evi wavishwekele kuli vaka-mana na kuli vaka-kulilongesa, co unavisholola kuli vaka-kujeneka mana.

²⁶ Mukemwo vene Tate, mucavwaela ku mesho ove.

²⁷ “Vyuma vyoshe Tate nanjanavyo. Co lalo naumo wai azivuka Mwana kuvanga Ishe, co lalo naumo wai azivuka Ishe kuvanga Mwana, na vaje voshe vashaka Mwana kuvasholwelaye.

²⁸ “Ijeni kuli yange, yeni voshe munajuka nakwambata vyakulema, co njikamihwimisa.

²⁹ Lilemekeni mandauluwa yange, co lilongeseni kuli yange, omwo yange njimukalyovwa-ovwa na kulikeesa mu mbunge, co mukawana kuhwima ku myonyo yeni.

³⁰ Omwo mandauluwa yange yayasi, na citele cange cacehu.”